ގާޒާގައި އިސްރާއީލުގެ އަނިޔާވެރި ސިފައިން ޝަހީދުކޮށްލި ފަލަސްތީނުގެ އުމުރުން އެންމެ ފަސް އަހަރުގެ ހިންދު ރަޖަބުގެ ހަގީގީ ހާދިސާގެ މައްޗަށް ބިނާކޮށް އުފައްދާފައިވާ، އަދި އޮސްކާ އެވޯޑަށް ނޮމިނޭޓްވެފައިވާ ފިލްމު "ދަ ވޮއިސް އޮފް ހިންދު ރަޖަބު" އިންޑިއާގައި ދެއްކުމުގެ ހުއްދަ އެގައުމުގެ ސެންސަރު ބޯޑުން ދީފިއެވެ.
އިންޑިއާގެ ސެންސަރު ބޯޑުން މި ފިލްމު ފާސްކުރުމާ ގުޅިގެން މި މަހުގެ 19 ވަނަ ދުވަހު "ދަ ވޮއިސް އޮފް ހިންދު ރަޖަބު" ސިނަމާތަކަށް ގެނައުމަށް އަންނަނީ ތައްޔާރުވަމުންނެވެ.
މި ފިލްމު އެންމެ ފުރަތަމަ އިންޑިއާގައި ރިލީޒްކުރަން ތާވަލު ކުރެވުނީ މި އަހަރުގެ މާޗު މަހުއެވެ. ނަމަވެސް، އިންޑިއާގެ ސެންޓްރަލް ބޯޑް އޮފް ފިލްމް ސެޓިފިކޭޝަންއިން ފިލްމު ފާސްކުރުން ލަސްވުމާ ގުޅިގެން ފިލްމު ނެރުން އޮތީ މަޑުޖެހިފައެވެ.
މި އަހަރު ބޭއްވި 98 ވަނަ އެކަޑަމީ އެވޯޑްސްގެ ބެސްޓް އިންޓަނޭޝަނަލް ފިލްމު ކެޓަގަރީން ނޮމިނޭޓްވެފައިވާ މި ފިލްމު، އިންޑިއާގެ އިތުރުން ޕާކިސްތާން، ލަންކާ، ދިވެހިރާއްޖެ، އަފްޣާނިސްތާން އަދި ބަންގްލަދޭޝްގައި ދެއްކުމުގެ ހައްގު ހޯދާފައި ވަނީ ޖައި ވިރާތުރާ އެންޓަޓައިންމަންޓް ލިމިޓެޑްގެ ޑިސްޓްރިބިއުޓަރު މަނޯޖް ނަންދުވާނާއެވެ.
ނަންދުވާނާ ނެރުނު ބަޔާނެއްގައި ބުނެފައި ވަނީ، އެއްވެސް މަންޒަރެއް އުނިކުރުމެއް ނެތި "ދަ ވޮއިސް އޮފް ހިންދު ރަޖަބު" ފާސްކޮށްދިނުމުން އިންޑިއާގެ ސެންސަރު ބޯޑަށް ވަރަށް ބޮޑަށް ޝުކުރު އަދާކުރާ ކަމަށެވެ.
މިއީ އިންސާނީ ތަފާތު ތަޖުރިބާތަކާއި، ވާހަކަތަކާއި، މަޝްވަރާތަކަށް މަގުފަހިކޮށްދޭ ބާރުގަދަ ވަސީލަތެއް ކަމަށް ގަބޫލުކުރާ ކަމަށާއި، ބޯޑުން މި ފިލްމާމެދު ބެހެއްޓި ފަރުވާތެރިކަން ފާހަގަކުރާ ކަމަށްވެސް އޭނާ ވަނީ ބުނެފައެވެ.
ފިލްމު "ދަ ވޮއިސް އޮފް ހިންދު ރަޖަބު"ގެ ޑައިރެކްޓަރު އެ ފިލްމުގެ ކާސްޓުންނާ އެކު--ފޮޓޯ/ޓެލެގްރާފްއިންޑިއާ
ޓިއުނީޝިއާގެ މަޝްހޫރު ޑައިރެކްޓަރު ކައުތަރު ބިން ހަނިއްޔާ އުފައްދާފައިވާ މި ފިލްމަކީ، އިސްރާއީލާއި ގާޒާއާ ދެމެދު ކުރަމުންދާ ހަނގުރާމައިގެ ތެރޭގައި ޝަހީދުވި ހިންދު ރަޖަބުގެ ހިތްދަތި ހާދިސާއަށް އަލިއަޅުވާލާ ފިލްމެކެވެ. މި ހާދިސާއާ ގުޅިގެން މުޅި ދުނިޔޭގެ ނުރުހުން އިހުނަށްވުރެ ބޮޑަށް އިސްރާއީލަށް ވަނީ އަމާޒުވެފައެވެ.
ނަންދުވާނާ އިތުރަށް ބުނި ގޮތުގައި، "ދަ ވޮއިސް އޮފް ހިންދު ރަޖަބު" އަކީ ހަނގުރާމައިގެ ސަބަބުން އިންސާނުންނަށް ކުރާ އަސަރާއި، އިންސާނުންގެ ކެތްތެރިކަން ދައްކުވައިދޭ އަސަރުގަދަ ފިލްމެކެވެ.
ހިންދު ރަޖަބަކީ 2024 ވަނަ އަހަރުގެ ޖަނަވަރީ މަހު އޭނާގެ އާއިލާއާ އެކު ގާޒާ ސިޓީން ފިލަން މަސައްކަތް ކުރަނިކޮށް، އިސްރާއީލުގެ ސިފައިން އެމީހުން ދަތުރުކުރި ކާރަށް ދިން ހަމަލާގައި ޝަހީދުވި ކުއްޖެކެވެ.
އެ ހަމަލާގައި އޭނާގެ އާއިލާގެ ހުރިހާ މެންބަރުން ޝަހީދުވިއިރު، ފަލަސްތީނުގެ ރެޑް ކްރެސެންޓުން އެ ކާރުގައި ތިބި މީހުންނާ ގުޅަން މަސައްކަތް ކުރުމުން، ފޯނަށް ޖަވާބުދީ އޭނާ ސަލާމަތްކޮށްދިނުމަށް އެދި ރޮމުން އާދޭސްކުރީ ހިންދުއެވެ.
ހިންދުއާއި އޭނާގެ އާއިލާގެ ހަށިތަކުގެ އިތުރުން، އޭނާ ސަލާމަތްކުރަން ދިޔަ ރެޑް ކްރެސެންޓުގެ ދެ މުވައްޒަފުންގެ ހަށިގަނޑު ފެނުނީ އެކަކު އަނެކަކާ ދާދި ގާތުންނެވެ. ޑައިރެކްޓަރު ހަނިއްޔާ މި ފިލްމުގައި ރެޑް ކްރެސެންޓުގެ މުވައްޒަފުންގެ ރޯލަށް އެކްޓަރުން ބޭނުންކުރި ނަމަވެސް، މި ހިތްދަތި ހާދިސާ ކިޔައިދިނުމަށް ބޭނުންކޮށްފައި ވަނީ ހިންދު ރަޖަބުގެ އަސްލު އަޑެވެ.
"ހިންދު ރަޖަބުގެ އަޑު އިވުމުން އަހަންނަށް ކުރެވުނީ ވަރަށް އަސަރުގަދަ އިހުސާސެއް. އެ އަޑާ އެކު އަހަރެންގެ ހިތުގައި ބޮޑު ރުޅިވެރިކަމަކާއި މާޔޫސްކަމެއް އުފެދުނު. އެ އަޑު ކަންފަތުގައި ހަރުލާފައި ހުރުމުން އާދައިގެ ދިރިއުޅުމަކަށް އެނބުރި ދިއުން ދަތިވި. އެހެންވެ، ކުރިން ނިންމަން އުޅުނު ފިލްމުގެ މަސައްކަތް ހުއްޓާލީ. އަހަރެން ހިތަށްއެރި މިއީ އެ ފިލްމު ނިންމަންވީ ވަގުތެއް ނޫނޭ. އެއްވެސް ކަމެއް ނުކޮށް ހުރުމަކީ މި ހަނގުރާމައިގެ ޖަރީމާގައި ބައިވެރިވުން ފަދަ ކަމެއް ކަމަށް އަހަންނަށް އިހުސާސް ކުރެވުނު. އެހެންވެ، މި ފިލްމު އުފެއްދީ އެ އިހުސާސްތަކާއި، އައި ރުޅިއާއި، މިއީ މިވަގުތުން މިވަގުތަށް ކުރަންޖެހޭ ކަމެއް ކަމަށް ފެންނާތީ،" ހަނިއްޔާ ބުނެފައިވެއެވެ.