ރޭގަނޑު ފުރިހަމަ އަށް ގަޑިއިރުގެ ނިންޖެއް ހޯދުމަށްފަހު ހެނދުނު ހޭލާއިރުވެސް، އަދިވެސް ނިދަން ބޭނުންވާ ކަމުގެ އިހުސާސް ކުރެވޭ ހެއްޔެވެ؟ މިއީ ގިނަ ބަޔަކަށް ދިމާވާ އާންމު މައްސަލައެކެވެ. އާދަޔާޚިލާފަށް ނިދިއައުމަކީ، އާންމުކޮށް ނިދާ ވަރަށްވުރެ ގިނައިން ނިދުމަށްފަހުވެސް ދުވާލުގެ ބޮޑުބައެއްގައި ނިދިމޫނުވެފައި ހުރުމެވެ. މިކަމުގެ ސަބަބުން ލޯ ވަރުބަލިވެ، ގިނަގިނައިން ލޯ މަރާލަން ބޭނުންވުމާއި، ދުވާލުގަޑީގައި ނިދޭލެއް ގިނަވުން އެކަށީގެންވެއެވެ. ނަމަވެސް މިއީ ހަމައެކަނި ވަރުބަލިވުމެއް ނޫނެވެ. އާދައިގެ ވަރުބަލިކަމަކީ ހަކަތަ މަދުވުމާ ގުޅިފައިވާ ކަމަކަށް ވާއިރު، އާދަޔާޚިލާފަށް ނިދިއައުމަކީ އޭގެ ސަބަބުން ތިމާގެ ވަޒީފާއަށާއި، ކިޔެވުމަށާއި، އަދި ދިރިއުޅުމުގެ އެހެނިހެން ކަންކަމަށްވެސް ބޮޑެތި ހުރަސްތަކެއް ކުރިމަތިކުރުވާ ކަމެކެވެ. ދުވާލުގެ ވަގުތުތަކުގައި ސަމާލުކަން ކުޑަވެ، ކަންކަމުގައި އޮޅުންއަރާ ގޮތްވުމަކީ މިކަމުގެ ސަބަބުން ދިމާވާ އާންމު މައްސަލަތަކެވެ.
މިގޮތަށް އާދަޔާޚިލާފަށް ނިދިއަންނަން މެދުވެރިވާ ގިނަ ސަބަބުތަކެއް ވެއެވެ. އޭގެ ތެރޭގައި ދިރިއުޅުމުގެ އާދަތަކާއި، މޫސުމަށް އަންނަ ބަދަލުތަކާއި، ބޭނުންކުރާ ބޭހެއްގެ ސަބަބުން ދިމާވާ ކަންކަމުގެ އިތުރުން، ސިއްހީ ބޮޑެތި މައްސަލަތައްވެސް ހިމެނެއެވެ. ނިދުމުގެ ނިޒާމަށް ބުރޫއަރާ ކޮންމެ ކަމަކީ ދުވާލުގަޑީގައި ނިދިއައުމަށް މަގުފަހިކުރުވާ ކަމެކެވެ. ބައެއް ފަހަރު މިކަމުގެ އަލާމާތްތަކުގެ ތެރޭގައި ގުގުރިދެމުމާއި، ނިދީގައި ހަރަކާތްކުރެވުން ފަދަ ކަންކަން ހިމެނެއެވެ. ގިނަ ފަހަރަށް މިފަދަ އަލާމާތްތައް އަމިއްލައަށް ފާހަގަނުކުރެވުނު ނަމަވެސް، އެއް ކޮޓަރިއެއްގައި ނިދާ އެހެން މީހުންނަށް މިކަންކަން ފާހަގަކުރެވެއެވެ. މީގެ އިތުރުން ތައިރޮއިޑް މައްސަލަތަކާއި ކެންސަރު ފަދަ ބަލިތަކަކީވެސް ނިދުމުގެ ނިޒާމާ ސީދާ ގުޅުމެއް ނެތް ނަމަވެސް، ދުވާލުގަޑީގައި ނިދިއައުމަށް މެދުވެރިކުރުވާ ސަބަބުތަކެވެ.
ނިދުމާ ގުޅޭ އެންމެ އާންމު އެއް މައްސަލައަކީ ސްލީޕް އެޕްނިއާއެވެ. މިއީ ނިދާފައި އޮންނައިރު ނޭވާލުން މެދުކެނޑި، އަލުން ނޭވާލާން ފެށޭ ގޮތަށް ދިމާވާ ނުރައްކާތެރި ހާލަތެކެވެ. މިކަމުގެ ސަބަބުން ފުން ނިންޖެއް ނުލިބި، ދުވާލުގަޑީގައި އާދަޔާޚިލާފަށް ނިދިއާދެއެވެ. ބާރަށް ގުގުރިދެމުމާއި، ނިދީގައި ނޭވާ ހާސްވުމާއި، ހެނދުނު ހޭލާއިރު ކަރުތެރެ ހިކިފައި ހުރުމާއި ބޮލުގައި ރިއްސުމަކީ ސްލީޕް އެޕްނިއާގެ އާންމު އަލާމާތްތަކެވެ. މީގެ އިތުރުން ސަމާލުކަން ދިނުމަށް ދަތިވުމާއި ރުޅިގަދަވުންވެސް ހިމެނެއެވެ. ސްލީޕް އެޕްނިއާގެ ސަބަބުން ލޭމައްޗަށް ދިއުމާއި، ހިތުގެ ބަލިތަކާއި، ޓައިޕް 2 ޑައިބެޓީސް އަދި ފަލަވުން ފަދަ މައްސަލަތަކަށް މަގުފަހިވެއެވެ. މީގެ ތެރޭގައި އޮބްސްޓްރަކްޓިވް ސްލީޕް އެޕްނިއާ (އޯއެސްއޭ) އާއި ސެންޓްރަލް ސްލީޕް އެޕްނިއާ (ސީއެސްއޭ) ހިމެނެއެވެ.
ރެސްޓްލެސް ލެގްސް ސިންޑްރޯމް (އާރްއެލްއެސް) އަކީވެސް ނިދުމަށް ހުރަސްއަޅާ އާންމު މައްސަލައެކެވެ. މިއީ ފައިގައި އުނދަގޫ އިހުސާސެއް އުފެދި، ފައި ހަރަކާތްކޮށްލަން މަޖުބޫރުވާ ހާލަތެކެވެ. އާންމުކޮށް މިކަން ދިމާވަނީ އޮށޯވެގެން އޮންނަ ވަގުތުގައެވެ. ފައިގައި ރިއްސުން ނުވަތަ ހިރުވުން ފަދަ އިހުސާސެއް ކުރެވޭއިރު، މިކަމަށް ލުޔެއް ލިބެނީ ތެދުވެ ހިނގާލުމުންނެވެ. މިކަމުގެ ސަބަބުން ނިދަން އުނދަގޫވެ، އަނެއް ދުވަހު އާދަޔާޚިލާފަށް ނިދިއައުމަށް މެދުވެރިވެއެވެ. އާރްއެލްއެސް ދިމާވާ ސީދާ ސަބަބު ބައެއް ފަހަރު ނޭނގުނު ނަމަވެސް، އާއިލީ ގޮތުންނާއި ހަށިގަނޑުގައި ދަގަނޑުގެ މާއްދާ މަދުވުމަކީ މީގެ ސަބަބެއް ކަމަށް ބެލެވެއެވެ. އަދި ސިކުނޑީގައި ހަރަކާތްތައް ކޮންޓްރޯލްކުރާ ބަޔަށް ދިމާވާ މައްސަލަތަކަކީވެސް މީގެ އަސްލަކަށް ވުން އެކަށީގެންވެއެވެ.
ނާކޮލެޕްސީއަކީ ސިކުނޑީގެ ނިޒާމަށް ދިމާވާ މައްސަލައެކެވެ. މި ބަލީގައި ސިކުނޑިއަށް ނިދުމާއި ހޭލާ ހުންނަ ވަގުތުތައް ރަނގަޅަށް ކޮންޓްރޯލެއް ނުކުރެވެއެވެ. ނާކޮލެޕްސީ ހުންނަ މީހުންނަށް ރޭގަނޑު ނިދީގައި އެތައް ފަހަރަކު ހޭލެވޭއިރު، ދުވާލުގެ ވަގުތުތަކުގައި ކުއްލިއަކަށް ގަދަޔަށް ނިދިއާދެއެވެ. ވާހަކަދައްކަން ހުންނައިރު ނުވަތަ ކާން އިންނައިރުވެސް ކުއްލިއަކަށް ނިދިދާނެއެވެ. މިއީ އާންމުކޮށް އުމުރުން ހަތް އަހަރާއި 25 އަހަރާ ދެމެދު ފެންނަން ފަށާ، ނަމަވެސް ނިސްބަތުން މަދު ބަޔަކަށް ދިމާވާ މައްސަލައެކެވެ. ގިނަ ފަހަރަށް މިއީ ނަފްސާނީ މައްސަލައެއްގެ ގޮތުގައި އޮޅިގެން ދެނެގަނެވޭ ބައްޔެކެވެ.
ޑިޕްރެޝަން ނުވަތަ ނަފްސާނީ ބަލިމަޑުކަމަކީވެސް ނިދުމުގެ އާދަތަކަށް ބޮޑެތި ބަދަލުތަކެއް ގެނުވާ ކަމެކެވެ. ކުރިން ނިދާ ވަރަށްވުރެ މާ ގިނައިން ނިދުމާއި ނުވަތަ ނިދަން އުނދަގޫވުމަކީ ޑިޕްރެޝަންގެ އާންމު އަލާމާތެކެވެ. މީގެ އިތުރުން ކަންކަން ކުރުމުގެ ޝައުގުވެރިކަން ގެއްލުމާއި، ރުޅިގަދަވުމާއި، ކެއުމުގެ އާދަތަކަށް ބަދަލުއައުމާއި، މާޔޫސްވުން ހިމެނެއެވެ. ރޭގަނޑު ރަނގަޅަށް ނުނިދޭނަމަ ދުވާލުގަޑީގައި ނިދިއައުމަކީ އެކަށީގެންވާ ކަމެކެވެ. ބައެއް މީހުންނަށް ނިދުމުގެ އާދަތަކަށް އަންނަ ބަދަލަކީ ޑިޕްރެޝަންގެ ފުރަތަމަ އަލާމާތަށް ވާއިރު، އަނެއްބައި މީހުންނަށް މިކަން ދިމާވަނީ އެހެނިހެން އަލާމާތްތައް ފެންނަން ފެށުމަށްފަހުއެވެ. ޑިޕްރެޝަން މެދުވެރިވާ ސަބަބުތަކުގެ ތެރޭގައި ސިކުނޑީގެ ކެމިކަލްތަކަށް އަންނަ ބަދަލުތަކާއި، ހިތްދަތި ހާދިސާތައް ހިމެނެއެވެ.
ބައެއް ބޭސްތަކަކީވެސް އޭގެ ސައިޑް އިފެކްޓެއްގެ ގޮތުން ނިދިއަންނަ ގޮތްވާ ބޭސްތަކެކެވެ. މީގެ ތެރޭގައި ލޭމައްޗަށް ދިއުމަށް ކާ ބޭހާއި، ޑިޕްރެޝަނަށް ދޭ ބޭހާއި، އެންޓިހިސްޓަމައިން ފަދަ ރޯގާ ބޭސްތަކާއި، ހޮޑުލުން މަނާކުރާ ބޭސްތަކުގެ އިތުރުން އެންޒައިޓީއަށް ދޭ ބޭސްތައް ހިމެނެއެވެ. ބޭނުންކުރާ ބޭހެއްގެ ސަބަބުން މާބޮޑަށް ނިދިއަންނަކަން ފާހަގަކުރެވޭނަމަ، ޑޮކްޓަރާ މަޝްވަރާކުރުމަކީ މުހިންމު ކަމެކެވެ. ނަމަވެސް ޑޮކްޓަރުގެ ލަފާގެ މަތިން މެނުވީ އެއްވެސް ބޭހެއް ކެއުން ހުއްޓާލައިގެން ނުވާނެއެވެ. ޑޮކްޓަރުން ބޭހުގެ ޑޯޒަށް ބަދަލުގެނެސް ނުވަތަ އެހެން ބޭހަކަށް ބަދަލުކޮށްދީފާނެއެވެ. މީގެ އިތުރުން އުމުރުން ދުވަސްވުމަކީވެސް ނިދުމުގެ ފެންވަރު ދަށްވެ، ދުވާލުގަޑީގައި ނިދިއައުމަށް މެދުވެރިވާ ސަބަބެކެވެ. އުމުރުން ދުވަސްވުމާއެކު ހަށިގަނޑުގެ ބަޔޮލޮޖިކަލް ސައިކަލްތަކަށް އަންނަ ބަދަލުތަކުގެ ސަބަބުން ފުން ނިންޖެއް ލިބޭ ވަގުތު މަދުވެ، ރޭގަނޑު ހޭލެވޭލެއް ގިނަވެއެވެ.
މިފަދަ މައްސަލަތަކަށް އޮތް ފަރުވާ ބިނާވެފައިވަނީ އެކަން މެދުވެރިވާ ސަބަބެއްގެ މައްޗަށެވެ. ސްލީޕް އެޕްނިއާއަށް އޮތް އެންމެ ކާމިޔާބު ފަރުވާއަކީ ސީޕެޕް މެޝިން ބޭނުންކުރުމެވެ. މިއީ ނިދާއިރު ނޭފަތާއި އަނގަމަތީގައި އަޅާ މާސްކެއް މެދުވެރިކޮށް ވައި ފޮނުވައިދީ، ނޭވާލާ ހޮޅި ހުޅުވިފައި ބެހެއްޓުމަށް އެހީތެރިވެދޭ މެޝިނެކެވެ. އާ މޮޑެލްތަކުގެ މެޝިންތައް އަޑުމަޑުވެފައި ބޭނުންކުރަން ފަސޭހަވާނެއެވެ. ރެސްޓްލެސް ލެގްސް ސިންޑްރޯމް ހުންނަ މީހުންނަށް ދިރިއުޅުމުގެ އާދަތަކަށް ގެންނަ ބަދަލުތަކުން ލުއި ލިބެއެވެ. ނިދުމުގެ ކުރިން ފައި މަސާޖުކުރުމާއި، ތާފަނާ ފެނުން ފެންވެރުމާއި، ދުވާލުގެ ކުރީކޮޅު ކަސްރަތުކުރުމަކީ ފައިދާހުރި ކަންކަމެވެ. ލޭގައި ދަގަނޑުގެ މާއްދާ މަދުނަމަ ޑޮކްޓަރުން އައިރަން ސަޕްލިމެންޓް ދީފާނެއެވެ.
ނާކޮލެޕްސީ ކޮންޓްރޯލްކުރުމަށްވެސް ދިރިއުޅުމުގެ އާދަތަކަށް ބަދަލުގެނެވިދާނެއެވެ. ދުވާލުގަޑީގައި ކުރުކޮށް ނިދާލުމަށް ވަގުތުތަކެއް ކަނޑައެޅުމާއި، ކޮންމެ ދުވަހަކުވެސް އެއް ގަޑިއަކަށް ނިދާފައި ހޭލުމަށް އާދަކުރުން މުހިންމެވެ. ގަވާއިދުން ކަސްރަތުކުރުމާއި، ނިދުމުގެ ހަތަރު ގަޑިއިރު ކުރިން ކެފެއިން ހިމެނޭ ބުއިންތަކާ ދުރުވުމާއި، ދުންފަތުގެ އިސްތިއުމާލުކުރުން ހުއްޓާލުމަކީ ނިދީގެ ފެންވަރު ރަނގަޅުކޮށްދޭ ކަންކަމެވެ. ޑިޕްރެޝަނަށް ފަރުވާ ހޯދުމަކީވެސް ނިދުމުގެ މައްސަލަތަކަށް އޮތް ހައްލެކެވެ. މީގެ ތެރޭގައި ތެރަޕީ ހޯދުމާއި، ބޭސް ބޭނުންކުރުމާއި، ރަނގަޅު ކާނާ ކެއުމާއި ސްޓްރެސް ކޮންޓްރޯލްކުރުން ހިމެނެއެވެ. ބައެއް ހާލަތްތަކުގައި ސީދާ ސަބަބެއް ނޭނގި އާދަޔާޚިލާފަށް ނިދިއަންނަ މައްސަލަ (އިޑިއޯޕެތިކް ހައިޕަރސޮމްނިއާ) އަށް ޑޮކްޓަރުން ސްޓިމިއުލަންޓް ބޭސްތަކާއި ކެއުމުގެ އާދަތަކަށް ގެންނަ ބަދަލުތައް ލަފާދެއްވައެވެ.
ހަށިގަނޑަށް ބޭނުންވާ މުހިންމު މާއްދާތައް މަދުވުމަކީވެސް އަބަދު ނިދިއަންނަން މެދުވެރިވާ ސަބަބެކެވެ. ލޭގައި ދަގަނޑުގެ މާއްދާއާއި ވިޓަމިން ބީ ކޮމްޕްލެކްސް މަދުވުމުން ވަރުބަލިވެ ނިދިއާދެއެވެ. ހަށިގަނޑަށް ބޭނުންވާ ޕްރޮޓީންއާއި، ފައިދާހުރި ސަރުބީއާއި ކާބޯހައިޑްރޭޓްސް ނުލިބޭ ފަދަ ހަރުކަށި ޑައިޓްތައް ކުރުމަކީ ހަކަތަ ދަށްވެ ނިދިއަންނަން މެދުވެރިވާ ކަމެކެވެ. މޫސުމަށް އަންނަ ބަދަލުތަކުގެ ސަބަބުން، ހާއްސަކޮށް ހޫނު ގަދަވެފައި ވައި ނުސާފު ދުވަސްވަރުވެސް އާދަޔާޚިލާފަށް ނިދިއައުން އެކަށީގެންވެއެވެ. ނަމަވެސް ގިނަ ވަގުތު ނިދުމަށްފަހުވެސް އަބަދު ނިދިއަންނަ ގޮތް ވާނަމަ، މިއީ އަމިއްލައަށް ހައްލުކުރަން އުޅުމުގެ ބަދަލުގައި ސިއްހީ މާހިރެއްގެ ލަފާ ހޯދަންޖެހޭ ކަމެކެވެ. ޑޮކްޓަރަކަށް ދެއްކުމުން ލޭގެ ޓެސްޓުތަކާއި ސްލީޕް ސްޓަޑީތައް މެދުވެރިކޮށް އަސްލު މައްސަލަ ދެނެގަނެ، އެކަމަށް އެންމެ އެކަށީގެންވާ ފަރުވާގެ ޕްލޭނެއް އެކުލަވާލެވޭނެއެވެ.
މައުލޫމާތު: ހެލްތު ލައިން