ޚިދުމަތް ނުފެށޭ ޑިވެލޮޕްމަންޓް ބެންކުގެ ޗެއާޕާސަން އިސްތިއުފާ ދެއްވައިފި

ޑީބީއެމްގެ ޗެއާޕާސަނާއި ރައީސް މުއިއްޒު ސަލާންކުރައްވަނީ: ޗެއާޕާސަން ވަނީ އިސްތިއުފާދެއްވާފައި --- ފޮޓޯ/ ރައީސް އޮފީސް

އުމްރާނީ ދާއިރާއާއި އިންވެސްޓުކުރުމަށް ޚާއްސަކޮށް މި ސަރުކާރުން އުފައްދައި، މިހާތަނަށް ޚިދުމަތް ނުފެށޭ ޑިވެލޮޕްމަންޓް ބެންކު (ޑީބީއެމް)ގެ ޗެއާޕާސަން އަރޫނީ ގޫނަތިލަކަ އިސްތިއުފާދެއްވައިފިއެވެ.

ޕްރަވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އާ ހަވާލާ ދެއްވައި، ސަރުކާރުގެ އިސް ތަރުޖަމާނު މުޙައްމަދު ހުސައިން ޝަރީފް (މުންދު) 'ސަން'އަށް ވިދާޅުވީ، އޭނާ އިސްތިއުފާދެއްވީ މިދިޔަ ހަފުތާގައި ކަމަށެވެ.

ނަމަވެސް، އިތުރު ތަފުސީލެއް ނުދެއްވައެވެ.

މާލީ ދާއިރާގައި 25 އަހަރުގެ ތަޖުރިބާ ލިބިވަޑައިގެންފައިވާ އަރޫނީ ގޫނަތިލަކަ އަކީ ބައިނަލްއަޤްވާމީ ފައިނޭންޝަލް މާކެޓްގެ ފައިނޭންޝަލް ސާވިސް ތަޖުރިބާކާރެކެވެ. ސްރީލަންކާގެ ރައްޔިތެއް ކަމަށްވާ އަރޫނީ ވަނީ، ހާވާޑް ޔުނިވާސިޓީން މާސްޓާ އޮފް ލޯ ހާސިލުކުރައްވާފައެވެ.

ޑީބީއެމްގެ ޗެއާޕާސަނާއި ސީއީއޯ ރައީސް މުއިއްޒާ ބައްދަލުކުރައްވަނީ: ދެ ބޭފުޅުން ވެސް ވަނީ އިސްތިއުފާ ދެއްވާފައި --- ފޮޓޯ/ ރައީސް އޮފީސް

މީގެއިތުރުން، ކޯޕަރޭޓް ބޭންކިން ކްރެޑިޓާއި ރިސްކް މެނޭޖްމަންޓާއި ސްރީލަންކާގެ ބޭންކުތަކާއި އިންޓަނޭޝަނަލް ބޭންކުތަކުގެ އިންޓާނަލް އޮޑިޓިންގައި އޭނާ މުހިންމު ރޯލެއް އަދާކުރައްވާފައިވެއެވެ.

ޑީބީއެމްގެ ޗެއާޕާސަން އިސްތިއުފާދެއްވިއިރު، ޑީބީއެމްއަށް ފުރަތަމަ އަހަރު 2.3 މިލިއަން ރުފިޔާގެ ގެއްލުން ވެފައިވާ ކަމަށް އޮޑިޓް ރިޕޯޓަކުން ވަނީ ދައްކާފައެވެ.

ޑިވެލޮޕްމަންޓު ބޭންކު އިފުތިތާހުކުރީ ނޮވެންބަރު 16، 2024 ގައެވެ.

ޑީބީއެމް އުފެއްދިތާ އަހަރެއްހާ ދުވަސްފަހުން އެ ބޭންކަށް ވިޔަފާރި ފެށުމުގެ ހުއްދަ ދިނީ މި އަހަރުގެ ޖެނުއަރީ މަސް ތެރޭގައެވެ. ނަމަވެސް އެ ފަހުން ވެސް އެ ބޭންކުގެ ޚިދުމަތްތައް އަދިވެސް ފެށިފައެއް ނުވެއެވެ.

އެ ބޭންކްގެ ސީއީއޯކަމަށް އައްޔަންކުރެއްވީ، އިނގިރޭސިވިލާތުގެ ރައްޔިތެއް ކަމަށްވާ ނޮއެލް ގްރެގާ ޕެޓަސަން ޖޯންސްއެވެ.

https://sun.mv/221563

އެކަމަކު، މާ ގިނަ ދުވަހެއް ނުވެ ސީއީއޯ ވަނީ މަގާމުން އިސްތިއުފާ ދެއްވައިފައެވެ. އޭނާ އިސްތިއުފާ ދެއްވި ނޯޓިސް މުއްދަތުގެ މުސާރައާއި އިނާޔަތްތައް ނުލިބިގެން އޭޕްރީލް ހަތް ވަނަ ދުވަހު އެ މައްސަލަ ވަޒީފާއާ ބެހޭ ޓްރައިބިއުނަލަށް ހުށަހަޅާފައިވެއެވެ.

ސީއީއޯ އިސްތިއުފާ ދެއްވިތާ މާ ގިނަ ދުވަސްތަކެއް ނުވެ އޭޕްރީލް 23 ވަނަ ދުވަހު ވަނީ, އެ ބޭންކުގެ ބޯޑު މެންބަރު ކަމުގެ މަގާމުގައި ހުންނެވި މއ. ވޭސައިޑް, 805 ފްލެޓް، އަޙްމަދު ޢަލީ، ވެސް އިސްތިއުފާ ދެއްވައިފައެވެ.

ދިވެހިރާއްޖޭގެ އުމްރާނީ ތަރައްގީއަށް އިންވެސްޓުކުރުމުގެ މަގުސަދުގައި ސަރުކާރުން އުފައްދަވާފައިވާ ޑިވެލޮޕްމަންޓް ބޭންކް އޮފް މޯލްޑިވްސްގެ ޗެއާޕާސަންކަމުގެ މަގާމުގައި ހުންނެވި ސްރީލަންކާގެ ރައްޔިތެއްކަމަށްވާ އަރޫނީ ގޫނަތިލަކަ ވަނީ މަގާމުން އިސްތިއުފާ ދެއްވާފައެވެ. ސަރުކާރުގެ އިސް ތަރުޖަމާނު މުޙައްމަދު ހުސައިން ޝަރީފް މިކަން ކަށަވަރުކޮށްދެއްވާފައިވާއިރު، މިއީ އެ ބޭންކުގެ އިސް ހިންގުންތެރިންތަކެއް ވިދިވިދިގެން އިސްތިއުފާ ދެއްވި ދަނޑިވަޅެކެވެ. މީގެ ކުރިން ބޭންކުގެ ސީއީއޯގެ މަގާމުގައި ހުންނެވި އިނގިރޭސިވިލާތުގެ ނޮއެލް ގްރެގާ ޕެޓަސަން ޖޯންސް އަދި ބޯޑު މެންބަރެއް ކަމަށްވާ އަޙްމަދު ޢަލީ ވެސް ވަނީ މަގާމުން ދުރުވެވަޑައިގެންފައެވެ. މީގެއިތުރުން، ސީއީއޯ ވަނީ އޭނާއަށް ލިބެންޖެހޭ މުސާރައާއި އިނާޔަތްތައް ނުލިބޭކަމަށް ބުނެ ވަޒީފާއާބެހޭ ޓްރައިބިއުނަލަށް މައްސަލަ ވެސް ހުށަހަޅާފައެވެ. 2024 ވަނަ އަހަރުގެ ނޮވެންބަރު މަހު އިފުތިތާހުކުރި މި ބޭންކަށް މިއަހަރުގެ ޖެނުއަރީގައި ވިޔަފާރި ފެށުމުގެ ހުއްދަ ލިބުނު ނަމަވެސް، މިހާތަނަށް އަމަލީގޮތުން އެއްވެސް ޚިދުމަތެއް ފެށިފައެއް ނުވެއެވެ. އަދި އޮޑިޓް ރިޕޯޓުތަކުން ދައްކާގޮތުގައި ޚިދުމަތް ނުފެށިވާއިރު ފުރަތަމަ އަހަރު އެކަނިވެސް ބޭންކަށް ވަނީ 2.3 މިލިއަން ރުފިޔާގެ ގެއްލުމަކާ ކުރިމަތިލާންޖެހިފައެވެ. މި ހާލަތަކީ ބޭންކުގެ އިދާރީ އަދި މާލީ ހިންގުމާމެދު ސީރިއަސް ގޮންޖެހުންތަކެއް ހުރިކަން ހާމަކޮށްދޭ ކަމެކެވެ.

  • ޑިވެލޮޕްމަންޓް ބޭންކުގެ ޗެއާޕާސަން އަރޫނީ ގޫނަތިލަކަ މިދިޔަ ހަފުތާގައި މަގާމުން އިސްތިއުފާ ދެއްވުން.
  • ބޭންކުގެ ސީއީއޯ އަދި ބޯޑު މެންބަރެއް މީގެ ކުރިން އިސްތިއުފާ ދެއްވާފައިވުމާއި، ސީއީއޯގެ މުސާރައިގެ މައްސަލައެއް ޓްރައިބިއުނަލަށް ހުށަހަޅާފައިވުން.
  • ބޭންކަށް ވިޔަފާރި ފެށުމުގެ ހުއްދަ ލިބުނުތާ އެތައް މަހެއް ވެފައިވީނަމަވެސް، އަމަލީގޮތުން ޚިދުމަތް ދޭން ފެށިފައި ނުވުން.
  • އޮޕަރޭޝަންތައް ނުފެށި އޮތްއިރު، ފުރަތަމަ އަހަރުގެ ތެރޭގައި 2.3 މިލިއަން ރުފިޔާގެ މާލީ ގެއްލުމެއް ބޭންކަށް ލިބިފައިވުން.
comment ކޮމެންޓް