ކުރިއަށް އޮތް 2026 ވަނަ އަހަރުގެ ފީފާ ވޯލްޑް ކަޕަށް ދުނިޔޭގެ ސަމާލުކަން ހުއްޓިފައިވާއިރު، ފުޓްބޯޅައިގެ އެންމެ ވަރުގަދަ ދެ ޝަހުސިއްޔަތު ކަމަށްވާ ލިއޮނަލް މެސީ އާއި ކްރިސްޓިއާނޯ ރޮނާލްޑޯގެ ތެރެއިން މޮޅީ ކާކުތޯ ކުރެވޭ ބަހުސް އަނެއްކާވެސް ވަނީ ހޫނުވެފައެވެ.
ނަމަވެސް، މި ދެ ކުޅުންތެރިންނާއެކު އަދި އިދިކޮޅަށް ވެސް ގިނަ މެޗުތަކެއް ކުޅެފައިވާ ފްރާންސްގެ ކެޕްޓަން ކީލިއަން އެމްބާޕޭ ވަނީ މި ބަހުސާ މެދު އާންމުން ދެކޭ ގޮތް މުޅިން ގޯސް ކަމަށް ބުނެ، މި ޒުވާބަށް މުޅިން އާ ނަޒަރަކުން ޖަވާބުދީފައެވެ.
ޔޫޓިއުބް ޗެނަލަކަށް ދިން އިންޓަވިއުއެއްގައި އުމުރުން 27 އަހަރުގެ އެމްބާޕޭ ބުނީ، މެސީ އަކީ މަދު ހުނަރެއް ފެންނަމުން އަންނަ ކުޅުންތެރިއެއް ކަމާއި، ރޮނާލްޑޯއަކީ ހަމައެކަނި ބުރަ މަސައްކަތުން ކުރިއަށްދާ ކުޅުންތެރިއެއް ކަމަށް ބުނުމަކީ ފުޓްބޯޅަ ނުކުޅޭ މީހުން ދައްކާ ވާހަކައެއް ކަމަށެވެ.
ރޮނާލްޑޯގެ ކިބައިގައި ހުނަރެއް ނެތް ކަމަށް ނުވަތަ މެސީ އަކީ ބުރަ މަސައްކަތް ނުކުރާ ކުޅުންތެރިއެއް ކަމަށް ބުނާ މީހަކީ ދުވަހަކުވެސް ބޫޓަކަށް އަރައި ފަރިތަކުރުންތަކެއްގައި ބައިވެރިވެފައިވާ މީހެއް ނޫން ކަމަށްވެސް އެމްބާޕޭ ވަރަށް ސާބިތުކަމާއެކު ބުންޏެވެ.
ޕީއެސްޖީގައި މެސީއާއެކު ދެ ސީޒަން ހޭދަކޮށް، އަދި ރޮނާލްޑޯއާ ދެކޮޅަށް ކްލަބް ލެވެލްގަޔާއި ބައިނަލްއަގުވާމީ މައިދާނުގައި ކުޅެފައިވާ އެމްބާޕޭ ފާހަގަކުރި ގޮތުގައި މި ދެ ކުޅުންތެރިންނަކީ އެކަކު އަނެކަކާ މުޅިން ތަފާތު ދެ މިސާލެކެވެ.
އެގޮތުން އެކަކީ ކަނާތުން ކުޅޭ، ދިގު، އަދި ޖިސްމާނީ ގޮތުން ވަރުގަދަ ކުޅުންތެރިއެއް ކަމަށާއި، އަނެކަކީ ވާތުން ކުޅޭ، ކުރު، އަދި ކުޅުމުގެ ވިސްނުން ތޫނު ކުޅުންތެރިއެއް ކަމަށް އޭނާ ބުންޏެވެ. އެހެންކަމުން މި ދެ ކުޅުންތެރިންގެ ތަފާތުވުމަކީ ފުޓްބޯޅައިގެ ރީތިކަން އިތުރުކޮށްދިން ކަމެއް ކަމަށްވެސް އޭނާ ދެކެއެވެ.
މިއަހަރުގެ ވޯލްޑް ކަޕަކީ މެސީ އާއި ރޮނާލްޑޯގެ ފަހު މުބާރާތަށްވުމުގެ ފުރުސަތު ބޮޑުއިރު، މުބާރާތުގެ ގްރޫޕް ސްޓޭޖާއި ނޮކްއައުޓް ބުރުތަކުގެ ނަތީޖާ ނުކުންނަ ގޮތަކުން، ކުއާޓާ ފައިނަލުގައި އާޖެންޓީނާ އާއި ޕޯޗުގަލް ކުރިމަތިލުމުގެ ފުރުސަތެއް އެބައޮތެވެ.
އަދި ހަމައެއާއެކު ފްރާންސް އޮތް ފަޅީގެ ގޮތުން އެމްބާޕޭއަށް މި ދެ ލެޖެންޑުންގެ ތެރެއިން ކޮންމެވެސް އެއް ކުޅުންތެރިއަކާ މުބާރާތުގެ ފައިނަލް މެޗުގައި ބައްދަލުކުރަން ޖެހުމަކީވެސް އެކަށީގެންވާ ކަމެކެވެ.