ފީފާ ވޯލްޑް ކަޕް 2026 ގައި ކެނެޑާ ކުޅުނު ފުރަތަމަ މެޗުން ބޮސްނިޔާ އެންޑް ހެރްޒެގޮވީނާއާ ވާދަކޮށް 1-1 އިން އެއްވަރުވެ، ވޯލްޑް ކަޕްގެ ތާރީޚުގައި ކެނެޑާއިން ފުރަތަމަ ޕޮއިންޓް ހޯދައިފިއެވެ.
ޓޮރޮންޓޯ ސްޓޭޑިއަމްގައި 43،000 އެއްހާ ސަޕޯޓަރުންގެ ކުރިމަތީގައި ކުޅުނު މި މެޗަކީ މުޅި ވޯލްޑް ކަޕްގެ ތާރީޚުގައިވެސް ކެނެޑާގެ ފަސްގަނޑުގައި ކުޅުނު ފުރަތަމަ މެޗެވެ.
ކެނެޑާގެ އެންމެ މުހިންމު ކުޅުންތެރިޔާ އަދި ކެޕްޓަން އަލްފޮންސޯ ޑޭވީސް އަނިޔާގެ ސަބަބުން މި މެޗުގައި ނުކުޅުނު ނަމަވެސް، އަމިއްލަ ސަޕޯޓަރުންގެ ކުރިމަތީގައި ކެނެޑާއިން ވަނީ ހިތްވަރުގަދަ ކުޅުމެއް ދައްކާފައެވެ.
މެޗުގެ ފުރަތަމަ ހާފުގައި ކެނެޑާއިން ގިނަ ވަގުތު ބޯޅަ ހިފަހައްޓައިގެން ކުޅެ، ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކުރިއެވެ.
ނަމަވެސް މެޗުގެ އޮއިވަރު ބަދަލުވީ 21 ވަނަ މިނެޓުގައި ބޮސްނިޔާއިން ލީޑު ނެގި ހިސާބުންނެވެ. ސީއާދު ކޮލަސިނަކް ނަގައިދިން ކޯނަރަކުން ލިބުނު ބޯޅަ، ހުސްކޮށް ހުރެ ބޮލުން ފޮނުވާލައިގެން ބޮސްނިޔާއަށް ކާމިޔާބުކޮށްދިނީ ޖޯވޯ ލުކިޗްއެވެ.
މި ލަނޑަށްފަހު ކެނެޑާއިން އެޓޭކްތައް ވަރުގަދަކުރި ނަމަވެސް، ޖޮނަތަން ޑޭވިޑް އަދި ޓާނީ އޮލުވަސޭއީއަށް ލިބުނު ފުރުސަތުތަކުގެ ހުރަހަކަށްވީ ބޮސްނިޔާގެ ކީޕަރު ނިކޮލާ ވަސިލް އާއި އެޓީމުގެ ވަރުގަދަ ޑިފެންސެވެ.
ހާއްސަކޮށް އޮލުވަސޭއީ ފޮނުވާލި ނުރައްކާތެރި ބޯޅައެއް ބޮސްނިޔާގެ ކެޕްޓަން ކޮލަސިނަކް ވަނީ ގޯލުގެ ރޮނގުމަތިން ސަލާމަތްކޮށްފައެވެ.
ކެނެޑާއަށް މެޗުގެ ނަތީޖާ ބަދަލުކޮށްލެވުނީ ދެވަނަ ހާފުގައި އެޓީމުގެ ކޯޗު ޖެސީ މާޝް ގެނައި ބަދަލުތަކާއެކުގައެވެ.
ބަދަލު ކުޅުންތެރިއެއްގެ ގޮތުގައި ކުޅެން ނުކުތް ޕްރޮމިސް ޑޭވިޑް ތަނަވަސްކޮށްދިން ފުރުސަތަކުން، މެޗުގެ 77 ވަނަ މިނެޓުގައި ކެނެޑާއަށް ނަތީޖާ އެއްވަރުކޮށްދިނީ ތަޖުރިބާކާރު ފޯވާޑް ސައިލް ލާރިން އެވެ.
މެޗުގެ ފަހު މިނެޓުގައި ލާރިންއަށް މެޗުން މޮޅުވާނެ ރަން ފުރުސަތެއް ލިބުނު ނަމަވެސް، ބޮސްނިޔާގެ ޑިފެންޑަރު މުހަރެމޮވިޗް ވަނީ ފުރާނައަށް އަތްލައިގެން ކުރި ހިތްވަރުގަދަ ޓެކުލަކުން އެ ބޯޅަ ބްލޮކްކޮށްފައެވެ.
މި ނަތީޖާއާއެކު ގްރޫޕް ބީ ގައި ހިމެނޭ ދެ ޓީމަށްވެސް 1 ޕޮއިންޓް ލިބިފައިވާއިރު، މި ގްރޫޕްގައި ދެން ހިމެނެނީ ސްވިޒަލޭންޑް އަދި ޤަޠަރެވެ.