އީލޮން މަސްކުގެ މަގްބޫލު ޖައްވީ ކުންފުނި، ސްޕޭސްއެކްސް އިން އެމެރިކާގެ ތާރީޚުގައި ވެސް މިހާތަނަށް ކުރިއަށްގެންދާ އެންމެ ބޮޑު އިނިޝަލް ޕަބްލިކް އޮފަރިން (އައިޕީއޯ) ރަސްމީކޮށް ހުޅުވާލައި، މީގެ ކުރިން ސައުދީ އަރަމްކޯއިން ހަދާފައިވާ ދުނިޔޭގެ އެންމެ ބޮޑު އައިޕީއޯގެ ރެކޯޑު މުގުރާލައިފިއެވެ.
މި ހިއްސާގެ ބާޒާރުގައި ސްޕޭސްއެކްސްގެ ހިއްސާއެއްގެ އަގު 135 ޑޮލަރަށް ކަނޑައަޅާފައިވާއިރު، މި އައިޕީއޯ މެދުވެރިކޮށް އެ ކުންފުނިން 75 ބިލިއަން ޑޮލަރުގެ ރެކޯޑު އާމްދަނީއެއް ހޯދުމަށް ވަނީ އަމާޒު ހިފާފައެވެ. މިއާއެކު، މުޅި ކުންފުނީގެ ޖުމްލަ މާކެޓް އަގު ވަނީ 1.77 ޓްރިލިއަން ޑޮލަރަށް އަރާފައެވެ.
ނެސްޑެކް ބާޒާރުގައި މި ހިއްސާތަކުގެ މުއާމަލާތްތައް މިއަދު ފެށުމަށް ހަމަޖެހިފައިވާއިރު، މިއީ އެމެރިކާގެ މާކެޓުގައި ލިސްޓުކުރެވޭ ކުންފުނިތަކުގެ ތެރެއިން މާކެޓް އަގަށް ބަލާއިރު ހަތްވަނައަށް އެންމެ ބޮޑު ކުންފުންޏަށް ވެގެންދާނެއެވެ. މި ބޮޑު ކުރިއެރުމާއެކު ސްޕޭސްއެކްސް ވަނީ ޖޭޕީ މޯގަން ޗޭސް، ބާކްޝަޔަ ހެތަވޭ، މެޓާ ޕްލެޓްފޯމްސްގެ އިތުރުން މަސްކުގެ އަމިއްލަ ޓެސްލާ ކުންފުންޏަށް ވުރެ ވެސް ކުރިއަށް ޖެހިލާފައެވެ.
ވޯލް ސްޓްރީޓްގެ އާންމު އުސޫލުތަކާ ކުޑަކޮށް ތަފާތު ގޮތަކަށް ކުރިއަށްދާ މި އައިޕީއޯގެ ދަށުން ކުންފުނީގެ 30 ޕަސެންޓް ހިއްސާ ޚާއްސަކޮށްފައިވަނީ އާންމު އިންވެސްޓަރުންނަށެވެ. އަދި ހިއްސާގެ އަގުތައް އިއުލާނުކޮށްފައިވަނީ އާންމުކޮށް މިފަދަ ކަންކަމުގައި އަމަލުކުރާ 'ބުކް-ބިލްޑިން' މަރުހަލާ ނިމުމުގެ ކުރިންނެވެ. މި ލިސްޓިންއަށް ފަހު ވެސް ކުންފުނީގެ ވޯޓުލުމުގެ ބާރުގެ ބޮޑު ބައެއް، އެއީ ގާތްގަނޑަކަށް 82 ޕަސެންޓް އޮންނާނީ ސީދާ އީލޮން މަސްކުގެ ބާރުގެ ދަށުގައެވެ.
މާލީ ދާއިރާގެ ތަޖުރިބާކާރުންގެ ނަޒަރުގައި، ކުރިއަށް އޮތް ހަފުތާތަކުގައި މާކެޓުން މި އައިޕީއޯ ބަލައިގަންނަ ގޮތް ވަރަށް ގާތުން ބަލަން ޖެހޭނެއެވެ. ބައެއް މާހިރުން ވިދާޅުވާ ގޮތުގައި، މި ހިއްސާގެ އަގުތައް ކަނޑައަޅާފައިވަނީ މާ ބޮޑު ނުވަތަ މާ ކުޑަ ނުވާނޭ ފަދަ މެދު މިންގަނޑެއްގައެވެ. އަދި މި ހިއްސާ ގަންނަ ފަރާތްތަކުން އިންވެސްޓް އެ ކުރަނީ ހަމައެކަނި ކުންފުންޏަކަށް ނޫން ކަމަށާއި، އެއީ އިންސާނިއްޔަތު ޖައްވުގެ ތެރެއަށް ފެތުރިގެންދާނެ މުސްތަގުބަލަކަށް ކުރެވޭ އިންވެސްޓްމަންޓެއްގެ ގޮތުގައި ވެސް ބައެއް މާހިރުން ސިފަކުރެއެވެ.
އެމެރިކާގެ އައިޕީއޯ މާކެޓަށް އާ ދިރުމެއް އައިސްފައިވާ މި ދަނޑިވަޅުގައި، ކުރިއަށް އޮތް ތަނުގައި އޯޕަންއޭއައި އަދި އެންތުރޮޕިކް ފަދަ އޭއައި ދާއިރާގެ މަޝްހޫރު ކުންފުނިތަކުން ވެސް އާންމުކޮށް ހިއްސާ ވިއްކަން ފަށާނެ ކަމަށް ބެލެވެއެވެ.
މަޝްހޫރު މަހުޖަނު އީލޮން މަސްކު 2002 ވަނަ އަހަރު އުފެއްދެވި ސްޕޭސްއެކްސް އަކީ ދުނިޔޭގެ ޖައްވީ ސިނާއަތް މުޅިން ބަދަލުކޮށްލި ކުންފުންޏެކެވެ. އެގޮތުން އަލުން ބޭނުންކުރެވޭ ރޮކެޓް އުފައްދައިގެން ޖައްވަށް މީހުންނާއި ތަކެތި އުފުލުމުގެ ޚަރަދު ބޮޑުތަނުން ކުޑަކޮށްދީފައިވާއިރު، އެ ކުންފުންޏަށް އެންމެ ބޮޑު އާމްދަނީއެއް ލިބެނީ ދުނިޔޭގެ 164 އަށްވުރެ ގިނަ ގައުމަށް ސެޓަލައިޓް މެދުވެރިކޮށް ހައި-ސްޕީޑް އިންޓަނެޓް ފޯރުކޮށްދޭ 'ސްޓާލިންކް' ވިޔަފާރިންނެވެ. މީގެ އިތުރުން އެ ކުންފުނިން ވަނީ ދާދި ފަހުން ގޫގުލްއާ އެކު ގިނަ އަހަރުތަކަކަށް ދެމިގެންދާ ކްލައުޑް ސާވިސް އެއްބަސްވުމެއްގައި ވެސް ސޮއިކޮށްފައެވެ.
އީލޮން މަސްކްގެ ޖައްވީ ހުވަފެން ކަމުގައިވާ މާސް އަށް އިންސާނުން ފޮނުވުމަށްޓަކައި ވެސް އެ ކުންފުނިން އަންނަނީ 'ސްޓާޝިޕް'ގެ ނަމުގައި ދުނިޔޭގައި މިހާތަނަށް އުފެއްދި އެންމެ ބޮޑު އަދި އެންމެ ބާރުގަދަ ރޮކެޓް ސިސްޓަމް ތަރައްގީކޮށް ދިރާސާތައް ކުރަމުންނެވެ.