ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ ލިއޮނަލް މެސީ، އޭނާގެ އުމުރުން 38 އަހަރުގައި އަލްޖީރިއާ ކޮޅަށް ޖެހި ހެޓްރިކާއެކު ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާގެ ގޮތުގައި އޮތް ޖަރުމަނުގެ މިރޮސްލާވް ކްލޯޒާއާ އަރާ ހަމަކޮށްފިއެވެ.
މިއަހަރުގެ ވޯލްޑް ކަޕުގައި އާޖެންޓީނާ ކުޅުނު ފުރަތަމަ މެޗުގައި އަލްޖީރިއާ ކޮޅަށް މެސީ ހެދި ފުރިހަމަ ހެޓްރިކާއެކު، އޭނާ ވަނީ ވޯލްޑް ކަޕްގައި ޖެހި ލަނޑުގެ އަދަދު 16 އަށް ބަދަލުކޮށްފައެވެ. މިއީ މެސީ ފުރަތަމަ ވޯލްޑް ކަޕް ހެޓްރިކެވެ.
މިކާމިޔާބީއާއެކު 15 ލަނޑާއެކު އޮތް ބްރެޒިލްގެ ލެޖެންޑް ރޮނާލްޑޯ ނަޒާރިއޯ އަދި 14 ލަނޑާއެކު އޮތް ފްރާންސްގެ ކީލިއަން އެމްބާޕޭ ފަހަތަށް ޖައްސާލުމަށްފަހު، މެސީ މިވަނީ ދުނިޔޭގެ އެންމެ ބޮޑު މުބާރާތުގެ ރެކޯޑުގެ އެންމެ ކުރިއަށް ޖެހިލާފައެވެ.
ކެންސަސް ސިޓީ ސްޓޭޑިއަމުގައި އަލްޖީރިއާއާ ދެކޮޅަށް ކުޅުނު ފޯރިގަދަ މެޗުގައި ލިއޮނަލް މެސީ ފުރަތަމަ ލަނޑު ކާމިޔާބުކުރި ތާރީޚީ ހެޓްރިކް ފެށީ މެޗުގެ 17 ވަނަ މިނެޓުގައެވެ.
ދެވަނަ ލަނޑު ފެނިގެންދިޔައީ އާޖެންޓީނާގެ މިޑްފީލްޑަރު އެލެކްސިސް މެކް އެލިސްޓާ އޭރިއާ ތެރެއިން ފޮނުވާލި ވަރުގަދަ ހަމަލާއެއް އަލްޖީރިއާގެ ކީޕަރު ދިފާއުކުރި ވަގުތުއެވެ. މިއީ ކީޕަރު އަތުގައި ޖެހިފައި ރީބައުންސްވެގެން ނިކުތް ބޯޅައަށް، މެސީ ވަރަށް ފަސޭހަކަމާއެކު ގޯލުގެ ތެރެއަށް ފޮނުވާލައިގެން ކާމިޔާބުކުރި ލަނޑެކެވެ.
މެސީގެ ދެވަނަ ލަނޑާއެކު އޭނާ ވަނީ މެޗުގެ ފޯރި އިތުރަށް ގަދަކޮށްފައެވެ. މެޗުގެ 60 ވަނަ މިނެޓުގައި ކާމިޔާބުކުރި މި ލަނޑާއެކު މެސީ ވަނީ ވޯލްޑް ކަޕްގެ ތާރީޚުގައި ބްރެޒިލްގެ ލެޖެންޑް ރޮނާލްޑޯ ނަޒާރިއޯ ޖަހާފައިވާ 15 ލަނޑުގެ ރެކޯޑާ އަރާ ހަމަކޮށް، އޭނާގެ މޮޅުކަން ދުނިޔެއަށް އަނެއްކާވެސް ދައްކާލާފައެވެ.
މި މެޗުގެ އެންމެ ފާހަގަކޮށްލެވޭ އަދި ތާރީޚީ ވަގުތުކޮޅު ފެނިގެންދިޔައީ މެޗުގެ 76 ވަނަ މިނެޓުގައެވެ. މެސީ އޭނާގެ ހެޓްރިކް ފުރިހަމަކޮށް، ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާގެ ގޮތުގައި ޖަރުމަނުގެ މިރޮސްލާވް ކްލޯޒާގެ ރެކޯޑާ ހަމަކުރީ މި ލަނޑާއެކުއެވެ.
އޭނާ މި ލަނޑު ކާމިޔާބުކުރީ އޭރިއާގެބޭރުން ފޮނުވާލި ހިތްގައިމު ހަމަލާއެއް ގޯލުގެ ކަނަށް ބޯޅަ ވައްދާލައިގެންނެވެ. މި ބޮޑު ކާމިޔާބީއަށްފަހު މެޗުގެ 79 ވަނަ މިނެޓުގައި މެސީ ބަދަލުކުރިއިރު، މުޅި ސްޓޭޑިއަމް ތެދުވެ އޭނާއަށް ހޫނު މަރުހަބާއެއް ކިޔެވެ.
މީގެ ކުރިން ނިއު ޖާޒީގައި ކުޅުނު މެޗުގައި ފްރާންސްގެ އެމްބާޕޭ ދެ ލަނޑު ޖަހައި ހެޑްލައިންތައް ހޯދާފައިވަނިކޮށް، އެމެރިކާގެ ފަސްގަނޑުގައި މެސީ ދެއްކި މި މޮޅު ކުޅުމާއެކު އަނެއްކާވެސް ފުޓްބޯޅައިގެ ރަސްގެފާނަކީ އޭނާކަން މުޅި ދުނިޔެއަށް މިވަނީ ސާބިތުކޮށްދީފިއެވެ.