"އަހަރެން ކުޅެނީ ފައިން، ދަތްދޮޅިއަކުން ނޫން" މިއީ 2026 ގެ ފީފާ ވޯލްޑް ކަޕްގެ ދަނޑުތަކުގައި އިންގްލެންޑް ސަޕޯޓަރުންގެ ކިބައިން އިވޭ އެންމެ އަސަރުގަދަ އަދި ހިތްވަރުގަދަ ބަސްތަކުގެ ތެރެއިން އިނގިރޭސި މީޑިއާތަކުގައި އަދިވެސް ވާހަކަދައްކަމުން އަންނަ ބަސްކޮޅެކެވެ.
މޫނުމަތީގައި އަޅާފައިވާ ޚާއްސަ ޕްރޮޓެކްޓިވް މާސްކާއެކު، އިންގްލެންޑުގެ ހުދު ޖަރޒީގައި ދަނޑުމަތިން އެ ފެންނަނީ ހަމައެކަނި ހުނަރުވެރި ޑިފެންޑަރެއް ނޫނެވެ. އެއީ އިނގިރޭސި ފުޓްބޯޅައިގެ ތާރީޚީ ސަފުހާތައް ބަދަލުކޮށްލި، ތޯމަސް ޓުޗެލްގެ ސްކޮޑުން ޖާގަ ހޯދި އިންގްލެންޑް ގައުމީ ޓީމުގެ ފުރަތަމަ މުސްލިމް ވޯލްޑް ކަޕް ކުޅުންތެރިޔާ—ޖެޑް ސްޕެންސް އެވެ.
މިފަހަރުގެ ވޯލްޑް ކަޕުގައި ކްރޮއޭޝިއާއާއި ދެކޮޅަށް އިންގްލެންޑު ކުޅުނު ފުރަތަމަ މެޗުގައި ބަދަލު ކުޅުންތެރިއެއްގެ ގޮތުގައި އޭނާ ވަނީ 11 މިނެޓަށް ދަނޑުމަތީގައި ފެނިފައެވެ. އެއާއެކު އޭނާ ވެފައިވަނީ ވޯލްޑް ކަޕެއްގައި އިންގްލެންޑް ތަމްސީލުކޮށް ކުޅެން އެރި ފުރަތަމަ މުސްލިމް ކުޅުންތެރިޔާއަށެވެ.
ޖެޑް ސްޕެންސްގެ ފާހަގަކޮށްލެވޭ ތާރީޚީ ކާމިޔާބީތަކަށް ބަލާއިރު، ޓޮޓްހަމް ހޮޓްސްޕާގެ މި ހުނަރުވެރި ޑިފެންޑަރު ބައިނަލްއަގުވާމީ ފުޓްބޯޅައިގެ ތާރީޚުން ޖާގަ ހޯދީ ސެޕްޓެމްބަރު 2025 ގައި ސާބިއާއާ ދެކޮޅަށް ކުޅުނު މެޗުންނެވެ.
އެއީ އިންގްލެންޑުގެ ސީނިއާ ގައުމީ ޓީމަށް އޭނާ ކުޅެދިން ފުރަތަމަ މެޗެވެ. އަދި މިހާރު ކުރިއަށްދާ ފީފާ ވޯލްޑް ކަޕް 2026 ގެ އިންގްލެންޑް ސްކޮޑުގައި ހިމެނި، ވޯލްޑް ކަޕެއްގައި ވާދަކުރާ ފުރަތަމަ މުސްލިމް ކުޅުންތެރިޔާގެ ޝަރަފުވެރި ރެކޯޑުވެސް އޭނާ ވަނީ ހާސިލްކޮށްފައެވެ.
ފީފާ ވޯލްޑް ކަޕް 2026 ގައި ފޭސް މާސްކު އަޅައިގެން ސްޕެންސް ކްރޮއޭޝިއާ އާއި ދެކޮޅަށް ކުޅެނީ--
ގޮންޖެހުންތަކުން ފުރިގެންވީ ދަތުރެއް: ކެރިއަރުގައި ހުސް ޗެލެންޖް
ލަންޑަނަށް އުފަން، ކެންޔާގެ މަންމައަކާއި ޖެމެއިކާގެ ބައްޕައަކަށް ލިބުނު ސްޕެންސްއަށް އެ ދެ ގައުމުން ކުރެ ގައުމަކަށް ކުޅުމުގެ ފުރުސަތު އޮތެވެ. ނަމަވެސް އޭނާ އިޚްތިޔާރުކުރީ އޭނާ ބޮޑުވި އިންގްލެންޑެވެ.
ސްޕެންސްގެ ފުޓްބޯޅަ ހަޔާތަކީ ފަސޭހަ ދަތުރެއް ނޫނެވެ. ފުލަމްގެ އެކަޑަމީން ފަށައި، މިޑްލްސްބްރާގައި ވިދާލުމަށްފަހު ޓޮޓްނަމްއާ ގުޅުނު ނަމަވެސް، އޭނާއަށް ކުރިމަތިވީ ގިނަ ފާޑުކިޔުންތަކެކެވެ.
ރެންސް، ލީޑްސް، އަދި ޖެނޯއާ ފަދަ ކްލަބްތަކަށް ލޯނު އުސޫލުން ކުޅެންޖެހި، ކެރިއަރުގައި ބާކީވުމުގެ ބިރު ހީވި ވަގުތުތައް މަދެއް ނޫނެވެ. ނަމަވެސް، ނާއުއްމީދުގެ އަނދިރިކަމުގެ ތެރެއިން އޭނާ ދެން ނިކުތީ މާ ވަރުގަދަކޮށެވެ. ހިތްވަރާއެކު ހަނގުރާމަކޮށް، ޓޮޓްނަމްގެ ފުރަތަމަ އެގާރައިން ޖާގަ ހޯދައި، އެންމެ ފަހުން ގައުމީ ޓީމުގެ ރަތް ދޫލައާ ހަމައަށް އޭނާ ދަތުރުކުރިއެވެ.
"އެންމެ ފުރަތަމަ ކަމަކީ ﷲ": އީމާންތެރިކަމުގެ ވަރުގަދަ އަސާސް
ސްޕެންސްގެ ކާމިޔާބީގެ އެންމެ ބޮޑު ސިއްރަކީ ކޮބައިތޯއެވެ؟ އެއީ އޭނާގެ ހިތުގައި އިސްލާމްދީނަށް އޮތް ލޯތްބެވެ. ސޯޝަލް މީޑިއާގައި އަބަދުވެސް ﷲ އަށް ޙަމްދުކުރާ ސްޕެންސް، ގައުމީ ޓީމުން ޖާގަ ލިބުމުން ބުނެފައިވެއެވެ:
"އެންމެ ފުރަތަމަ ކަމަކީ ﷲ އީ އެންމެ އިސްފަރާތް. އަހަރެން ވަރަށް ގިނައިން ދުޢާކުރަން. އަހަރެންގެ ހަޔާތުގެ އެންމެ އަނދިރި، އެންމެ އުނދަގޫ ވަގުތުތަކުގައިވެސް ﷲ އަހަރެންގެ އަރިހުގައި ވޮޑިގެންވާކަން އަހަރެން ގަބޫލުކުރިން."
އިންގްލެންޑުގެ ފުރަތަމަ މުސްލިމް ވޯލްޑް ކަޕް ކުޅުންތެރިޔާގެ ޝަރަފު ލިބުމަކީ ބޮޑު ބަރަކާތެއްގެ ގޮތުގައި ސިފަކުރަމުން އޭނާ ބުނީ، މިއީ މުޅި ދުނިޔޭގެ ކުޑަކުދިންނަށް، ހާއްސަކޮށް މުސްލިމް ކުދިންނަށް އަޒުމް ވަރުގަދަނަމަ ކާމިޔާބުވާނެކަމުގެ ދިރިހުރި މިސާލެއް ކަމަށެވެ.
ބިނދިފައިވާ ދަތްދޮޅިއާއި ފޭސް މާސްކް: ކެރިއަރުގައި ކުރިއަށްދާން ހުރަހަކަށް ނުވި
ފީފާ ވޯލްޑް ކަޕް 2026 ގައި ފޭސް މާސްކު އަޅައިގެން ސްޕެންސް---
2026 ގެ ވޯލްޑް ކަޕްގެ ހުވަފެން ހަގީގަތަކަށް ވާން ކުޑަތަންވެފައި ވަނިކޮށް، މޭ މަހު ޗެލްސީއާ ދެކޮޅަށް ކުޅުނު މެޗެއްގައި ސްޕެންސްގެ ދަތްދޮޅި ބިނދިގެންދިޔައެވެ. މިއީ ކޮންމެ ކުޅުންތެރިއަކުވެސް މާޔޫސްވާނެ ފަދަ އަނިޔާއެކެވެ. ނަމަވެސް ސްޕެންސް މާޔޫސެއް ނުވިއެވެ.
މިއަދު އޭނާ ވޯލްޑް ކަޕްގެ ސްކޮޑުގައި ފެންނަނީ ޚާއްސަ ޕްރޮޓެކްޓިވް ފޭސް މާސްކެއް އަޅައިގެންނެވެ. ހޫނުގަދަ މާހައުލެއްގައި މާސްކާއެކު ކުޅުމަކީ އުނދަގޫ ކަމެއް ނަމަވެސް، އޭނާގެ އަޒުމަކަށް ބަދަލެއް ނާދެއެވެ.
"އަހަރެން ކުޅެނީ ފައިން، ދަތްދޮޅިއަކުން ނޫން. އެހެންވީމާ ހުރިހާ ކަމެއްވެސް ރަނގަޅުވާނެ،" ސަމާސާ ރޫހެއްގައި، އެކަމަކު ސާބިތުކަމާއެކު ސްޕެންސް ބުންޏެވެ. އޭނާގެ މިހާރުގެ ހަމައެކަނި ފޯކަސްއަކީ އިންގްލެންޑަށް ވޯލްޑް ކަޕްގެ ކާމިޔާބީ ހޯދައިދިނުމެވެ.
ޖެޑް ސްޕެންސްގެ މި ދަތުރަކީ ހަމައެކަނި ފުޓްބޯޅަ ކެރިއަރެއް ނޫނެވެ. މިއީ އީމާންތެރިކަމާއި، ކެތްތެރިކަމާއި، އަދި ހުވަފެންތަކުގައި ކުލަޖެއްސުމަށް ކުރާ ހަނގުރާމައިގެ ލާމަސީލު މިސާލެކެވެ. މާސްކުގެ ފަހަތުން އެ ފެންނަނީ އިނގިރޭސި ފުޓްބޯޅައިގެ އާ ތާރީޚެވެ. އަދި މުސްލިމް ފުޓުބޯޅަ ކުޅުންތެރިންނަށް އުންމީދެކެވެ.