އައިއޯއެސް 27 އާއެކު ސިރީއަށް ތިންވަނަ ފަރާތްތަކުގެ އޭއައި ޗެޓްބޮޓްތައް ގުޅާލެވޭނެކަމަށް ރިޕޯޓްތައް ބުނެފިއެވެ.
ބްލޫމްބާގްގެ މާކް ގާމަންގެ "ޕަވަރު އޮން" ނިއުސްލެޓާގައި ހާމަކޮށްފައިވާ ގޮތުގައި، ދާދިފަހުން ބޭއްވި އެޕަލްގެ ޑަބްލިއުޑަބްލިއުޑީސީ 2026 ކޮންފަރެންސްގައި ދައްކާލި ފީޗަރުތަކުގެ އިތުރުން، އައިއޯއެސް 27 އާ އެކު އައު ތިން ފީޗަރެއް މިއަހަރުގެ ފަހުކޮޅު (ފޯލް ސީޒަންގައި) ތައާރަފްކުރާނެއެވެ.
އޭގެ ތެރޭގައި ހިމެނެނީ މުޅިން އައު ވޮޗް ފޭސްއަކާއި، ބޭނުންގޮތަކަށް ބަދަލުކޮށްލެވޭ ކެމެރާ އެޕްލިކޭޝަނެއްގެ އިތުރުން ސިރީ މެދުވެރިކޮށް ތިންވަނަ ފަރާތްތަކުގެ އޭއައި ޗެޓްބޮޓްތައް ބޭނުންކުރެވޭނެ ގޮތްތަކެކެވެ.
މި ފީޗަރުތައް ކޮންފަރެންސްގައި ދައްކާނުލީ ކީއްވެގެންކަން ސާފުނުވި ނަމަވެސް، މީގެ ތެރެއިން ބައެއް ފީޗަރުތައް މިހާރުވެސް އައިއޯއެސް 27 ގެ ޑިވެލޮޕާ ބީޓާ ވާޝަނުން ފެންނަން އެބަހުއްޓެވެ.
އެޕަލް އިންޓެލިޖެންސް އަށް ޑަބްލިއުޑަބްލިއުޑީސީގައި ބޮޑު ސަމާލުކަމެއް ދީފައިވީ ނަމަވެސް، މި ބަދަލުތަކުގެ ތެރެއިން އެންމެ ފާހަގަކޮށްލެވެނީ ސިރީގެ ތެރެއިން ތިންވަނަ ފަރާތްތަކުގެ ޗެޓްބޮޓްތައް ބޭނުންކުރެވޭނެ ގޮތް ހެދުމަށް އެޕަލް އިން ކުރަމުންދާ މަސައްކަތެވެ. މިގޮތުން ސިރީ ބޭނުންކުރާ ފަރާތްތަކަށް އެޕަލްގެ އަމިއްލަ އޭއައިގެ ބަދަލުގައި ޗެޓްޖީޕީޓީ، ޖެމިނައި ނުވަތަ ކްލޯޑް ފަދަ އެހެން މޮޑެލްތަކަށް ފަސޭހަކަމާއެކު ބަދަލުކޮށްލެވޭނެއެވެ.
މިހާރުގެ އައިއޯއެސް 27 ޑިވެލޮޕާ ބީޓާގައި ހަމައެކަނި ޗެޓްޖީޕީޓީ އަށް ބަދަލުކޮށްލެވުނު ނަމަވެސް، ކުރިއަށް އޮތް ތަނުގައި މި ލިސްޓަށް އިތުރު އޮޕްޝަންތައް އިތުރުވަމުންދާނެ ކަމަށް ރިޕޯޓްތައް ބުނެއެވެ.
މީގެ އިތުރުން، ބަދަލުތައް ގެނެވޭ ކެމެރާ އެޕްލިކޭޝަން ފެނިގެންދާނީ މިއަހަރުގެ ފަހުކޮޅު ބާޒާރަށް ނެރުމަށް ހަމަޖެހިފައިވާ އައިފޯން 18 ޕްރޯ އާއެކުގައެވެ.
މި ފީޗަރު މިހާރުގެ އައިއޯއެސް 27 ޑިވެލޮޕާ ބީޓާ އިން ފެންނަން ނެތް ނަމަވެސް، މި ބަދަލާއެކު ކެމެރާ އެޕްލިކޭޝަންގެ ތަފާތު ފަންކްޝަންތައް ބަހައްޓާނީ ކޮން ތަނެއްގައިތޯ އަމިއްލައަށް ނިންމުމުގެ އިޚްތިޔާރު ޔޫޒަރުންނަށް ލިބިގެންދާނެއެވެ.
އަދި އައު ވޮޗް ފޭސް އާންމުކުރާނީ މިއަހަރުގެ ފަހުކޮޅު އެޕަލް އިން ނެރޭ އައު ސްމާޓްވޮޗްތަކާ އެކުގައެވެ. މީގެ ކުރިން ދެކެވުނު ވާހަކަތަކަށް ބަލާއިރު، މި އައު ވޮޗް ފޭސް ބިނާވެގެންވަނީ ހަމައެކަނި އެޕަލް ވޮޗް އަލްޓްރާ އަށް ޚާއްސަ "މޮޑިއުލާ އަލްޓްރާ" އޮޕްޝަނަށެވެ. ނަމަވެސް މިއީ އެހެން އެޕަލް ވޮޗްތަކަށްވެސް ބޭނުންކުރެވޭނެ ފަދަ ސާދާ ޑިޒައިނަކަށް ތައްޔާރުކުރާ ވޮޗް ފޭސްއެކެވެ.