ފަލަސްތީނުގެ އަންހެން ގައުމީ ފުޓުބޯޅަ ޓީމުގެ ކުޅުންތެރިޔާ އުމުރުން 20 އަހަރުގެ ރަންދު ހަލަވާނީ ހައްޔަރުކުރުމަށްފަހު، އޭނާގެ ބަންދުގެ މުއްދަތު އިސްރާއީލުގެ ކަމާބެހޭ ފަރާތްތަކުން އަންނަ ހުކުރު ދުވަހާ ހަމައަށް އިތުރުކޮށްފިއެވެ.
ފަލަސްތީނުގެ އޮފިޝަލުންނާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، އޭނާ އަދިވެސް ހުރީ އިސްރާއީލުގެ ބަންދުގައެވެ. މިއީ ފަހަކަށް އައިސް ފަލަސްތީނުގެ ކުޅިވަރު ކުޅުންތެރިންނަށް އަމާޒުކޮށް އިސްރާއީލުން ހިންގަމުންދާ ހަރަކާތްތަކުގެ ތެރެއިން ހިންގި ކަމެކެވެ. ކުޅިވަރުގެ މައިދާނުގައި ފަލަސްތީނު ތަމްސީލުކުރާ ޒުވާނުންނަށް މިފަދަ ހުރަސްތައް ކުރިމަތިކުރުމަކީ އާންމުކޮށް އިސްރާއީލުން ކުރަމުން އަންނަ ކަމެއް ކަމަށް ފަލަސްތީނުގެ ކުޅިވަރާބެހޭ އިދާރާތަކުން ބުނެއެވެ.
ގުދުސްގެ ގަވަރުނަރޭޓުން ބުނި ގޮތުގައި، ރަންދު ހައްޔަރުކޮށްފައިވަނީ މިދިޔަ އަންގާރަ ދުވަހު ހުޅަނގު ގުދުސްގައި ހުންނަ ތަލްޕިއޮޓް ފުލުހުންގެ މަރުކަޒަށް ސުވާލުކުރުމަށް ހާޒިރުވުމަށް އެންގުމަށްފަހުގައެވެ. އެ މަރުކަޒަށް ހާޒިރުވުމުން އޭނާ ހައްޔަރުކޮށް، ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދުގެ މުއްދަތު އިތުރުކުރުމަށް އަމުރުކޮށްފައެވެ.
ނަމަވެސް، އޭނާ ފުލުހުންގެ މަރުކަޒަށް ހާޒިރުކުރި ސަބަބެއް އަދި ހައްޔަރުކުރި ސަބަބެއް ވެސް އިސްރާއީލުގެ ކަމާބެހޭ ފަރާތްތަކުން ހާމަކޮށްފައެއް ނުވެއެވެ. މިކަމާ ގުޅިގެން ފަލަސްތީނުގެ ފުޓުބޯޅަ އެސޯސިއޭޝަން (ޕީއެފްއޭ) އިން ވަނީ ކަންބޮޑުވުން ފާޅުކޮށްފައެވެ. އެ އެސޯސިއޭޝަނުން ބުނި ގޮތުގައި، އެއްވެސް ކުށަކާ ނުލައި ކުޅުންތެރިން ހައްޔަރުކުރުމަކީ ބައިނަލްއަގުވާމީ ކުޅިވަރުގެ އުސޫލުތަކާ ޚިލާފު ކަމެކެވެ.
ރަންދުގެ އިތުރުން، ފަލަސްތީނުގެ އަންހެން ގައުމީ ޓީމުގެ ކުރީގެ ކުޅުންތެރިޔާ ނަތާލީ އަބޫ ދިޔާވެސް ވަނީ އަންގާރަ ދުވަހު ހައްޔަރުކޮށްފައެވެ. ބިރްޒެއިތް ޔުނިވާސިޓީގައި ތައުލީމު ހާސިލުކުރަމުންދާ ނަތާލީ ހައްޔަރުކޮށްފައިވަނީ އިސްރާއީލުގެ ސިފައިން އޭނާ ދިރިއުޅޭ ގެއަށް ވަދެ ފާސްކުރުމަށްފަހު ކަމަށް ޕީއެފްއޭއިން ބުނެފައިވެއެވެ. މީގެ އިތުރުން، ފަލަސްތީނުގެ އެތުލީޓުންނަށް އިސްރާއީލުން އަޅަމުންދާ ފިޔަވަޅުތަކުގެ ދަށުން، ފުޓުބޯޅަ ކުޅުންތެރިޔާ މުސާބް އަބޫ ސާލިމް ފުރައިގެން ދިއުންވެސް ވަނީ މަނާކޮށްފައެވެ.
ޕީއެފްއޭއިން ބުނި ގޮތުގައި، އެލެންބީ ބްރިޖް ކްރޮސިންގް ސަރަހައްދުން އިސްރާއީލުގެ އޮފިޝަލުން ވަނީ މުސާބް ހުއްޓުވައި، އޭނާއާ ސުވާލުކުރުމަށްފަހު އިޓަލީއަށް ދިއުމަށް ހުރަސްއަޅާފައެވެ. އޭނާ ދަތުރުކުރަން އުޅުނީ ފަލަސްތީނުގެ ރައްޔިތުންނަށް އެހީތެރިވުމުގެ ގޮތުން ނަޕޯލީ ސްޓާސްއާ ދެކޮޅަށް ކުޅުމަށް ހަމަޖެހިފައިވާ ޚާއްސަ މެޗެއްގައި ބައިވެރިވުމަށް ފަލަސްތީން ސްޓާސް ޓީމާއެކުގައެވެ. މި މެޗަކީ ފަލަސްތީނުގެ ރައްޔިތުންނަށް ދިމާވެފައިވާ އިންސާނީ ކާރިސާއަށް އެހީތެރިވުމަށް ފަންޑު ހޯދުމަށް ރޭވިފައިވާ މެޗެކެވެ.
އޮކްޓޯބަރު 2023 ގައި އިސްރާއީލުން ޣައްޒާއާ ދެކޮޅަށް ފެށި ހަނގުރާމައަށްފަހު، ހިފާފައިވާ ހުޅަނގު އައްސޭރީގައި އިސްރާއީލު ސިފައިން ހިންގާ އޮޕަރޭޝަންތަކާއި، މީހުން ހައްޔަރުކުރުމާއި، ޣައިރު ގާނޫނީ އާބާދީތައް ފުޅާކުރުމުގެ މަސައްކަތް ވަނީ ވަރަށް ބޮޑަށް އިތުރުވެފައެވެ. ފަލަސްތީނުގެ އޮފިޝަލުން ހާމަކޮށްފައިވާ ތަފާސްހިސާބުތަކުން ދައްކާ ގޮތުގައި، މި ހަނގުރާމަ ފެށި ފަހުން ޣައްޒާގައި އެކަނިވެސް 800 އަށްވުރެ ގިނަ އެތުލީޓުން ވަނީ ޝަހީދުކޮށްލާފައެވެ. މީގެ ތެރޭގައި ގިނަ އަދަދެއްގެ ފުޓުބޯޅަ ކުޅުންތެރިންނާއި، ކޯޗުންނާއި، ކުޅިވަރު އޮފިޝަލުން ހިމެނެއެވެ. މީގެ ސަބަބުން ފަލަސްތީނުގެ ކުޅިވަރުގެ ދާއިރާއަށް ވަނީ ފޫނުބެއްދޭވަރުގެ ބޮޑު ގެއްލުމަކާ ކުރިމަތިލާންޖެހިފައެވެ.
ފަލަސްތީނިއަން ޕްރިޒަނާސް ކްލަބުން އާންމުކޮށްފައިވާ އެންމެ ފަހުގެ މައުލޫމާތުތަކަށް ބަލާއިރު، އިސްރާއީލުގެ ޖަލުތަކުގައި މިހާރުވެސް ފަލަސްތީނުގެ 89 އަންހެނުން ބަންދުކޮށްފައި އެބަތިއްބެވެ. މީގެ ތެރޭގައި ކުޑަކުދިންނާއި މާބަނޑު އަންހެނުންވެސް ހިމެނޭކަމަށް އެ ޖަމިއްޔާއިން ފާހަގަކޮށްފައިވެއެވެ. އަދި އިސްރާއީލުގެ ޖަލުތަކުގައި ބަންދުކޮށްފައިވާ ފަލަސްތީނު ރައްޔިތުންގެ ޖުމްލަ އަދަދު މިހާރު ވަނީ 9،400 އަށްވުރެ މައްޗަށް ގޮސްފައެވެ. ކުޅިވަރު ކުޅުންތެރިންނަށް އަމާޒުކޮށް ހިންގާ މިފަދަ އަމަލުތަކަކީ ބައިނަލްއަގުވާމީ ކުޅިވަރުގެ ގާނޫނުތަކާއި އިންސާނީ ހައްގުތަކާ ޚިލާފު އަމަލުތަކެއް ކަމަށް ބުނެ، ފަލަސްތީނުގެ ކަމާބެހޭ ފަރާތްތަކުން ދަނީ ފީފާ ފަދަ ބައިނަލްއަގުވާމީ ޖަމިއްޔާތަކުގެ ސަމާލުކަމަށް މި މައްސަލަ ގެނައުމަށް މަސައްކަތްކުރަމުންނެވެ.