މާލޭގައި ހުންނަ ސާޖަންޓް އާދަމް ޙަލީމް ކްރިމިނަލް އިންވެސްޓިގޭޝަން ބިލްޑިންގުގެ ގަރާޖަށް ހުއްދަނެތި ވަދެފައިވާ ކަމުގެ ތުހުމަތުގައި މީހަކު ހައްޔަރުކޮށްފިއެވެ.
ކްރިމިނަލް ކޯޓަށް އިއްޔެ ހާޒިރުކުރި 31 އަހަރުގެ އެ ފިރިހެން މީހާ، ސާޖަންޓް އާދަމް ޙަލީމް ކްރިމިނަލް އިންވެސްޓިގޭޝަން ބިލްޑިންގްގެ ވެހިކަލް ގަރާޖަށް ހުއްދަނެތި ވަދެފައިވާ ކަމަށް ފުލުހުން ބުނެފައިވާ ކަމަށް އޭނާގެ ބަންދު އަމުރުގައިވެއެވެ. އޭނާ ކޯޓަށް ހާޒިރުކޮށްފައިވަނީ މުދަލަށް ގެއްލުން ދިނުމުގެ މައްސަލައެއްގައި ކަމަށް ބުނެފައިވީ ނަމަވެސް، އޭނާ ގެއްލުން ދީފައިވަނީ ކޮން އެއްޗަކަށް ކަމެއް އަމުރުގައި ފާހަގަކޮށްފައިނުވެއެވެ.
އެ އަމުރުގައިވަނީ، އޭނާގެ މައްޗަށް ތުހުމަތުކޮށްފައިވާ ކުށް އޭނާ ކުރި ކަމަށް ތުހުމަތު ކުރެވޭ ކޮންމެވެސް މިންވަރެއްގެ ހެކި ލިބިފައިވާ ކަމަށެވެ. އެގޮތުން ހާދިސާ ހިނގި ތަނަށް ދިޔަ ފުލުހުންގެ ރިޕޯޓާއި ސީސީޓީވީ ފުޓެޖް ސްނެޕްޝޮޓްތައް ލިބިފައިވާ ކަމަށް އަމުރުގައިވެއެވެ. އޭނާއަކީ ހައްޔަރާއި ބަންދު ރެކޯޑް އޮތް މީހެއްކަން ވެސް ފާހަގަކޮށްފައިވެއެވެ.
ފުވައްމުލަކު ސިޓީއަށް ނިސްބަތްވާ އެ މީހާ ވަނީ އޭނާގެ މައްޗަށް ތުހުމަތު ކުރެވޭ ކުށް ނުކުރާ ކަމަށް ބުނެފައެވެ.
އެހެންނަމަވެސް ކްރިމިނަލް ކޯޓުން ވަނީ އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ޓަކައި، އޭނާގެ ބަންދަށް 15 ދުވަސް ޖަހައިފައެވެ.
ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގް ޚާއްސަކޮށްފައިވަނީ ބޮޑެތި ތަހުގީގުތަކަށެވެ. ހެންވޭރުގައި ހުންނަ އެ އިމާރާތް ބޭނުންކުރަން ފެށީ 2023ގައެވެ.