ލުބުނާނާއި އިސްރާއީލާ ދެމެދު ވެފައިވާ ހަމަލާ ބަދަލުކުރުން ހުއްޓާލުމުގެ އެއްބަސްވުމަކާ ޚިލާފަށް، އާދީއްތަ ދުވަހު އިސްރާއީލުން ލުބުނާނަށް އަލުން ހަމަލާތައް ދޭން ފެށުމާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލިއްޖެއެވެ.
ހޯމަ ދުވަހު ތެލުގެ އަގު ވަނީ ފީފާއަކުން ދެ ޑޮލަރަށް ވުރެ ބޮޑުވެފައެވެ. އެގޮތުން އެމެރިކާގެ ސާފުނުކުރާ ތެލުގެ ފިއުޗާސް 2.10 ޑޮލަރު ނުވަތަ 2.32 އިންސައްތަ އުފުލި، ފީފާއެއްގެ އަގު ވަނީ 92.64 ޑޮލަރަށް އަރާފައެވެ.
އަދި ބްރެންޓް ސާފުނުކުރާ ތެލުގެ ފިއުޗާސް 2.33 ޑޮލަރު ނުވަތަ 2.5 އިންސައްތަ އުފުލި، ފީފާއެއްގެ އަގު ވަނީ 95.42 ޑޮލަރަށް އަރާފައެވެ. މި ބަދަލާއެކު، ފެބްރުއަރީ މަހު އެމެރިކާއާއި އިސްރާއީލުން އީރާނަށް ދިން ހަމަލާތަކަށްފަހު އުފެދުނު ނުތަނަވަސްކަން ކުޑަވެދާނެ ކަމުގެ އުންމީދުގައި ހުކުރު ދުވަހު ތެލުގެ އަގަށް އައިސްފައިވާ ހެޔޮ ބަދަލު ވަނީ ގެއްލިފައެވެ.
އިސްރާއީލުން ބެއިރޫތަށް ދިން މި ހަމަލާތަކަކީ އެމެރިކާއާއި އީރާނާ ދެމެދު ސުލްހައިގެ އެއްބަސްވުމަކަށް އައުމަށާއި، ދުނިޔޭގެ ތެލާއި ގޭހުގެ ވިޔަފާރިއަށް މުހިންމު މަގެއް ކަމަށްވާ ހޮރުމުޒް ކަނޑުއޮޅި އަލުން ހުޅުވާލުމަށް އެޅުނު އިތުރު ހުރަހެއް ކަމަށް ވަނީ ބެލެވިފައެވެ.
އީރާނުން ވަނީ ވޮޝިންގްޓަނާއެކު ސުލްހައިގެ އެއްބަސްވުމަކަށް އައުމުގެ ޝަރުތެއްގެ ގޮތުގައި ލުބުނާނުގައި ހަމަލާތައް ހުއްޓާލުން ހިމަނާފައެވެ. ނަމަވެސް، އީރާނުގެ ތާއީދު އޮންނަ ހިޒްބުالله އަށް އަމާޒުކޮށް އިސްރާއީލުން ދިން ހަމަލާތަކުގެ ބަދަލުހިފުމުގެ ގޮތުން އީރާނުން ވަނީ އިސްރާއީލަށް މިސައިލް ހަމަލާތަކެއް ދީފައެވެ. މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނަށް ރައްދު ހަމަލާ ނުދިނުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ގޮވާލައްވާނެ ކަމަށެވެ.
ޖޫން ތިންވަނަ ދުވަހު ވޮޝިންގްޓަނުގައި ކުރިއަށްދިޔަ މަޝްވަރާތަކަށްފަހު ލުބުނާނާއި އިސްރާއީލުން ހަމަލާތައް ހުއްޓާލުމަށް އެއްބަސްވެފައިވީ ނަމަވެސް، މާޗް މަހު އިސްރާއީލުން ލުބުނާނަށް އެރީ ހިޒްބުالله އިން ބޯޑަރު ހުރަސްކޮށް ރޮކެޓާއި ޑްރޯން ހަމަލާތަކެއް ދިނުމާ ގުޅިގެންނެވެ.
މީގެ ކުރިން އޭޕްރީލް މަހުވެސް ދެ ގައުމުން ހަމަލާތައް ހުއްޓާލުމަށް އެއްބަސްވި ނަމަވެސް، ހަމަނުޖެހުންތައް ވަނީ ކުރިއަށް ގޮސްފައެވެ.
އޭޕްރީލް މަހުގެ ކުރީކޮޅު އެމެރިކާއާއި އިސްރާއީލުން އީރާނަށް ދެމުންދިޔަ ހަމަލާތައް ހުއްޓާލުމާ ގުޅިގެން ފުޅާ ދާއިރާއެއްގައި ހިނގަމުންދިޔަ ހަނގުރާމަ މަޑުޖެހިފައި އޮތް ނަމަވެސް، އީރާނުން ދަނީ ހޮރްމުޒް ކަނޑުއޮޅިން ކުރާ ދަތުރުފަތުރުގެ ބޮޑު ބައެއް ހުއްޓުވަމުންނެވެ. މިކަމުގެ ސަބަބުން ތެޔޮ ފޯރުކޮށްދިނުމަށް ދިމާވެފައިވާ ދަތިތަކާ ގުޅިގެން، އޯޕެކް ޕްލަސް އިން އާދީއްތަ ދުވަހު ވަނީ ތެޔޮ އުފައްދާ މިންވަރު އިތުރުކުރުމަށް އެއްބަސްވެފައެވެ.
މިއީ ފާއިތުވި ހަތަރު މަސް ދުވަހުގެ ތެރޭގައި ތެޔޮ އުފައްދާ މިންވަރު އިތުރުކުރުމަށް އެ ޖަމާއަތުން ނިންމި ހަތަރުވަނަ ފަހަރެވެ. ނަމަވެސް، ތަޖުރިބާކާރުން ބުނާ ގޮތުގައި މި ނިންމުމުގެ ސަބަބުން މާކެޓަށް މާ ބޮޑު އަސަރެއް ނުކުރާނެއެވެ.
ސަބަބަކީ ހޮރްމުޒް ކަނޑުއޮޅި ބަންދުވެފައި އޮތުމާއި، ރަޝިޔާގެ އުމްރާނީ ވަސީލަތްތަކަށް ދީފައިވާ ހަމަލާތަކުގެ ސަބަބުން އެ ގައުމުގެ ތެޔޮ އުފެއްދުމުގެ ގާބިލުކަން ދަށްވެފައިވުމާއެކު، އޯޕެކް ޕްލަސްގެ ގިނަ ގައުމުތަކަށް ކަނޑައެޅިފައިވާ މިންވަރަށް ތެޔޮ ނުއުފެއްދޭތީއެވެ.