ކުދިކުދި ހުޅުތަކުގައި ހުންނަ މައްސަލަތައް 'ނެނޯ ނީޑަލް' ބޭނުންކޮށްގެން ދެނެގަނެވޭ އޮޕަރޭޝަނެއް އައިޖީއެމްއެޗާއި ދަރުމަވަންތަ ހޮސްޕިޓަލުގައި އިއްޔެ ފަށައިފިއެވެ.
އައިޖީއެމްއެޗުން ބުނި ގޮތުގައި، މިއީ ކުދި ހުޅުތަކުގައި އާތްރޯސްކޯޕީގެ ވަރަށް ކުޑަ ލޯވަޅަކުން އެތެރޭގައި ހުންނަ މައްސަލަތައް ނެނޯ ނީޑަލް ބޭނުންކޮށްގެން ބަލައިގެން ކުރާ އޮޕަރޭޝަނެކެވެ. އެ ހޮސްޕިޓަލު ބުނީ، މިއީ މުޅިން އަލަށް ރާއްޖޭގައި ފެށި އޮޕަރޭޝަނެއް ކަމަށެވެ.
ނެނޯ ނީޑަލްއަކީ ހަށިގަނޑުގެ ހަނި ދޭތެރެއިން ވައްދައި، ބެންޑުކޮށްގެން ވެސް ބެލޭ ކެމެރާއެކެވެ.
އެ ކެމެރާގެ ސަބަބުން، ހުޅު ތެރެއަށް ވެފައި ހުންނަ ގެއްލުންތައް ބަލައި، ވަށައިގެން ހުންނަ ލިގަމެންޓުތަކަށް ހާލަތު އެމްއާރުއައި ނުހަދާ ބެލޭނެ ކަމަށް އައިޖީއެމްއެޗުން ބުނެއެވެ. އެއީ، ކުދި ހުޅުތަކުގެ ފަރުވާއަށް ލިބުނު ބޮޑު ކުރިއެރުމެއްގެ ގޮތުގައި އެ ހޮސްޕިޓަލުން ސިފަކުރެއެވެ.
މީގެ އިތުރުން، ކުދި ފެޅުންތަކުން ކުރެވޭ އޮޕަރޭޝަންތައް އިތުރުވުމަކީ އެނެސްތީސިއާގައި ފަރުވާ ދިނުމަށް ވަރަށް ފަސޭހަވާ ކަމަށް އައިޖީއެމްއެޗުން މައުލޫމާތުދެއެވެ. އަދި، ސާޖަރީގެ ތެރެއިންނާއި ފަހުން އަންނަ ތަދުތަކާއި ރިހުން ކޮންޓްރޯލްކުރުމަށް ފަސޭހަވެ، އޮޕަރޭޝަން ނިންމާލާފައި ގެއަށް ދެވޭ ވަރު މި އޮޕަރޭޝަނާ އެކު އަވަސްވާނެކަން އެ ހޮސްޕިޓަލުން ފާހަގަކުރެއެވެ.