ފީފާ ވޯލްޑް ކަޕް ފުޓްބޯޅަ މުބާރާތުގެ ގްރޫޕް ޖީގެ ފަހު މެޗުތައް ނިމުނުއިރު، ނިއު ޒީލެންޑް އަތުން 5-1 ގެ ބޮޑު މޮޅެއް ހޯދައި ބެލްޖިއަމުން ގްރޫޕްގެ އެއްވަނަ ކަށަވަރުކުރިއިރު، އީރާނާ 1-1 އިން އެއްވަރުވެ، މިސްރުން ވެސް ވަނީ އެ ގައުމުގެ ފުޓްބޯޅަ ތާރީޚުގައި ފުރަތަމަ ފަހަރަށް ވޯލްޑް ކަޕްގެ ދެވަނަ ބުރަށް ދަތުރުކޮށްފިއެވެ.
މިއީ މީގެ ކުރިން ވޯލްޑް ކަޕްގެ މެޗަކުން މޮޅެއްވެސް ލިބިފައިނުވާ މިސްރަށް ލިބުނު ވަރަށް ބޮޑު ތާރީޚީ ކާމިޔާބީއެކެވެ. ގްރޫޕްގެ ކުޅުން ނިމުނުއިރު ބެލްޖިއަމް އަދި މިސްރަށްވެސް ލިބިފައިވަނީ ފަސް ޕޮއިންޓެވެ.
ބެލްޖިއަމަށް ކުރިލިބުނީ ފައިދާ ލަނޑުގެ ތަފާތުންނެވެ. ތިންވަނައަށް ދިޔަ އީރާނަށް ތިން ޕޮއިންޓް ލިބިފައިވާއިރު، އެޓީމަށް ދެވަނަބުރުގެ ޖާގައެއް ލިބުން ބިނާވަނީ އެންމެ ރަނގަޅު ނަތީޖާ ނެރޭ ތިންވަނަ ޓީމުތަކުގެ ތެރޭގައި ހިމެނިގެންނެވެ. ނިއު ޒީލެންޑް މުބާރާތް ނިންމާލީ އެންމެ ޕޮއިންޓަކާއެކުގައެވެ.
މިސްރުން ވަނީ އީރާނާ ދެކޮޅަށް ކުޅުނު މެޗުގެ ފެށުން ވަރުގަދަކޮށް، 5 ވަނަ މިނެޓުގައި މުހައްމަދު ސަލާހު ތަނަވަސްކޮށްދިން ފުރުސަތަކުން މުހައްމަދު ސަބޭރު ޖެހި ގޯލުން ލީޑުނަގާފައެވެ. ސަބޭރު ފޮނުވާލި ބޯޅަ ގޯލަށް ވަނީ އީރާންގެ ގޯލްކީޕަރު އަލީ ރެޒާ ބީރަންދުވާންދު ފައިދަށުންނެވެ.
އީރާން ކޮޅަށް ލަނޑު ޖެހުމަށްފަހު މިސްރުގެ ސަލާހު އަދި ސަބޭރު--
އޭގެފަހުން 11 ވަނަ މިނެޓުގައި އީރާންގެ ކެޕްޓަން މަހުދީ ތަރޭމީއަށް ކުރި ފައުލަކަށް ލިބުނު ޕެނަލްޓީ މިސްރުގެ ކީޕަރު މުސްތަފާ ޝުބޭރު ދިފާއުކުރި ނަމަވެސް، އޭގެ ތިން މިނެޓުފަހުން ޝުބޭރު އަތުގައި ޖެހިފައި ނުކުތް ރީބައުންސް ބޯޅަ ހަނި އޭންގަލުން ގޯލަށް ބޯޅަ ފޮނުވާލައިގެން ރަމީ ރެޒައީން ވަނީ އީރާނަށް އެއްވަރުކޮށްދީފައެވެ.
ދެވަނަ ހާފުގައި މިސްރުގެ މަހުމޫދު ޓްރެޒެގޭ ޖެހި ޝޮޓެއް ބްލޮކްވިއިރު، މެޗުގެ އިތުރުވަގުތުގައި އީރާންގެ ޝޯޖޭ ހަލީޒާދޭ ޖެހި ގޯލެއް ވީއޭއާރުން ވަނީ އޮފްސައިޑް ކަމަށް ނިންމާފައެވެ.
ފުރަތަމަ ދެ މެޗުގެ ފާޑުކިޔުންތަކަށްފަހު، ރޫޑީ ގާސިޔާގެ ބެލްޖިއަމުން ވަނީ ނިއު ޒީލެންޑާ ދެކޮޅަށް ވަރަށް މޮޅު އަދި ތަފާތު ކުޅުމެއް ދައްކާފައެވެ. މި މެޗުގެ ކުރީކޮޅު ބެލްޖިއަމަށް ދޭން ނިންމި ޕެނަލްޓީއެއް ވީއޭއާރުން ބަލައި، އަތުގައި ބޯޅަ ނުޖެހޭތީ ކެންސަލްކުރިއެވެ.
ބެލްޖިއަމާއި ނިއު ޒީލެންޑް ބައްދަލުކުރި މެޗުގެ ތެރެއިން--
ނަމަވެސް 28 ވަނަ މިނެޓުގައި ކެވިން ޑި ބްރޭނާގެ ކޯނަރަކުން ލެއަންޑްރޯ ޓްރޮސާޑް ވަނީ ބެލްޖިއަމްގެ ފުރަތަމަ ލަނޑު ޖަހައިދީފައެވެ. މިއީ 2022 ވަނަ އަހަރު މިޝީ ބަޓްޝުއާޔީ ލަނޑު ޖެހިފަހުން، ވޯލްޑް ކަޕެއްގައި ބެލްޖިއަމްގެ ކުޅުންތެރިއަކު ޖެހި ފުރަތަމަ ލަނޑެވެ. މިފަހަރުގެ ފުރަތަމަ ދެ މެޗުގައި އެ ޓީމަށް ލިބުނު ހަމައެކަނި ގޯލަކީ މިސްރު މެޗުގައި ބައިކޮޅަށް ވަން ގޯލެކެވެ.
ފުރަތަމަ ހާފާ ހިލާފަށް ދެވަނަ ހާފުގެ އެޓޭކުގައި ބެލްޖިއަމުން ހަމަޖެހިލައިގެން ކުޅެ ތަނަވަސްކުރި ފުރުސަތުތަކުގެ ބޭނުން ވަރަށް ރަނގަޅަށް ހިފިއެވެ. ދެވަނަ ހާފު ފަށައިގެން ޓްރޮސާޑް އޭނާގެ ދެވަނަ ލަނޑާއެކު ލީޑު ފުޅާކޮށްދިންއިރު، 66 ވަނަ މިނެޓުގައި ޑި ބްރޭނާ ވަނީ ތިންވަނަ ލަނޑު ކާމިޔާބުކޮށްފައެވެ. މިއީ ޑި ބްރޭނާ ލަނޑުޖެހި 4 ވަނަ ވޯލްޑް ކަޕެވެ.
ނިއު ޒީލެންޑްގެ އެލީޖާ ޖަސްޓް ލަނޑެއް ޖަހައި ސުންކަނޑުވައިދިން ނަމަވެސް، އޭގެ އެންމެ 56 ސިކުންތުފަހުން ބެންޗުން އެރި ރޮމެލޫ ލުކާކޫ ވަނީ ބޮލުން ބެލްޖިއަމްގެ ހަތަރުވަނަ ލަނޑު ޖަހާފައެވެ. އަދި އިތުރު ވަގުތުގައި އަލެކްސިސް ސަލަމޭކާ ވަނީ ބެލްޖިއަމްގެ ފަސްވަނަ ލަނޑު ޖަހައި މެޗު ނިންމާލާފައެވެ.
ގްރޫޕްގެ އެއްވަނަ ހޯދުމާއެކު ދެވަނަ ބުރުގައި ބެލްޖިއަމް ވާދަކުރަން ޖެހޭނީ އެހެން ގްރޫޕްތަކުން ތިންވަނައަށްދާ އެންމެ ރަނގަޅު ޓީމުތަކުގެ ތެރެއިން ޓީމަކާއެވެ.