މެޗުގެ ފަހު ސިކުންތުކޮޅުގެ ތެރޭގައި ބްރެޒިލްގެ ޒުވާން ފޯވާޑް ގަބްރިއެލް މާޓިނެލީ ކާމިޔާބުކޮށްދިން ލަނޑާއެކު، ފަހަތުން އަރައި 2-1 އިން ޖަޕާން ބަލިކޮށް ބްރެޒިލުން ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 16 ބުރުން ޖާގައެއް ކަށަވަރުކޮށްފިއެވެ.
ޖަޕާން އަތުން މޮޅު ހޯދި މި މެޗަކީ ފަސް ފަހަރު މުބާރާތް ކާމިޔާބުކޮށްފައިވާ ޗެމްޕިއަން ބްރެޒިލަށް ތާރީޚީ ގޮތުން މުހިންމު މެޗެކެވެ.
ބްރެޒިލުން ވަނީ ވޯލްޑް ކަޕްގެ ތާރީޚުގައި ނޮކައުޓް ބުރުގެ ފުރަތަމަ މެޗުން ދެ މެޗު ފިޔަވައި އަނެއް ހުރިހާ މުބާރާތެއްގައި ކުޅުނު މެޗުން މޮޅުވެފައެވެ. އެހެންނަމަވެސް، އެންމެ ފަހުން ބޭއްވި ދެ ވޯލްޑް ކަޕްގައި ވެސް އެ ޓީމު ކެޓީ ކުއާޓާ ފައިނަލުން ކަމަށްވުމާއެކު، މި ފަހަރުގެ މުބާރާތަށް އެޓީމުން ނުކުތީ ބޮޑު އަޒުމަކާއެކުއެވެ.
ބްރެޒިލްއިން މެޗު ފެށީ ހަމަލާތައް އުފެއްދުމަށް ބޮޑު އިސްކަމެއްދީގެންނެވެ. ނަމަވެސް މެޗުގެ އޮއިވަރު ބަދަލުވީ 29 ވަނަ މިނިޓްގައެވެ. ބްރެޒިލްގެ ކެޕްޓަން ޑެނީލޯއަށް ހެދުނު ގޯހަކުން މެދުތެރެއިން ގެއްލުނު ބޯޅައެއް ހިފައިގެން ގޮސް، ކަސެމީރޯ ކައިރިން ނައްޓާލުމަށްފަހު އޭރިއާ ބޭރުން ގޯލުގެ ތިރީ ކަނަށް އަމާޒުކޮށްލައިގެން ކައީޝޫ އަސާނޯ ވަނީ ހިތްގައިމު ގޯލެއް ޖަހައި ޖަޕާނަށް ލީޑު ނަގައިދީފައެވެ. މި ބޯޅަ ހުއްޓުވަން ބްރެޒިލްގެ ކީޕަރު އެލިސަން ބެކާ ކުރި މަސައްކަތް ކާމިޔާބެއްނުވިއެވެ.
ބްރެޒިލް ކޮޅަށް ލަނޑު ޖެހުމަށްފަހު ޖަޕާނުގެ ކައީޝޫ އަސާނޯ--
ފުރަތަމަ ހާފު ނިމުނުއިރު ބްރެޒިލަށް މާ އެދެވޭ ކުޅުމެއް ނުދެއްކުނު ނަމަވެސް، ދެވަނަ ހާފަށް އެޓީމު ނުކުތީ މުޅިން ތަފާތު ރޫހެއްގައެވެ. ކޯޗު އަންޗެލޮޓީ ވަނީ ފުރަތަމަ ހާފުގެ ފަހުކޮޅު އަނިޔާވި ލޫކަސް ޕަކޭޓާގެ ބަދަލުގައި ޒުވާން ހުނަރުވެރި އެންޑްރިކް ކުޅެން އަރުވައި، ޓީމުގެ ކުޅުމުގެ ވައްޓަފާޅިއަށް ބަދަލުތަކެއް ގެނެސްފައެވެ.
ޖަޕާނުން ބްރެޒިލްގެ ޕާސިން ގޭމް ހުއްޓުވަން ފެށުމުން، ބްރެޒިލުން ދެން ބޭނުންކުރީ ދެ އަރިމަތިން ހުރަސްތައް ނެގުމުގެ އުކުޅެވެ. އެގޮތުން ދެވަނަ ހާފުގައި އެކަނިވެސް އެޓީމުން 28 ހުރަސް ޖަޕާނުގެ އޭރިއާ ތެރެއަށް ފޮނުވާލިއެވެ.
މެޗުގެ 56 ވަނަ މިނިޓްގައި ބްރެޒިލުން ނަތީޖާ ހަމަހަމަކުރިއެވެ. ގަބްރިއެލް ނަގައިދިން ހިތްގައިމު ހުރަހަކަށް އަރައި، މެންޗެސްޓާ ޔުނައިޓެޑްގެ މިޑްފީލްޑަރު ކަސެމީރޯ ވަނީ ބޮލުން ގޯލުގެ ތެރެއަށް ފޮނުވާލާފައެވެ. މި ލަނޑާއެކު ކަސެމީރޯ ވެފައިވަނީ ބެބޭޓޯއަށް ފަހު ވޯލްޑް ކަޕެއްގައި ބްރެޒިލަށް ލަނޑު ޖަހައިދިން އެންމެ ދުވަސްވީ ކުޅުންތެރިޔާއަށެވެ.
ބްރެޒިލްގެ ކަސެމީރޯ ބޮލުން ގޯލު ޖަހަނީ--
ނަތީޖާ ހަމަހަމަވިތާ ދެ މިނިޓް ފަހުން ބްރެޒިލަށް ލީޑުނަގަން ރަން ފުރުސަތެއް ލިބުނެވެ. ވިނީޝިއުސް ޖޫނިއާ ޖަޕާނުގެ ޑިފެންޑަރުން ކައިރިން ރީތިކޮށް ނައްޓާލުމަށްފަހު ފޮނުވާލި ހަމަލާ، ޖަޕާނުގެ ކީޕަރު ސުޒޫކީ ވަނީ ދިފާއުކޮށްފައެވެ.
މެޗުގެ ފުރިހަމަ ވަގުތު ހަމަވެގެން އިތުރު ވަގުތުގެ ގޮތުގައި ދެއްކި 6 މިނިޓުގެ ތެރެއިން 95 ވަނަ މިނިޓުގައި މާޓިނެލީ ބްރެޒިލަށް ލީޑު ނަގައިދިނެވެ. މާޓިނެލީ ވަނީ ހަމަޖެހިލާފައި ބޯޅަ ކޮންޓްރޯލްކުރުމަށްފަހު، ގޯލުގެ އަރިމަތީ ދަނޑީގައި ޖައްސާފައި ގޯލުގެ ތެރެއަށް ފޮނުވާލައިގެން ބްރެޒިލް މޮޅުކޮށްދީފައެވެ.
މި ނަތީޖާއާއެކު މުބާރާތުގެ ކުއާޓާ ފައިނަލަށް ދިއުމަށްޓަކައި ކާލޯ އަންޗެލޮޓީގެ ބްރެޒިލް ދެން ވާދަކުރަން ޖެހޭނީ ނޯވޭ ނުވަތަ އައިވަރީ ކޯސްޓާއެވެ.