ބޮލީވުޑްގެ އެންމެ ކާމިޔާބު ބަތަލާއިންގެތެރޭ ހިމެނޭ އާލިއާ ބަޓް އަކީ، ބޮލީވުޑްގައި އުޅެން ދަންނަ 'ބޮލީވުޑްގެ ގޭމް' ރަނގަޅަށް ކުޅެން އެނގޭ ފަންނާނެ ކަމަށް ޕޫޖާ ބަޓް ބުނެފިއެވެ.
ނަވާރަސަތޭކަ އަށްޑިހައިގެ ފަހުކޮޅު ފިލްމީ ދާއިރާގައި ވިދާލި ބަތަލާ ޕޫޖާ ބަޓް، އޭނާގެ ކޮއްކޮ އާލިއާ ސިފަކޮށްފައި ވަނީ، ޕޫޖާގެ ކޮޕީއެއްގެ ގޮތުގައެވެ. އެހެންނަމަވެސް މިއަދާ ހަމައަށް ވެސް ދެ ބެއިންގެ މެދުގައި އެއްވެސް ކަހަލަ ވާދަވެރިކަމެއް ނެތް ކަމަށް ޕޫޖާ ވަނީ ބުނެފައެވެ.
ޕޫޖާ ފާހަގަކުރި ގޮތުގައި ބޮލީވުޑްގެ ކަންކަން ތަރުތީބުކޮށް، އެ ދާއިރާގައި ކުރިއަށްދާންވީ އެންމެ ފުރިހަމަ ގޮތް އާލިއާއަށް ވަރަށް ރަނގަޅަށް އެނގެއެވެ. ފިލްމީ ދާއިރާގައި ދެ މީހުން ގެންގުޅޭ އުސޫލުތައް ތަފާތުކަން ފާހަގަކުރަމުން ޕޫޖާ ބުނީ، އަށްޑިހައިގެ އަހަރުތަކުގައި އާލިއާ ގެންގުޅޭ ފަދަ ވިޔަފާރީގެ ތޫނުފިލިކަމެއް ޕޫޖާގެ ކިބައިގައި ނެތް ކަމަށެވެ.
އާލިއާ ބަޓް ޕޫޖާ ބަޓް އަދި ޝާހީން ބަޓްއާ އެކު--ފޮޓޯ/އިންޑިއަންއެކްސްޕްރެސް
"އާލިއާ އާއި އަހަރެން ވަރަށް ތަފާތު. އަހަރެން ފިލްމުތަކުގައި މަސައްކަތްކުރި ދުވަސް މިހާރު ފާއިތުވެއްޖެ. މިއީ މިހާރު އާލިއާގެ ދުވަސް. މި ދާއިރާގައި ކަންކަން ނިންމުމުގައި އާލިއާ ގެންގުޅޭ ހުޝިޔާރުކަމަކީ އަހަރެންގެ ކިބައިގައި އޭރު ހުރި ސިފައެއް ނޫން. އާލިއާ އަކީ ވަރަށް ބުއްދިވެރި ކުއްޖެއް. މި ދާއިރާގައި ކުރިއަށްދާން ބޭނުންވާ ހުނަރުތައް އާލިއާގެ ކިބައިގައި އެބަހުރި، އަދި އާލިއާ އެކަން ކުރަނީ އެހެން ބަތަލާއިންނަށް ނަމޫނާ ދައްކަމުން،" ޕޫޖާ ބުންޏެވެ.
އާލިއާގެ ތިން އަހަރުގެ ދަރިފުޅު ރަހާ، އޭނާގެ މައިންބަފައިން ފަދައިން ފިލްމީ ދާއިރާއަށް ނުކުމެދާނެތޯ ސުވާލުކުރުމުން ޕޫޖާ ބުނީ، ރަހާ އަކީ ފަންނާނަކަށް ވުމަށް އުފަންވެފައިވާ ކުއްޖެއް ކަމަށެވެ.
ނަމަވެސް މުސްތަގުބަލުގައި އޭނާ ނާސާގެ ސައިންސްވެރިއަކަށް ވެސް ވެދާނެ ކަމަށާއި، އެހެންނަމަވެސް އެ ކުއްޖާގެ ކިބައިގައި ހުރި ޖީންސްތަކާއި ފެންނަ ފެނުމުން އޭނާއަކީ ތަފާތު ކުއްޖެއްކަން އެނގޭ ކަމަށް ޕޫޖާ ބުންޏެވެ.
ޕޫޖާ އަކީ މަގުބޫލު ފިލްމު ޑައިރެކްޓަރު މަހޭޝް ބަޓްގެ ފުރަތަމަ ކައިވެންޏަށް ލިބުނު ދެ ކުދިންގެތެރެއިން އެންމެ ދޮށީ އަންހެން ކުއްޖާއެވެ. ބަތަލާ އާލިއާ ބަޓް އާއި ދައްތަ ޝާހީން ބަޓް އަކީ، މަހޭޝްގެ ދެވަނަ ކައިވެންޏަށް ލިބުނު ދެ ކުދިންނެވެ.