ކާބޯތަކެތީގެ ރައްކާތެރިކަން ކަށަވަރުކުރުމަށް ގަވައިދުތައް އެކުލަވާލުމާއި ކާބޯތަކެތީގެ ރައްކާތެރިކަން މޮނިޓާކޮށް، ޓެސްޓުކުރުމަށް ބޭނުންވާ ފަންނީ ގާބިލުކަން އިތުރުކުރުމުގެ މަސައްކަތްތައް ކުރަމުން އަންނަ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މިއަދު ފާހަގަކުރާ ދުނިޔޭގެ ކާބޯތަކެތީގެ ދުވަހުގެ މުނާސަބަތުގައި އެމަނިކުފާނު ފޮނުއްވި މެސެޖެއްގައި ވަނީ، ރައްކާތެރި ކާބޯތަކެތީގެ ސަބަބުން ޢާންމު ސިއްހަތާއި ދެމެހެއްޓެނިވި ތަރައްގީއާއި އިންސާނާގެ ދުޅަހެޔޮކަމަށް ލިބޭ ބޮޑު ކުރިއެރުމުގެ މައްޗަށް އަލިއަޅުއްވާލައްވާފައެވެ.
ކާބޯތަކެތީގެ ޒަރީއާއިން ޖެހޭ ބަލިތަކުގެ ސަބަބުން ދުނިޔޭގެ އެތައް މިލިއަން މީހުންނަށް ނޭދެވޭ އަސަރުކުރާ ކަމެއްކަން ފާހަގަކުރައްވައި، ރައީސް ވަނީ މިއީ ޞިއްޙީ ނިޒާމާއި ދިރިއުޅުމުގެ ވަސީލަތްތަކާއި ގައުމުގެ އިގުތިސާދަށް އޮތް ބޮޑު ބުރައެއްގެ ގޮތުގައި ސިފަކުރައްވާފައެވެ.
ސްކޫލެއްގެ ކެފެޓީރިއާގައި ހުރި ބައެއް ކާތަކެތި: ރައީސް ވިދާޅުވީ، ކާބޯތަކެތީގެ ރައްކާތެރިކަން ކަށަވަރުކުރަން ގަވައިދުތައް އެކުލަވާލައި، ފަންނީ ގާބިލުކަން އިތުރުކުރަން މަސައްކަތް ކުރާ ކަމަށް ---
އޭގެއިތުރުން، ތަފާސްހިސާބުތަކާއި ހެކިތަކުގެ މައްޗަށް ބިނާކޮށް ފިޔަވަޅުތައް އަޅައި، ނިޒާމުތައް ހަރުދަނާކޮށް، އެންމެން ގުޅިގެން މަސައްކަތް ކޮށްފިނަމަ މިފަދަ ގިނަ ބަލިތަކުން ރައްކާތެރިވެވޭނެ ކަމަށް އެމަނިކުފާނު ވިދާޅުވިއެވެ.
ރާއްޖޭގައި ބޭނުންކުރާ ހުރިހާ ކާބޯތަކެތީގެ ރައްކާތެރިކަމާއި އެއީ އިތުބާރުކުރުވޭ މިންގަނޑުތަކެއްގެ ތެރެއިން ފޯރުކޮށްދޭ ތަކެތިކަން ކަށަވަރުކުރުމަށް ސަރުކާރުން އަހަންމިއްޔަތުކަން ދެއްވާކަން އެ މަނިކުފާނު ހާމަކުރެއްވިއެވެ.
އެގޮތުން، ކާބޯތަކެތީގެ ރައްކާތެރިކަމުގެ ގާނޫނުގެ ދަށުން ސަރުކާރުން ހަދަންޖެހޭ ގަވައިދުތައް އެކުލަވާލުމާއި ބޯޑަރުތަކުގައި ކާބޯތަކެތި ކޮންޓްރޯލްކުރުމުގެ ފިޔަވަޅުތައް ވަރުގަދަކުރުމުގެ މަސައްކަތް ކުރަމުން އަންނަކަން ރައީސް ފާހަގަކުރެއްވިއެވެ. އަދި، ކާބޯތަކެތީގެ ރައްކާތެރިކަން މޮނިޓާކޮށް، ޓެސްޓުކުރުމަށް ބޭނުންވާ ފަންނީ ގާބިލުކަން އިތުރުކުރުމުގެ މަސައްކަތްތައް ކުރަމުންދާ ކަމަށް އެ މަނިކުފާނު ވިދާޅުވިއެވެ.
ރައީސް ޑރ. މުޙައްމަދު މުޢިއްޒު: ކާބޯތަކެތީގެ ރައްކާތެރިކަން ކަށަވަރުކުރަން ގަވައިދުތައް އެކުލަވާލައި، ފަންނީ ގާބިލުކަން އިތުރުކުރަން މަސައްކަތްކުރާ ކަމަށް ވިދާޅުވި --- ފޮޓޯ: ރައީސް އޮފީސް
އެއާއެކު، ރައީސް ވަނީ ކާބޯތަކެތީގެ ވިޔަފާރިކުރާ ފަރާތްތަކުން ސާފުތާހިރުކަމާއި ރައްކާތެރިކަމުގެ އެންމެ މަތީ މިންގަނޑުތައް ހިފެހެއްޓުމަށާއި ބަލިތައް ދެނެގަތުމާއި އެކަންކަމަށް ފިޔަވަޅުއެޅުމުގެ ނިޒާމުތައް ހަރުދަނާކުރުމަށް އިލްތިމާސްކުރައްވާފައެވެ.
ކާބޯތަކެތި ބޭނުންކުރާ ފަރާތްތަކުންވެސް އެތަކެތީގެ ރައްކާތެރިކަމުގެ މަޢުލޫމާތު ހޯދައި، ގޭގޭގައި ކާބޯތަކެތި ގެންގުޅުމުގައި ރައްކާތެރި ގޮތްތައް އިސްކުރުމަށް އެމަނިކުފާނު އެދިވަޑައިގެންނެވިއެވެ.
މީގެ އިތުރުން، ނުރައްކާތެރި ކާބޯތަކެއްޗާއި ތަޣައްޔަރުވެފައިވާ ފެނުގެ ސަބަބުން އިންސާނީ ތަކުލީފުތައް އިތުރަށް ބޮޑުވަމުންދާ ޣައްޒާ ހިމެނޭހެން، ކާރިސާތަކާއި އިންސާނީ ކުއްލި ނުރައްކަލުގެ ޙާލަތްތައް ކުރިމަތިވެފައިވާ ސަރަޙައްދުތަކުގައި ދިރިއުޅޭ ރައްޔިތުންނާއެކު ރާއްޖެއިން ސާބިތުކަމާއެކު އޮތްކަން އެމަނިކުފާނު ހާމަކުރެއްވިއެވެ.
މިއަދު ކާބޯތަކެތީގެ ދުވަސް ފާހަގަކުރާއިރު، އެ ތަކެތީގެ ރައްކާތެރިކަމަށް އޮންނަ އިތުބާރު ކުޑަވާ ފަދަ ކަންކަން ރާއްޖޭގައި ކުރާލެއް މަދެއް ނޫނެވެ. މިގޮތުން، ސާފުތާހިރު ނޫން، ތަންތަނުގައި ކާބޯތަކެތި ހަދައިގެން ވިއްކާ މައްސަލަތައް ދޭތެރެއަކުން ފެންމަތިވެއެވެ.