މި ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫޢުތަކުގެ ދަށުން ފްލެޓަށް އެދި ފޯމު ހުށަހަޅާފައިވާ ފަރާތްތަކުގެ ތެރެއިން ފްލެޓް ލިބޭ މީހުން ކަނޑައަޅައި، މި އަހަރުގެ ތެރޭގައި އެކަން އަންގާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިއުލާނުކުރައްވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން ރައީސް ވިދާޅުވީ، ބޯހިޔާވަހިކަން ފޯރުކޮށްދިނުމަކީ މި ސަރުކާރުގެ އެންމެ ބޮޑު ވަޢުދު ކަމަށްވާތީ، އެ މަސައްކަތް ކުރިއަށް ގެންދަނީ ވަރަށް ބޮޑު ސަމާލުކަމެއް ދީގެން ކަމަށެވެ. އަދި މިކަމަކީ އެތައް ހާސް ރައްޔިތުންނެއްގެ ދިރިއުޅުމާ ގުޅިފައިވާ ހައްސާސް ކަމަކަށް ވާތީ، އެއްވެސް ކަހަލަ ނުފޫޒެއް މިކަމުގެ ތެރެއަށް ވަނަނުދީ ކުރިއަށް ގެންދާނެ ކަމުގެ ޔަޤީންކަން ރައީސް ދެއްވިއެވެ.
"އިރާދަކުރެއްވިއްޔާ މިސަރުކާރުންދޭ އެއްވެސް ބޯހިޔާވަހިކަމަކީ ވަކި މީހެއްގެ މީހަކަށް ވީތީވެ ލިބޭ އެއްޗަކަށް ނުވާނެ. އެ ޔަގީންކަން އަޅުގަނޑު ދެން. މިސަރުކާރުންދޭ ގޯއްޗެއް ވިޔަސް ފްލެޓެއް ވިޔަސް ދޭނީ އެމީހާއަށް ހައްގުވީމަ އެމީހާގެ ހައްގު އަދާކުރުމުގެ ގޮތުން،" ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ފްލެޓަށް ކުރިމަތިލާފައިވާ ފަރާތްތަކުން ހުށަހަޅާފައިވާ ތަފްސީލްތައް ރަނގަޅަށް ވެރިފައިކޮށް، ކަނޑައަޅާފައިވާ އުސޫލުތަކާ އެއްގޮތަށް ޕޮއިންޓް ހަމަވާ ތަރުތީބުން ފްލެޓް ލިބޭނެ ކަމަށެވެ. އަދި މި އަހަރުގެ ތެރޭގައި ފްލެޓް ލިބޭ ފަރާތްތަކުގެ ލިސްޓު ނެރެ، ކޮންމެ މީހަކަށް ލިބެނީ ކޮން މަޝްރޫޢެއްގެ ދަށުން ކޮން ފްލެޓެއްކަންވެސް އެނގޭނެހެން ތަފްސީލުތައް ހާމަކުރައްވާނެ ކަމަށް ވިދާޅުވިއެވެ.
މާލޭ ސަރަހައްދުގައި އެޅޭ ފްލެޓްތަކުގެ މަސައްކަތާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ޖުލައި މަހުގެ ތެރޭގައި ގިނަ އިމާރާތްތަކުގެ ކޮންކްރީޓް ފައުންޑޭޝަންގެ މަސައްކަތް ފެށިގެންދާނެ ކަމަށެވެ. އަދި 2028 ވަނަ އަހަރުގެ މޭ، ޖޫން ނުވަތަ ޖުލައި ހިސާބުގައި މާލޭ ސަރަހައްދުގައި އެޅޭ ހުރިހާ ފްލެޓެއް ނިމޭނެ ކަމުގެ ފުރިހަމަ ޔަޤީންކަން އަރުވާ ކަމަށް ވެސް ރައީސް ވިދާޅުވިއެވެ.
ނުފޫޒާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ކުރީގައި ކަންކަން ހިނގާފައި އޮތް ގޮތާ ޚިލާފަށް، މިހާރު އެއްވެސް ވަޒީރަކަށް ނުވަތަ މަޖިލިސް މެންބަރަކަށްވެސް ފްލެޓް ދިނުމުގައި ނުފޫޒު ނުފޯރުވޭނެ ކަމަށެވެ.
"ވަރަށް ހަމަ ފުލް އިންޓެގްރިޓީއާ އެކީގަ މިކަން އަޅުގަނޑުމެން ކުރަނީ. ހަމަ ނަގަންޖެހޭ ވަގުތު ނަގައިގެން ރަނގަޅަށް ބަލައިގެން މިކަން ކުރަނީ،" ރައީސް ވިދާޅުވިއެވެ.
މީގެ އިތުރުން ގޯތި ދިނުމުގެ މަޝްރޫޢާ ގުޅޭގޮތުން ރައީސް ވިދާޅުވީ، ތެލުގެ އަގު ބޮޑުވުމާ ގުޅިގެން މަސައްކަތަށް ކުޑަ މަޑުޖެހުމެއް އައި ނަމަވެސް، މިހާރު އަނެއްކާވެސް މަސައްކަތް އަލުން ކުރަމުންދާ ކަމަށެވެ. އަދި އަމާޒަކީ މި އަހަރު ނިމުމުގެ ކުރިން އެ މަސައްކަތްތައް ވެސް ނިންމާލުން ކަމަށް ރައީސް ހާމަކުރެއްވިއެވެ.
ސަރުކާރުން ބޯހިޔާވަހިކަމުގެ މައްސަލައަށް ހައްލެއް ހޯއްދަވައިދެއްވުމަށް ހުޅުވައިލި ތިން ސްކީމަކަށް މުއްދަތު ހަމަވިއިރު ޖުމްލަ 58،505 ،ފޯމު ހުށަހަޅާފައިވާ ކަމަށް ހައުސިން މިނިސްޓްރީން ހާމަކޮށްފައިވެއެވެ.
ސްކީމްތަކަށް ފޯމު ހުށަހަޅާފައިވާ ގޮތުގެ ތަފްސީލު:.
- އާއިލީ ބޯހިޔާވަހިކަން: މި ސްކީމަށް ޖުމްލަ 45،644 ފޯމު ހުށަހަޅާފައިވާއިރު، މީގެ ތެރޭގައި ހިމެނެނީ ފްލެޓަށް އެދި ހުށަހެޅި 35،818 ފޯމާއި ބިމަށް އެދި ހުށަހެޅި 9،826 ފޯމެވެ.
- ގޯތިގެދޮރު ސްކީމް: މި ސްކީމަށް ޖުމްލަ 12،861 އެޕްލިކޭޝަން ލިބިފައިވެއެވެ. އޭގެ ތެރޭގައި ހިމެނެނީ ބިމަށް އެދި ހުށަހެޅި 12،749 ފޯމާއި ފްލެޓަށް އެދި ހުށަހެޅި 112 ފޯމެވެ.