ލ. ހިތަދޫއަށް ދިމާވެފައިވާ ކަރަންޓު މައްސަލައަށް ދާއިމީ ހައްލެއް ނުލިބި ދިގުލައިގެންދާތީ، ފެނަކަ ކޯޕަރޭޝަންގެ މެނޭޖިންގް ޑިރެކްޓަރު މުހައްމަދު އަފީފް ހުސައިން ރައްޔިތުންގެ މަޖިލީހުގެ ސްޓޭޓް އެންޑް އެންޓަޕްރައިސަސް (އެސްއޯއީ) ކޮމިޓީއަށް ހާޒިރުކޮށްދެއްވުމަށް މާވަށު ދާއިރާގެ އެމްޑީޕީ މެންބަރު އަހްމަދު ޝާކިރު އެދިވަޑައިގެންފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީއެއްގައި މެންބަރު ޝާކިރު ވަނީ، ސަރުކާރުން ކުރަމުންދާ ބޭކާރު ހަރަދުތައް ހުއްޓާލައި، ގާނޫނުއަސާސީން ރައްޔިތުންނަށް ލާޒިމުކޮށްފައިވާ އަސާސީ ހައްގުތައް އެއްވެސް ތަފާތުކުރުމެއްނެތި ފޯރުކޮށްދިނުމަށް ގޮވާލައްވާފައެވެ.
ހިތަދޫގެ ކަރަންޓުގެ ހިދުމަތަށް ދިމާވެފައިވާ މައްސަލައަށް ހައްލެއް ހޯދުމަށް މި އަހަރު ފެށުނީއްސުރެ ރަށުގެ ރައްޔިތުން މަސައްކަތް ކުރަމުންދާކަން އޭނާ ފާހަގަކުރެއްވިއެވެ.
ހިތަދޫގައި ބޭނުންކުރާ ތިން ޖަނަރޭޓަރުގެ ތެރެއިން ދެ ޖަނަރޭޓަރު ހަލާކުވެފައިވުމުގެ ސަބަބުން، ކޮންމެ 30 މިނެޓަކުން ކަރަންޓު ކެނޑެމުންދާ ކަމަށް މެންބަރު ޝާކިރު ވިދާޅުވިއެވެ. މިކަމުގެ ސަބަބުން ރައްޔިތުންގެ އާންމު ދިރިއުޅުމަށް ބޮޑެތި ހުރަސްތަކެއް ކުރިމަތިވެ، ގޭގޭގައި ބޭނުންކުރާ އަގުބޮޑު އިލެކްޓްރޯނިކް ސާމާނުތަކަށް އިއާދަނުކުރެވޭ ފަދަ ގެއްލުންތަކެއް ލިބެމުންދާ ކަމަށް އޭނާ ފާހަގަކުރެއްވިއެވެ.
"ހިތަދޫ ކަރަންޓު މައްސަލައަށް ހައްލެއް ހޯދައި ދިނުމަށް މި ސަރުކާރުވަނީ ނުކުޅެދިފައި،" މެންބަރު ޝާކިރުގެ ސިޓީގައި ބަޔާންކޮށްފައިވެއެވެ.
އޭނާ ވިދާޅުވީ މިއަދާ ހަމައަށްވެސް މި މައްސަލައަށް އެދެވޭ ހައްލެއް ލިބިފައި ނުވާކަމީ ހިތާމަހުރި ކަމެއް ކަމަށެވެ.
މި މައްސަލައާ ގުޅިގެން ހިތަދޫ ފެނަކަ ބްރާންޗުން މީގެ ކުރިން ބުނެފައިވަނީ، ރަށުން ކަރަންޓު ކެނޑެނީ އެންމެ ބޮޑު ޖަނަރޭޓަރު (600 ވޮޓު) ހަލާކުވުމުން ކަމަށެވެ. ބާކީ ހުރި ދެ ޖަނަރޭޓަރުން މުޅި ރަށަށް އެއްފަހަރާ ކަރަންޓު ނުދެވޭތީ، ދެ ލޭނަކަށް ބަހާލައިގެން ކޮންމެ އެއްގަޑިއިރަކުން ބަދަލުކުރާ ގޮތަށް ކަރަންޓު ދެމުން އަންނަ ކަމަށް ވެސް ވަނީ ބުނެފައެވެ،
ގާތްގަނޑަކަށް 1،000 މީހުންގެ އާބާދީއެއް އޮންނަ ހިތަދޫގައި މި މައްސަލަ ފެންމަތިވާން ފެށީ މީގެ ހަމަސް ކުރިންނެވެ.
މެންބަރު ޝާކިރު ވަނީ މި މައްސަލައަކީ ރައްޔިތުންގެ ދިރިއުޅުމާ ސީދާ ގުޅުންހުރި ކަމަކަށްވާތީ، އެސްއޯއީ ކޮމިޓީގެ ބައްދަލުވުމެއް ވީ އެންމެ އަވަހަކަށް ތާވަލުކޮށްދެއްވުމަށް އެދިވަޑައިގެންފައެވެ. ފެނަކައިން ހިދުމަތްދޭ ގިނަ ރަށްތަކަކުން ކަރަންޓު ކެނޑުމުގެ ޝަކުވާތައް ފަހަކަށް އައިސް ވަނީ އިތުރުވެފައެވެ.