އެޕަލްގެ އަހަރީ "ވޯލްޑްވައިޑް ޑިވެލޮޕާސް ކޮންފަރެންސް" (ޑަބްލިއުޑަބްލިއުޑީސީ 2026) ފެށުމަށް ތައްޔާރުވަމުން އަންނައިރު، މި އަހަރު އެޕަލް އިން ތައާރަފްކުރާނެ އާ ފީޗާތަކާ މެދު ގިނަ ބައެއްގެ މެދުގައި ވަނީ ޝައުގުވެރިކަން ބޮޑުވެފައެވެ.
ހާއްސަކޮށް އެޕަލްގެ ވާޗުއަލް އެސިސްޓަންޓް "ސިރީ" އަށް ގެންނަ ބޮޑު އާޓިފިޝަލް އިންޓެލިޖެންސް (އޭއައި) އަޕްގްރޭޑާއި، "އެޕަލް އިންޓެލިޖެންސް" އަށް ގެންނަ ބަދަލުތައް މި ފަހަރުގެ ކޮންފަރެންސްގައި އެންމެ ފާހަގަކޮށްލެވޭނެ ކަންކަމުގެ ގޮތުގައި ވަނީ ބެލެވިފައެވެ.
މި އިވެންޓް ކުރިއަށްދާނީ އެޕަލްގެ ޑިވެލޮޕާ އެޕް، ވެބްސައިޓް އަދި ޔޫޓިއުބް ޗެނަލް މެދުވެރިކޮށް ލައިވްކޮށެވެ.
މި ފަހަރުގެ އެންމެ ބޮޑު އެއް ބަދަލަކީ ގޫގުލްގެ ޖެމިނައި ޓެކްނޮލޮޖީ ބޭނުންކޮށްގެން ސިރީ މުޅިން އާ ފެންވަރަކަށް ތަރައްގީކުރުމެވެ. މީގެ ސަބަބުން ސިރީއާ ވާހަކަދައްކާއިރު ކަންކަމުގެ މާހައުލާއި މާނަ މާ ބޮޑަށް ދެނެގަނެވޭއިރު، އެކި އެޕްތަކުގެ ތެރެއިން ގިނަ ފިޔަވަޅުތަކެއް އެކުލެވޭ މަސައްކަތްތައް ފަސޭހަކަމާއެކު ސިރީއަށް ކުރެވޭނެ ކަމަށް ރިޕޯޓްތައް ބުނެއެވެ.
މީގެ އިތުރުން ޗެޓްޖީޕީޓީ ފަދަ ބޮޓްތަކާ ވާދަކުރުމަށް ވަކި އެޕެއްގެ ގޮތުގައި ސިރީ ތައާރަފްކޮށް، ޗެޓްތައް އަމިއްލައަށް ފޮހެވޭ ގޮތް ހެދުމުގެ ފުރުސަތު ވެސް އެބައޮތެވެ.
އެޕަލް އިން ދެން އެންމެ ބޮޑަށް ތައްޔާރުވަމުން އަންނަނީ އެޕް ސްޓޯރާ ގުޅުވައިގެން "އޭއައި އޭޖެންޓް" އެއް ތައާރަފްކުރުމަށެވެ. މި ފީޗާގެ އެހީގައި ޔޫޒަރުންނަށް ރެސްޓޯރަންޓް ފަދަ ތަންތަނުން ޖާގަ ހޯދުމާއި، ދުވަހުން ދުވަހަށް ކުރަންޖެހޭ ކަންކަން މެނޭޖްކުރުމާއި، ލިޔެކިޔުންތައް އެޑިޓްކުރުން ފަދަ ގިނަ ކަންތައްތަކެއް އޭއައި އޭޖެންޓާ ހަވާލުކޮށްގެން ކުރުވުމުގެ ގާބިލްކަން ލިބިގެންދާނެއެވެ.
ފޯނުގެ ކެމެރާ އަދި ފޮޓޯސް އެޕަށް ވެސް ބޮޑެތި ބަދަލުތަކެއް އަންނާނެ ކަމަށް ބެލެވެއެވެ. އެގޮތުން ކެމެރާ އެޕްގެ ތެރެއަށް "ވިޝުއަލް އިންޓެލިޖެންސް" ގެ ނަމުގައި ސިރީ މޯޑެއް އިތުރުކުރެވޭނެ ކަމަށާއި، މީގެ އެހީގައި ފޮޓޯ ނަގާއިރު ކުރިމަތިން ފެންނަ އެއްޗެހި ގޫގުލް އިމޭޖް ސާޗް މެދުވެރިކޮށް ދެނެގަނެވޭނެ ކަމަށް ރިޕޯޓްތައް ބުނެއެވެ.
ފޮޓޯސް އެޕްގައި ހުންނަ ކޮމްޕިއުޓާ އެޑިޓިންގެ އެހީގައި، ފޮޓޯތަކުން ބޭނުންނުވާ ބައިތައް އަމިއްލައަށް ފޮހެލުމާއި، އާދައިގެ ބަހުރުވައިން އެދުމުން ވެސް ފޮޓޯ އެޑިޓްކޮށްދޭ ފީޗާތައް ހިމެނެއެވެ.
އިމޭޖް ޖެނެރޭޓްކުރާ "އިމޭޖް ޕްލޭގްރައުންޑް" އެޕްގެ ކޮލިޓީ މަތިކޮށް، ކުރިއަށްވުރެ ފަސޭހައިން ބޭނުންކުރެވޭ ގޮތް ހެދުމަށް ވެސް އެޕަލް އިން ވަނީ ނިންމާފައެވެ. މީގެ ތެރޭގައި ޔޫޒަރުންގެ މެސެޖުތަކާއި މީޑިއާއަށް ބިނާކޮށް އަމިއްލަ "ޖެންމޯޖީ" އުފެއްދުމާއި، ތަފާތު ތީމްތަކަށް ފެތޭ އޭއައި ވޯލްޕޭޕަރުތައް ތައްޔާރުކުރުމުގެ ފުރުސަތު ލިބިގެންދާނެއެވެ.
އެޕަލް ވޮލެޓް އެޕަށް ގެންނަ ބަދަލުތަކުގެ ތެރޭގައި، ރައްޓެހިންނާއެކު ބިލްތައް ހިއްސާކޮށްލެވޭ "ބިލް-ސްޕްލިޓިން" ފީޗާއެއް ހިމެނެއެވެ. މީގެ އެހީގައި ބިލުގެ ފޮޓޯއެއް ނަގާލުމުން އެކި މީހުން ދައްކަންޖެހޭ ފައިސާގެ އަދަދު ހިސާބުކޮށް، ފައިސާ ހޯދުމަށް ރިކުއެސްޓް ފޮނުވާލެވޭނެއެވެ. އަދި ފިލްމު ޓިކެޓާއި ޖިމް ކާޑު ފަދަ ތަކެތި ފޮޓޯ ނަގައިގެން ޑިޖިޓަލް ޕާސްގެ ގޮތުގައި ވޮލެޓަށް އިތުރުކޮށްލެވޭނެއެވެ.
މި ހުރިހާ އޭއައި ފީޗާތަކަކާއި ސިރީގެ އާ ބަދަލުތައް މެކްއޯއެސް، އައިޕެޑްއޯއެސް، ވިޜަންއޯއެސް އަދި ވޮޗްއޯއެސް ފަދަ އެޕަލްގެ ހުރިހާ އޮޕަރޭޓިން ސިސްޓަމްތަކަކަށް ވެސް ލިބިގެންދާނެ ކަމަށް ބެލެވެއެވެ.
އެޕަލް އިން މަސައްކަތް ކުރަމުންދަނީ އެކުންފުނީގެ ހުރިހާ ޑިވައިސްތަކެއްގައިވެސް އޭއައިގެ ބޭނުން ހިފައިގެން ޔޫޒަރުންނަށް މާ ފަސޭހަ އަދި ރައްކާތެރި މާހައުލެއް ގާއިމްކޮށްދިނުމަށެވެ.