އެމެރިކާގެ ބޮސްޓަން ސްޓޭޑިއަމްގައި ކުޅުނު މިއަހަރުގެ ވޯލްޑް ކަޕްގެ ފުރަތަމަ މެޗުގައި، ހުނަރުވެރި ފޯވާޑް އާލިންގ ހާލަންޑްގެ މޮޅު ކުޅުމާއެކު ނޯވޭއިން 1-4 ގެ ނަތީޖާއަކުން އިރާގު ބަލިކޮށްފިއެވެ.
މިއީ ގިނަ އަހަރުތަކަކަށްފަހު މި ދެ ގައުމުންވެސް ވޯލްޑް ކަޕްގައި ކުޅުނު ފުރަތަމަ މެޗަށްވާއިރު، މި ކާމިޔާބީއަކީ ނޯވޭގެ ވޯލްޑް ކަޕް ތާރީޚުގައި އެ ގައުމުން ހޯދި ތިންވަނަ މޮޅެވެ.
މި މޮޅާއެކު ގްރޫޕް އައިގެ އެއްވަނަ މަގާމު ނޯވޭއަށް ލިބިފައިވާއިރު، މި މޮޅަކީ އެމެރިކާގެ ފަސްގަނޑުގައި ނޯވޭއިން ހޯދި ދެވަނަ ވޯލްޑް ކަޕް މޮޅެވެ.
މެޗުގެ ފުރަތަމަ ލަނޑު ޖަހައި ނޯވޭއަށް ކުރިހޯދައިދިނީ އާލިންގ ހާލަންޑްއެވެ. މި ހަމަލާގައި ނޯވޭގެ ކުޅުންތެރިން 14 ޕާސް ބަދަލުކުރުމަށްފަހު، ޑޭވިޑް މޮލާ ވޮލްފް ނަގައިދިން ހުރަހަކުން ހާލަންޑް ވަނީ ގޯލުގެ ތެރެއަށް ބޯޅަ ފޮނުވާލާފައެވެ.
އިރާގުން މެޗުގެ ނަތީޖާ ހަމަހަމަކުރީ ތަޖުރިބާކާރު ފޯވާޑް އައިމަން ޙުސައިންގެ ގޯލުންނެވެ. އޭނާ މި ލަނޑު ޖެހީ އާމިރު އަލް އަންމާރީ ތަނަވަސްކޮށްދިން ފުރުސަތެއްގައި ބޮލުން ފޮނުވާލި ބާރު ހަމަލާއަކުންނެވެ. މިއީ ވޯލްޑް ކަޕް ތާރީޚުގައި އިރާގުން ޖެހި ދެވަނަ ލަނޑެވެ.
ފުރަތަމަ ހާފު ނިމުމުގެ ކުރިން ނޯވޭއަށް ދެވަނަ ފަހަރަށް ކުރިހޯދައިދިނީ ވެސް ހާލަންޑްއެވެ. އިރާގުގެ ޑިފެންޑަރު ޒައިދު ތަހުސީން އާއި ކީޕަރު ޖަލާލް ހަސަންއަށް ހެދުނު ގޯހެއްގެ ފައިދާ ނަގައި ހާލަންޑް ވަނީ އޭނާގެ ދެވަނަ ލަނޑު ކާމިޔާބުކޮށްފައެވެ.
ބަދަލު ކުޅުންތެރިއެއްގެ ގޮތުގައި ކުޅެން އެރިތާ އެންމެ ތިން މިނެޓު ތެރޭގައި ލިއޯ އޮސްޓިގާޑް ވަނީ ނޯވޭގެ ތިންވަނަ ލަނޑު ބޮލުން ޖަހާފައެވެ.
މެޗުގެ އިތުރު ވަގުތުގެ ތެރޭގައި އިރާގުގެ އައިމަން ޙުސައިން އަތުން ބައިކޮޅަށް ވަން ގޯލާއެކު ނޯވޭއިން މެޗު ނިންމާލީ 1-4 ގެ ބޮޑު މޮޅަކުންނެވެ.
ފީފާ ވޯލްޑް ކަޕް 2026 ގައި ނޯވޭއާއި އިރާގު ބައްދަލުކުރި މެޗުގެ ތެރެއިން--
އެ ގައުމުން އެންމެ ފުރަތަމަ ވޯލްޑް ކަޕް މެޗަކުން މޮޅުވީ 1994 ވަނަ އަހަރު އެމެރިކާގައި ބޭއްވި މުބާރާތުގައި މެކްސިކޯއާ ވާދަކޮށް 0-1 އިންނެވެ. އެއަށްފަހު 1998 ވަނަ އަހަރު ފްރާންސްގައި ބޭއްވި ވޯލްޑް ކަޕްގައި އެއިރުގެ ދުނިޔޭގެ ޗެމްޕިއަން ބްރެޒިލް 1-2 އިން ބަލިކޮށް ނޯވޭއިން ދެވަނަ ބުރަށް ދަތުރުކުރިއެވެ.
ނަމަވެސް އޭގެފަހުން ވޭތުވެދިޔަ 28 އަހަރު ދުވަހު ވޯލްޑް ކަޕުން ޖާގަ ނުލިބި އޮތުމަށްފަހު، މިއަހަރު މުބާރާތް 48 ޓީމަށް އިތުރުކުރުމުން ނޯވޭއަށް ވަނީ އަލުން ދުނިޔޭގެ އެންމެ ބޮޑު ފުޓްބޯޅަ މުބާރާތުން ފުރުސަތު ލިބިފައެވެ.
ނޯވޭއަށް މިހާރު އޮތް އެންމެ ބޮޑު ގޮންޖެހުމަކީ ގްރޫޕް ސްޓޭޖުގައި ދެން އޮތް ސެނެގާލް އަދި ފްރާންސް މެޗުތަކުން ރަނގަޅު ނަތީޖާއެއް ހޯދައި، އެ ގައުމުގެ ތާރީޚުގައި ދެވަނަ ފަހަރަށް ނޮކައުޓް ބުރަށް ކޮލިފައިވުމެވެ.
މީގެ ކުރިން ނޯވޭގެ ވޯލްޑް ކަޕް ތާރީޚުގައި އަބަދުވެސް ހުރަހަކަށްވަމުން އައީ އިޓަލީއެވެ. އެގޮތުން 1938، 1994 އަދި 1998 ވަނަ އަހަރުގެ މުބާރާތްތަކުން ނޯވޭ ކެޓީ އިޓަލީ އަތުން ބަލިވުމުންނެވެ.