ބޮލީވުޑްގެ ތަޖުރިބާކާރު އެކްޓަރު ބޮބީ ޑިއޯލް އާއި ބަތަލާ އާލިއާ ބަޓް އެކީގައި މަސައްކަތް ކުރަމުން އަންނަ ފިލްމު "އަލްފާ"ގެ ސެޓުގައި ދެ ތަރިންގެ މެދުގައި މައްސަލައެއްޖެހުނު ކަމަށް ދެކެވޭ ވާހަކަ ބޮބީ ދޮގުކޮށްފިއެވެ.
ޔަޝް ރާޖް ފިލްމްސްގެ ކުރިއަށް އޮތް ސްޕައި ތުރިލާ 'އަލްފާ'ގެ ޝޫޓިންގްތެރޭ ދެ ތަރިންގެ މެދުގައި ހިތްހަމަނުޖެހުންތަކެއް އުފެދިގެން އުޅޭ ކަމުގެ ވާހަކަތައް އިންޓަނެޓުގައި ވަރަށް ބާރަށް ފެތުރިގެން ދިއުމާ ގުޅިގެން، ސަޕޯޓަރުން ވެސް އައީ އެކަމަށް ޝައްކު ކުރަމުންނެވެ.
ނަމަވެސް، ބޮބީ މިހާރު ވަނީ މި ރިޕޯޓްތަކަށް ރައްދުދީ، ސެޓުގައި އެފަދަ އެއްވެސް ކަމެއް ހިނގާފައި ނުވާކަން ސާފުކޮށްދީފައެވެ.
'އިންޑިއާ ޓީވީ'އަށް ދިން އިންޓަވިއުއެއްގައި ބޮބީ ހާމަކުރި ގޮތުގައި، އެ ހަބަރުގެ ސްކްރީންޝޮޓެއް ރަހްމަތްތެރިޔަކު ފޮނުވުމުން ލިބުނީ ވަރަށް ބޮޑު ހައިރާންކަމެކެވެ.
ބޮބީ ބުނި ގޮތުގައި، ބައެއް މީހުންނަކީ އެއްވެސް މަސައްކަތެއް ނެތި ހުސްކޮށް ތިބޭ ބައެކެވެ. އެހެންވެ، ހިތަށް އައިހާ އެއްޗެއް ލިޔެގެން ދޮގު ވާހަކަތައް އުފައްދަނީއެވެ.
ފިލްމު "އަލްފާ"ގެ ބަތަލާއިން ކަމަށްވާ ޝަރުވަރީ ވާގް އަދި އާލިއާ ބަޓް--ފޮޓޯ/ބޮލީވުޑްހަންގާމާ
މީގެ އިތުރުން ބޮބީ ވަނީ އާލިއާގެ މަސައްކަތަށް ވަރަށް ބޮޑަށް ތައުރީފުކޮށްފައެވެ. އާލިއާއަކީ ވަރަށް ކުޅަދާނަ އަދި ޕްރޮފެޝަނަލް އެކްޓަރެއް ކަމަށާއި، ފިލްމުގައި ހިމެނޭ ވަރުގަދަ އެކްޝަން މަންޒަރުތަކަށް އޭނާ ވަރަށް ބޮޑަށް ތައްޔާރުވެ، ބުރަކޮށް މަސައްކަތް ކުރި ކަމަށް ބޮބީ ފާހަގަކުރިއެވެ.
"އަހަންނަކަށް ނުވިސްނުނު ކާކު ކީއްކުރަން އުފެއްދި ވާހަކަތަކެއް ކަމެއް. ކޮންމެ މީހަކަށް އެއީ ދޮގެއްކަން ސާބިތުކޮށްދޭކަށް އަހަރެން ނޫޅޭނަން. އެއީ ހަގީގަތެއް ނޫން. އިންސްޓަގްރާމުން މީހުންނަށް ނުފޫޒު ފޯރުވި ނަމަވެސް، އޭގައި ހުންނަ 90 އިންސައްތަ ވާހަކައަކީ ތެދެއް ނޫން،" ބޮބީ ބުނެފައިވެއެވެ.
ޔާޝް ރާޖް ފިލްމްސްގެ 'ސްޕައި ޔުނިވާސް'އިން ގެނެސްދޭ "އަލްފާ" އަކީ ޝިވް ރަވައިލް ޑައިރެކްޓްކޮށް އަދިތިޔަ ޗޯޕްރާ ޕްރޮޑިއުސްކުރާ ފިލްމެކެވެ. އާލިއާ އާއި ބޮބީގެ އިތުރުން މި ފިލްމުގެ މުހިއްމު ރޯލަކުން ބަތަލާ ޝަރުވަރީ ވާގް އަދި އަނިލް ކަޕޫރު ވެސް ފެންނާނެއެވެ.
މި ފިލްމު ރިލީޒްކުރަން ތާވަލުކޮށްފައި ވަނީ އަންނަ މަހުގެ 10 ވަނަ ދުވަހަށެވެ.