ވޯލްޑް ކަޕާ ގުޅިގެން ރެފްރީންނާއި، ކުޅުންތެރިންގެ އިތުރުން ގައުމުތަކުގެ ސަޕޯޓަރުންނާ މެދު އެމެރިކާއިން އަޅަމުންގެންދާ ފިޔަވަޅުތަކާ ގުޅިގެން ފީފާއަށް ކޮށްދެވޭނެ އެއްވެސް ކަމެއް ނެތް ކަމަށާއި އެކަންކަމާ ގުޅޭ ވާހަކަނުދައްކާ '' ޗިލް އެންޑް ރިލެކްސް'' ނުވަތަ ހަމަޖެހިލުމަށް އެ އިދާރާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.
ވޯލްޑް ކަޕް ފަދަ ބޮޑެތި މުބާރާތްތަކުން ރެފްރީންނާއި، ކުޅުންތެރިންނާއި، ނޫސްވެރިންގެ އިތުރުން ސަޕޯޓަރުން ބޭންކުރުމާ ގުޅޭގޮތުން ފީފާގެ ރައީސް ޖިއާނީ އިންފަންޓީނޯ ދެއްކެވި މި ވާހަކަތަކަކާ ގުޅިގެން ގިނަ ބައެއްގެ ސަމާލުކަން މި ވާހަކަތަކަށް ހުއްޓިފައިވާއިރު، ގިނަ ބަޔަކު ދަނީ މި ވާހަކަތަކަށް ފާޑުކިޔައި ކަންބޮޑުވުން ފާޅުކުރަމުންނެވެ.
އިންފަންޓީނޯ ވިދާޅުވި ގޮތުގައި، ދުނިޔޭގެ ކޮންމެ ގައުމެއްގައިވެސް ސަރުކާރުތަކެއް އޮންނާނެ ކަމަށާއި އެ ގައުމެއްގެ ކަންކަން ހިންގާ ބަލަހައްޓާނީ އެ ގައުމެއްގެ ސަރުކާރުން ކަމަށެވެ. އަދި މިފަހަރުގެ ވޯލްޑް ކަޕާއި ގުޅިގެން އެމެރިކާއިން ވެސް ނިންމާފައިވާ ނިންމުން ތަކަކީ އެ ގައުމުގެ އަމިއްލަ ނިންމުންތަކެއް ކަމަށް އޭނާ ވިދާޅުވިއެވެ.
އަދި މިފަދަ ނިންމުންތަކާއި މެދު ފީފާއިން ކަންބޮޑުވި ނަމަވެސް އެކަމާއި ކުރެވޭނޭ މާބޮޑު ކަމެއް ނޯންނާނޭ ކަމަށް އޭނާ ވިދާޅުވިއެވެ.
ނަމަވެސް، އިންފަންޓީނޯގެ މި ވާހަކަތަކާ ގުޅިގެން ގިނަ ބަޔަކު ދަނީ ފާޑުކިޔަމުންނެވެ. އެއީ މީގެ ކުރިން ސަރުކާރުތަކުގެ ސިޔާސީ ނިންމުންތަކާ ގުޅިގެން ފީފާއިން ހަރުކަށި ފިޔަވަޅުތައް އަޅާފައިވާތީއެވެ.
އެގޮތުން 2023 ވަނަ އަހަރު އިންޑޮނޭޝިއާއިން އިޒްރޭލުގެ 23 އަހަރުން ދަށުގެ ޓީމަށް ވިސާ ދިނުމަށް އިންކާރު ކުރުމާ ގުޅިގެން، ފީފާއިން ވަނީ ވަގުތުން އެ މުބާރާތް އިންޑޮނޭޝިއާ އަތުން އަތުލައި އާޖެންޓީނާއަށް ބަދަލުކޮށްފައެވެ.
މި ހާދިސާއަށް ރިއާޔަތްކޮށް ގިނަ ފަރާތްތަކުން ސިފަކުރާ ގޮތުގައި އިންފަންޓީނޯގެ މިހާރުގެ ވާހަކަތަކަކީ ފީފާގެ ކުރީގެ އަމަލުތަކާ ފުށުއަރާ ވާހަކަތަކެކެވެ. ސަރުކާރުތަކުގެ ނުފޫޒުގެ ސަބަބުން ފިޔަވަޅު ނޭޅޭނެ ކަމަށް ވިދާޅުވާއިރު، މީގެ ކުރިން އަމަލުކޮށްފައިވާ ގޮތުން ބައިނަލްއަގުވާމީ މުބާރާތްތަކުގައި މިފަދަ ކަންކަން އިސްލާހުކުރުމުގެ ބާރު ފީފާއަށް އޮންނަކަން ހާމަވެއެވެ.
މި މައްސަލައިގައި ފީފާގެ ރައީސްގެ ބަޔާނާ ގުޅިގެން، ބައިނަލްއަގުވާމީ މުބާރާތްތަކުގައި ބައިވެރިވާ ކުޅުންތެރިންނާއި، ނޫސްވެރިން އަދި ސަޕޯޓަރުންގެ ހައްގުތައް ހިމާޔަތްކުރުމުގައި ފީފާގެ ދައުރާމެދު މިހާރު ވަނީ ބޮޑެތި ބަހުސްތަކެއް އުފެދިފައެވެ.