ވީވޯ ކުންފުނީގެ އެންމެ ފުރަތަމަ ވަޔަލެސް އޯވާ-އިއާ ހެޑްފޯން ޗައިނާގެ ބާޒާރަށް ރަސްމީކޮށް ތައާރަފްކޮށްފިއެވެ.
ބްރީޒް ޕާޕަލް އަދި ކްލައުޑްސް އެންޑް މިސްޓް ކުލައިގައި ނެރެފައިވާ މި ހެޑްފޯނަކީ ކަންފަތް ނިވާވާނެހެން ފަރުމާކޮށްފައިވާ ބޭންޑް ސްޓައިލްގެ އުފެއްދުމެކެވެ. މިއީ މިއުޒިކް ކޮލިޓީ ރަނގަޅުކުރުމަށްޓަކައި 40 އެމްއެމްގެ ޑައިނަމިކް ޑްރައިވަރަކާއި ބީއީއެސް2710ވައި-8އެކްސް ޗިޕެއް ހަރުކުރެވިގެން އުފައްދާފައިވާ ހެޑްފޯނެކެވެ.
މި ހެޑްފޯނުގެ އެންމެ ހާއްސަ އެއް ފީޗާ އަކީ ވަށައިގެން އިވޭ ބޭރުގެ އަޑުތައް ނުވަތަ ނޮއިސް ކެންސަލް ކޮށްދިނުމުގެ ގާބިލުކަމެވެ. އެގޮތުން ބޭރުގެ އަޑުތައް 58 ޑެސިބެލްއާ ހަމައަށް ކަނޑާލައި، ވަށައިގެންވާ މާހައުލަށް ބަލައި ލައިޓް، ނޯމަލް އަދި ޑީޕް މޯޑަށް އަމިއްލައަށް ބަދަލުވުމުގެ ގާބިލުކަން މީގައި އެކުލެވިގެންވެއެވެ.
މީގެ އިތުރުން ފޯނު ކޯލްތަކުގެ އަޑު ސާފުކޮށްދިނުމަށްޓަކައި ތިން އީސީއެމް މައިކްރޯފޯނާއި ދެ އެމްއީއެމްއެސް މައިކްރޯފޯން މި ހެޑްފޯނުގައި ހިމަނާފައިވެއެވެ.
ބެޓެރީގެ ގޮތުން ބަލާއިރު، އެއްފަހަރު ފުލްކޮށް ޗާޖުކޮށްލައިގެން 75 ގަޑިއިރާ ހަމައަށް މި ހެޑްފޯން ބޭނުންކުރެވޭނެ ކަމަށް ވީވޯ އިން ހާމަކުރެއެވެ. ޔޫއެސްބީ ޓައިޕް-ސީ ޕޯޓް މެދުވެރިކޮށް މި ހެޑްފޯން މުޅިން ފުލްކޮށް ޗާޖުކޮށްލުމަށް ހޭދަވަނީ ގާތްގަނޑަކަށް 2.5 ގަޑިއިރެވެ.
ޓެކްނޮލޮޖީގެ ގޮތުން ބަލާއިރު ބްލޫޓޫތު 5.4 ސަޕޯޓްކުރާ މި ހެޑްފޯނުން އެއްފަހަރާ ތިން ޑިވައިސްއަކާ ގުޅާލެވޭނެއެވެ. މީގެ ތެރޭގައި ސްމާޓްފޯނާއި، ޓެބްލެޓް އަދި ކޮމްޕިއުޓަރު ހިމެނޭއިރު، 'ވީވޯ ހެޑްފޯންސް' އެޕްލިކޭޝަން މެދުވެރިކޮށް އަޑުގެ ސެޓިންގްސްތައް ކޮންޓްރޯލް ކުރެވޭނެއެވެ. އަދި ގޭމް ކުޅޭ މީހުންނަށް ހާއްސަކޮށް 47 މިލިސެކަންޑުގެ ލޯ-ލެޓެންސީ މޯޑެއްވެސް މީގައި ހިމަނާފައިވެއެވެ.
ސްމާޓްފޯނުގެ ބާޒާރުގައި ބޮޑު މަގުބޫލުކަމެއް ހޯދާފައިވާ ވީވޯ ކުންފުންޏަކީ މީގެ ކުރިން ވެސް 'ޓްރޫ ވަޔަލެސް ސްޓީރިއޯ' (ޓީޑަބްލިއުއެސް) އިއަބަޑްސްގެ ގިނަ މޮޑެލްތަކެއް ބާޒާރަށް ނެރެފައިވާ ކުންފުންޏެކެވެ. ނަމަވެސް، މިއީ ކަންފަތް މުޅިން ނިވާވާނެހެން ފަރުމާކޮށްފައިވާ 'އޯވަ-އިއާ' ހެޑްފޯންގެ ކެޓަގަރީއަށް އެ ކުންފުނިން ކާމިޔާބުކަމާއެކު ފައިތިލަސާބިތުކުރި ފުރަތަމަ ފަހަރެވެ.
ޓެކްނޮލޮޖީގެ ދާއިރާގައި ފޯނު އުފައްދާ އެހެން ބޮޑެތި ކުންފުނިތަކުން އޯޑިއޯ ޑިވައިސްތަކުގެ މާކެޓަށް އަމާޒުކޮށް ގިނަ އުފެއްދުންތަކެއް ނެރެމުންދާ ދަނޑިވަޅެއްގައި، ވީވޯ އިން މި ނެރުނު އާ ހެޑްފޯނަކީ އެޕަލް އަދި ސޮނީ ފަދަ ބްރޭންޑުތަކުގެ ހެޑްފޯންތަކާ އަގުގެ ގޮތުންނާއި ފީޗާސްތަކުގެ ގޮތުން ވާދަކޮށްލެވޭނެ ފަދަ، ޒަމާނީ ފަންނުވެރިކަން އެކުލެވޭ އުފެއްދުމެއްގެ ގޮތުގައި ޓެކް މާހިރުން ފާހަގަކުރެއެވެ.
ބަރުދަނުގައި ގާތްގަނޑަކަށް 238 ގްރާމް ހުންނަ މި ހެޑްފޯން ޗައިނާގެ ބާޒާރުގައި ވިއްކަން ކަނޑައަޅާފައިވަނީ 499 ޗައިނީޒް ޔުއާން (ގާތްގަނޑަކަށް 73.75 އެމެރިކާ ޑޮލަރު) އަށެވެ.