ރާއްޖެ މިނިވަންވިތާ 60 އަހަރުފުރުން ފާހަގަކުރުމަށް ޓަކައި މިދިޔަ އަހަރު ހަތަރު މިލިއަނަށް ވުރެ ގިނަ ރުފިޔާ ޚަރަދުކޮށްފައިވާ ކަމަށް، އާޓްސް މިނިސްޓަރު ހީނާ ވަލީދު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ އެމްޑީޕީ މެންބަރު މުޙައްމަދު އިބްރާހީމް (ކުޑޫ) ވަނީ، މިނިވަން ދުވަހުގެ ހަރަކާތްތައް ފާހަގަކުރުމަށް މިދިޔަ އަހަރު ކުރި ޖުމުލަ ޚަރަދާއި ހިނގި ޚަރަދުތަކުގެ ތަފުސީލަށް އެދިވަޑައިގެންފައެވެ.
އާޓްސް މިިނިސްޓަރު ހީނާ ވަލީދު: ވިދާޅުވީ މިނިވަން ދުވަސް ފާހަގަކުރަން 4.1 މިލިއަން ރުފިޔާ ޚަރަދުކުރި ކަމަށް --- ފޮޓޯ: މަޖިލިސް
ޖަވާބުގައި ހީނާ ވިދާޅުވީ، މިނިވަން ދުވަސް ފާހަގަކުރުމަށް މިދިޔަ އަހަރު 4.1 މިލިއަން ރުފިޔާ ސަރުކާރުން ޚަރަދުކުރި ކަމަށެވެ. ނަމަވެސް މިނިވަން ދުވަހުގެ ހަރަކާތްތަކަށް ވަކިވަކިން ކުރި ޚަރަދުތަކުގެ ތަފުސީލެއް ނުދެއްވައެވެ.
"ދެން މިނިވަންކަމަށް 60 އަހަރު ފުރުމާ ގުޅިގެން މާލެ ފިޔަވައި، އަތޮޅުތެރޭގެ އެއްވެސް ތަނެއްގައި މި ހަރަކާތްތައް ހިނގައިފައެއް ނުވޭ،" ހީނާ ވިދާޅުވިއެވެ.
ފާހަގަކުރެވޭ ގޮތުގައި މިނިވަން ދުވަސް ފާހަގަކުރުމުގެ ހަރަކާތްތައް މިދިޔަ އަހަރު ޝަރަފްވެރިކޮށްދެއްވީ އިންޑިއާގެ ބޮޑުވަޒީރު ނަރެންދްރާ މޯދީއެވެ. މިނިވަން ދުވަހުގެ ހަރަކާތްތައް ޝަރަފްވެރިކޮށްދެއްވުމަށް މޯދީ ވަޑައިގަތީ ރައީސް ޑރ. މުޙައްމަދު މުޢިއްޒުގެ ދައުވަތަކަށެވެ.
މިނިވަން ދުވަސް ފާހަގަކުރުމަށްޓަކައި މިދިޔަ އަހަރު ވަނީ މާލެއާއި ހުޅުމާލޭގައި ޕެރޭޑާއި ޖުމްހޫރީ މައިދާނުގައި ދިދަ ނެގުމުގެ ރަސްމިއްޔާތާއި ފުޅަނދުބުރު ބާއްވައިފައެވެ.