ހުޅުމާލޭގެ ރަސްމީ ލޯކަލް މާރުކޭޓުގައި ވިއްކަން ބަހައްޓާފައި އޮތް ކަރައެއް ކާން މީދަލެއް އޮތް މަންޒަރު ފެންނަ ވީޑިއޯއެއް ސޯޝަލް މީޑިއާގައި މި ފަހުން ދައުރުވާން ފެށުމާއެކު، ކާބޯތަކެތީގެ ރައްކާތެރިކަމާ މެދު އާންމުންގެ ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ. މި ވީޑިއޯއިން ފެންނަ ގޮތުގައި، މާރުކޭޓުގެ ގޮޅިއެއްގައި ވިއްކަން ބަހައްޓާފައި އޮތް ކަރައެއްގެ މަތީގައި މީދަލެއް އޮވެ، ދިޔައީ ކަރާ ކަމުންނެވެ.
މި މަންޒަރާއެކު، މާރުކޭޓުތަކުގެ ސާފުތާހިރުކަމުގެ މިންގަނޑުތަކާ މެދު އާންމުން ވަނީ ސުވާލު އުފައްދައި، ކަމާބެހޭ ފަރާތްތަކުގެ ސަމާލުކަމަށް މިކަން ގެނެސްފައެވެ. ޚާއްސަކޮށް ރޮލަށް ކާން ބޭނުންކުރާ މޭވާގެ ބާވަތްތަކުގައި މިފަދަ ނަޖިސް ސޫފި ބީހުމަކީ ބަލިމަޑުކަމެއް ފެތުރިދާނެ ކަމެއް ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފައެވެ.
މި މައްސަލައާ ގުޅިގެން "ސަން" އިން ކުރި ސުވާލަކަށް ޖަވާބުދެމުން, މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނި ގޮތުގައި، އެ ވީޑިއޯ އާންމުވުމާއެކު އެ އޮތޯރިޓީގެ ޓީމަކުން ވަނީ ހުޅުމާލޭގެ ލޯކަލް މާރުކޭޓަށް ގޮސް އެތަން އިންސްޕެކްޓުކޮށްފައެވެ. އަދި އެ އިންސްޕެކްޝަނަށް ފަހު، މާރުކޭޓުގައި ރަނގަޅު ކުރަން ޖެހޭ ކަންކަން ފާހަގަކޮށް، އެ ކަންކަން މިހާރު ރަނގަޅު ކުރަމުންދާ ކަމަށް އެމްއެފްޑީއޭއިން ވަނީ ބުނެފައެވެ.
ހުޅުމާލޭ މާރުކޭޓުން ބަޔަކު ވިޔަފާރި ކުރަނީ-- ފޮޓޯ: މިހާރު
މި މައްސަލަ ފެންމަތިވި ގޮޅިއާމެދު އެޅި ފިޔަވަޅެއް, އަދި އެހެން ތަފްސީލެއް އެމްއެފްޑީއޭއިން އަދި ހާމައެއް ނުކުރެއެވެ.
މާރުކޭޓުތަކަކީ އާންމުކޮށް ހުޅުވާލެވިފައި ހުންނަ ތަންތަނަށް ވުމުން، ކުނި މެނޭޖުކުރުމާއި ކާބޯތަކެތި ރައްކާކުރުމުގައި ޚާއްސަ ސަމާލުކަމެއް ދޭންޖެހޭ ކަމަށް ކަމާބެހޭ ފަރާތްތަކުން ފާހަގަކުރެއެވެ.
ކާބޯތަކެތި ވިއްކާ ތަންތަނުގައި މީދާ ފަދަ ތަކެތި އުޅުމަކީ އާންމު ސިއްހަތަށް އޮތް ވަރަށް ބޮޑު ނުރައްކަލެއް ކަމަށް ސިއްހީ މާހިރުން އިންޒާރުދެއެވެ. މީދަލުގެ ކުޑަކަމުދާ ތަކެއްޗާއި ބޮޑުކަމުދާ ތަކެތީގެ ޒަރީއާއިން އިންސާނުންނަށް ނުރައްކާތެރި އެތައް ބައްޔެއް ޖެހުމުގެ ފުރުސަތު އޮވެއެވެ. އޭގެ ތެރޭގައި ލެޕްޓޯސްޕައިރޯސިސް އާއި ސަލްމަނެލޯސިސް ފަދަ ބަލިތައް ހިމެނެއެވެ.
ލެޕްޓޯސްޕައިރޯސިސްއަކީ މީދަލުގެ ކުޑަކަމުދާ ތަކެތި ހޭކިފައި ހުންނަ ކާބޯތަކެތި ނުވަތަ ފެން ބޭނުންކުރުމުގެ ސަބަބުން އިންސާނުންގެ ހަށިގަނޑަށް ވަންނަ ބެކްޓީރިއާއަކުން ޖެހޭ ފުރާނައަށް ނުރައްކާވާ ފަދަ ބައްޔެކެވެ. މި ބަލީގެ ސަބަބުން ގަދަޔަށް ހުންއައުމާއި، ކިޑްނީއަށް ގެއްލުންވުން ފަދަ ސިއްހީ ބޮޑެތި މައްސަލަތައް ކުރިމަތިވެއެވެ. މީގެ އިތުރުން، މީދަލުގެ ނަޖިހުން ތަޣައްޔަރުވެފައިވާ ކާނާ ކެއުމުގެ ސަބަބުން ބޭރަށް ހިންގުމާއި ހޮޑުލުން ފަދަ މައްސަލަތައް ކުރިމަތިކުރުވާ ސަލްމަނެލޯސިސް ވެސް ފެތުރެއެވެ.
ހަމައެއާއެކު، މީދަލުގެ ޒަރީއާއިން ފެތުރޭ ހެންޓަވައިރަސް ފަދަ ނުރައްކާތެރި ވައިރަސްތަކަކީ ނޭވާލާ ނިޒާމަށް ބޮޑެތި ގެއްލުންތަކެއް ދޭ ބަލިތަކެކެވެ. އެހެންކަމުން، ކަރާ ފަދަ މޭވާތަކުގައި މީދާ ބީހި، އުޅުމަކީ ސިއްހީ ގޮތުން ބޮޑެތި މައްސަލަތަކެއް ދިމާވެދާނެ ކަމެކެވެ.
ރާއްޖޭގެ މާރުކޭޓުތަކުގައި މީދަލާއި ބުޅާ ފަދަ ތަކެތި އުޅޭ މައްސަލައަކީ މީގެ ކުރިން ވެސް އެތައް ފަހަރަކު ފެންމަތިވެފައިވާ މައްސަލައެކެވެ. މީގެ ކުރިން މާލޭގެ ދަތުރުވެރިންގެ މާރުކޭޓުގައި ވެސް ކަރާ ބަސްތާތަކެއް ކައިރީގައި މީދާ އުޅޭ މަންޒަރާއި، ފަޅާފައި އޮތް ކަރައެއް ކާން މީދާ އޮތް މަންޒަރު ފެނިގެން ރިޕޯޓުކޮށްފައިވެއެވެ. އަދި މާލޭގެ ވަޅޯމަސް މާރުކޭޓުގައި ވިއްކަން ބަހައްޓާފައި ހުންނަ ހިކިމަސްތަކުގެ މަތީގައި މީދަލާއި ބުޅާ ދުވެ އުޅޭ މަންޒަރު ވެސް މީގެ ކުރިން އާންމުވެފައިވެއެވެ. މިފަދަ ތަންތަނުގައި ކުނި ގިނަވުމާއި، ކާބޯތަކެތި ރައްކާތެރި ގޮތުގައި ބަންދުކޮށްފައި ނުހުންނާތީ، މިއީ ޕެސްޓް ކޮންޓްރޯލް ކުރުމަށް އޮތް ބޮޑު ގޮންޖެހުމެކެވެ.
މި މައްސަލަ ބޮޑުވެ، މާލޭގައި މީދާ ގިނަވުމުގެ ސަބަބުން އާންމުންނަށް ކުރިމަތިވަމުންދާ އުނދަގޫތައް ހައްލުކުރުމަށްޓަކައި، މާލެ ސިޓީ ކައުންސިލުން ވަނީ މީދާ މަދުކުރުމުގެ ޚާއްސަ ހަރަކާތެއް ވެސް މާލޭގެ ލޯކަލް މާރުކޭޓު ސަރަހައްދުގައި ފަށާފައެވެ. މި ޕްރޮގްރާމުގެ ދަށުން މާރުކޭޓު ސަރަހައްދުގެ އެކި ދިމަދިމާލުގައި މީދާ މަރާ ބޭސް ބަހައްޓައިގެން އެ ސޮރުމެން މަދުކުރުމުގެ މަސައްކަތް ކައުންސިލްގެ މުވައްޒަފުން ދަނީ ކުރަމުންނެވެ.
މާރުކޭޓުތަކަކީ ގިނަ އަދަދެއްގެ އާންމުން ކޮންމެ ދުވަހަކު ކާބޯތަކެތި ގަންނަން ޒިޔާރަތްކުރާ ތަންތަނަށް ވާއިރު، އެ ތަންތަނުގެ ސާފުތާހިރުކަން ކަށަވަރުކުރުމަކީ ކަމާބެހޭ އިދާރާތަކުގެ ޒިންމާއެކެވެ. ހުޅުމާލޭ މާރުކޭޓުގެ މައްސަލައިގައި އެމްއެފްޑީއޭއިން އިންސްޕެކްޝަން ކުރިއަށް ގެންގޮސްފައިވާއިރު، އެ ތަނުގައި އަޅަން ނިންމާފައިވާ އިސްލާހީ ފިޔަވަޅުތައް ތަންފީޒުވަމުންދާ މިންވަރު އެ އޮތޯރިޓީން ދަނީ މޮނިޓަރު ކުރަމުންނެވެ.