ބޮލީވުޑްގެ ޒުވާން އެކްޓަރު ވިޝާލް ތެޖުވާ އާއި އެކްޓަރުގެ މަންމަ، ތެލެސީމިއާ ކުދިންނަށް ލޭ ހަދިޔާކޮށް، ގިނަ ބައެއްގެ ލޯތްބާއި ތަރުހީބު ހޯދައިފިއެވެ.
ވިޝާލް އާއި އެކްޓަރުގެ މަންމަގެ ފަރާތުން ފޯރުކޮށްދިން މި އެހީތެރިކަމަކީ، އިންސާނިއްޔަތުކަމުގެ މަތިވެރި ނަމޫނާއެއް ދައްކުވައިދިން ކަމެއްގެ ގޮތުގައި ގިނަ ބަޔަކު ވަނީ ސިފަކޮށްފައެވެ.
މި ދީލަތި އަމަލަކީ ލޭ ހަދިޔާކުރުމުގެ މުހިންމުކަން ހާމަކޮށްދިނުމުގެ އިތުރުން، ފުރާނަ ސަލާމަތްކުރުމަށް ކުރެވޭ މިފަދަ މަސައްކަތްތަކުގައި ބައިވެރިވުމަށް ގިނަ ބަޔަކަށް ލިބުނު ބޮޑު ހިތްވަރެކެވެ.
ފިލްމު "މަރުދާނީ 2" އަދި "ހޯމްބައުންޑް"ގައި ދެއްކި މޮޅު އެކްޓިންގްއިން ބެލުންތެރިންގެ މަގުބޫލުކަން ހޯދާފައިވާ ވިޝާލް ވަނީ، ހަގީގީ ބަތަލަކީ ހަމައެކަނި ފިލްމުތަކުން ފެންނަ މީހެއް ނޫންކަން ސާބިތުކޮށްދީފައެވެ.
ވިޝާލް އެކްޓަރުގެ މަންމައާ އެކު--ފޮޓޯ/ބޮލީވުޑްހަންގާމާ
މުޅި އުމުރަށް ދާއިމީކޮށް ލޭ އަޅަންޖެހޭ ތެލެސީމިއާ ކުދިންނަށް އެހީވުމަށް ހިންގި މި ހަރަކާތުގެ ތެރެއިން ފެނުނު އެންމެ އަސަރުގަދަ މަންޒަރަކީ ވިޝާލްއާ އެކު އެކްޓަރުގެ މަންމަ މިކަމުގައި ބައިވެރިވުމެވެ.
"ލޭ ހަދިޔާކުރުމަކީ މީހަކަށް ދިރިއުޅުމުގެ ދެވަނަ ފުރުސަތެއް ދިނުމަށްޓަކައި ކުރެވޭނެ އެންމެ މަތިވެރި އެއް ކަންތައް. ދިރިހުރުމަށްޓަކައި ގަވާއިދުން ލޭ ހޯދަން މަޖުބޫރުވެފައިވާ ތެލެސީމިއާ ކުދިންނަށް އެހީތެރިވުމުގެ ފުރުސަތު ލިބުމަކީ އަހަންނާއި މަންމައަށް ލިބުނު ވަރަށް ބޮޑު ޝަރަފެއް" ވިޝާލް ބުނެފައިވެއެވެ.
ޓެލެވިޒަން ދާއިރާ ފަތަހަކުރުމަށްފަހު މިހާރު ފިލްމު އިންޑަސްޓްރީއާ ގުޅިފައިވާ ވިޝާލް މުހިއްމު ރޯލް ކުޅެފައިވާ އިތުރު ފިލްމުތަކުގެތެރޭ، "ޓައިގާ 3"، "ސަލާމް ވެންކީ" އަދި "އައިބީ 71" ހިމެނެއެވެ.
ބައިނަލް އަޤްވާމީ ޕްލެޓްފޯމްތަކުގައި ވެސް ބޮޑު މަގުބޫލުކަމެއް ހޯދުމަށްފަހު އިންޑިއާއިން މި އަހަރުގެ އޮސްކާ އެވޯޑުގައި ވާދަކުރަން ވެސް ނޮމިނޭޓްކުރި "ހޯމްބައުންޑް"އަކީ ވިޝާލްގެ ކެރިއަރުގެ އެންމެ ކާމިޔާބު ފިލްމުގެ ގޮތުގައި ބެލުންތެރިން ވަނީ ފާހަގަކޮށްފައެވެ.