ގޫގުލް އިން ސްޕޭސްއެކްސްއާއެކު 30 ބިލިއަން ޑޮލަރުގެ ބޮޑު އޭއައި އެއްބަސްވުމެއްގައި ސޮއިކޮށްފިއެވެ.
މިއީ ގޫގުލްގެ "ޖެމިނައި އެންޓަޕްރައިޒް" އާޓިފިޝަލް އިންޓެލިޖެންސް (އޭއައި) ޚިދުމަތަށް ބޭނުންވާ އިތުރު ކޮމްޕިއުޓިންގް ބާރު ހޯދުމުގެ ގޮތުން، އިލޮން މަސްކްގެ އެކްސްއޭއައި ކުންފުނީގެ ޑޭޓާ ސެންޓަރުތައް ބޭނުންކުރުމަށް ގޫގުލް އިން ސްޕޭސްއެކްސްއާއެކު ހެދި އެއްބަސްވުމެއްކަމަށް ރިޕޯޓްތައް ބުނެއެވެ.
ސްޕޭސްއެކްސް އިން ސެކިއުރިޓީޒް އެންޑް އެކްސްޗޭންޖް ކޮމިޝަނަށް ހުށަހަޅާފައިވާ ލިޔެކިޔުންތަކުން އެނގޭގޮތުގައި، މި އެއްބަސްވުމުގެ ދަށުން މިއަހަރުގެ އޮކްޓޯބަރު މަހުން ފެށިގެން 2029 ގެ ޖޫން މަހުގެ ނިޔަލަށް ގޫގުލް އިން ސްޕޭސްއެކްސް އަށް މަހަކު 920 މިލިއަން ޑޮލަރު ދައްކަންޖެހޭނެއެވެ.
މި އެއްބަސްވުމުގެ ދަށުން ގޫގުލް އަށް އެކްސްއޭއައިގެ 110،000 އެންވީޑިއާ ޖީޕީޔޫގެ އިތުރުން ސީޕީޔޫ އަދި މެމަރީ ބޭނުންކުރުމުގެ ފުރުސަތު ލިބިގެންދާނެއެވެ. އަދި މިއަހަރުގެ ސެޕްޓެމްބަރު މަހުގެ ނިޔަލަށް މި އަދަދަށް ޖީޕީޔޫ ފޯރުކޮށްދިނުމަށް ސްޕޭސްއެކްސް ނުކުޅެދިއްޖެނަމަ، އެއްބަސްވުން ވަގުތުން އުވާލުމުގެ ނުވަތަ އެއް މަސްދުވަހުގެ ގްރޭސް ޕީރިއަޑަކަށްފަހު ކުޑަ އަގެއްގައި ޚިދުމަތް ހޯދުމުގެ އިޚްތިޔާރު ގޫގުލް އަށް ލިބިގެންވެއެވެ.
ދުނިޔޭގެ އެކި ކަންކޮޅުތަކުގައި ގޫގުލްގެ އަމިއްލަ ޑޭޓާ ސެންޓަރުތައް ހުރި ނަމަވެސް، މިފަދަ އެއްބަސްވުމެއްގެ ބޭނުމަކީ ބޮޑެތި ވިޔަފާރިތަކަށް ޚާއްޞަކޮށްގެން ނެރެފައިވާ "ޖެމިނައި އެންޓަޕްރައިޒް" އަށް އޮތް ބޮޑު ޑިމާންޑާ އެއްވަރަށް ޚިދުމަތް ފޯރުކޮށްދިނުމަށް ބޭނުންވާ ވަގުތީ ކޮމްޕިއުޓިންގް ބާރު ހޯދުން ކަމަށް ގޫގުލް ކްލައުޑްގެ ތަރުޖަމާނު ވަނީ ހާމަކޮށްފައެވެ.
އެކްސްއޭއައިގެ ކޮމްޕިއުޓިންގް ބާރު ވިއްކަނީ ހަމައެކަނި ގޫގުލް އަކަށް ނޫނެވެ. އެގޮތުން އެންތުރޮޕިކް ކުންފުންޏާއެކު ވެސް ސްޕޭސްއެކްސް އިން ވަނީ އެކްސްއޭއައިގެ "ކޮލޮސަސް 1" ޑޭޓާ ސެންޓަރު ބޭނުންކުރުމަށް މަހަކު 1.25 ބިލިއަން ޑޮލަރު ދައްކާ ގޮތަށް 2029 ގެ މެއި މަހުގެ ނިޔަލަށް އެއްބަސްވުމެއް ހަދާފައެވެ.
ސްޕޭސްއެކްސް އިން ހިއްސާގެ ބާޒާރު (އައިޕީއޯ) އަށް ނިކުތުމަށް ތައްޔާރުވަމުންދާއިރު، މި ޑީލްތަކާއެކު އެ ކުންފުނި ވެގެންދާނީ ތާރީޚުގައިވެސް އެންމެ ބޮޑު އައިޕީއޯއެއް ކުރިއަށްގެންދާ ކުންފުންޏަށެވެ.
އާޓިފިޝަލް އިންޓެލިޖެންސް (އޭއައި) ގެ ވާދަވެރިކަން ބޮޑުވެފައިވާ މި ދަނޑިވަޅުގައި، ގޫގުލް އިން އަމިއްލަ ޑޭޓާ ސެންޓަރުތައް ދުނިޔޭގެ އެކި ކަންކޮޅުތަކުގައި ބިނާކުރަމުން ދިޔަ ނަމަވެސް، މިއީ އެ ކުންފުނިން އެހެން ބައެއްގެ ކޮމްޕިއުޓިންގް ބާރު މިފަދަ ބޮޑު އަގަކަށް ވަގުތީ ގޮތުން ހޯދާ ފުރަތަމަ ފަހަރެވެ.
އިލޮން މަސްކްގެ އެކްސްއޭއައި އިން ދަނީ "ކޮލޮސަސް" ގެ ނަމުގައި ދުނިޔޭގެ އެންމެ ބާރުގަދަ އޭއައި ސުޕަކޮމްޕިއުޓަރު ސިސްޓަމްތައް ތަރައްގީކުރަމުންނެވެ.
މި އެއްބަސްވުމުގެ ސަބަބުން ގޫގުލްގެ އެންމެ ޒަމާނީ އޭއައި މޮޑެލް ކަމަށްވާ ޖެމިނައިގެ ޚިދުމަތްތައް މާކެޓަށް ނެރުން އަވަސްވެގެންދާއިރު، މިއީ އައިޕީއޯ އަކަށް ތައްޔާރުވަމުންދާ ސްޕޭސްއެކްސް އަށް މާލީ ގޮތުން ލިބޭނެ ވަރަށް ބޮޑު ކުރިއެރުމެކެވެ.