ބޮލީވުޑްގެ ކުރީގެ މަގުބޫލު ބަތަލާ ކަރިޝްމާ ކަޕޫރުގެ މުޅިން އާ ވެބް ސީރީޒްއެއް ޒީ5އިން ގެނެސްދޭން ނިންމައި އެ ސީރީޒްގެ ޓީޒާ އާއްމުކޮށްފިއެވެ.
ޒީ5އިން "ބްރައުން"ގެ ނަމުގައި ގެނެސްދޭ މި ވެބް ސީރީޒްގައި ކަރިޝްމާ ފެންނާނީ މީގެކުރިން ކުޅެފައިނުވާ ކަހަލަ އަނދިރި އަދި ވަރަށް ވަރުގަދަ ކެރެކްޓާއެއްގައި ކަމަށް ރިޕޯޓުތަކުން ވަނީ ބުނެފައެވެ. ތުރިލާއެއްގެ ގޮތުގައި ގެނެސްދޭ މި ސީރީޒްގެ ވާހަކަ ބިނާކޮށްފައި ވަނީ، ސިލްސިލާ ގަތުލު އާއްމެއް ހިންގަމުން އަންނަ 'ސީރިއަލް ކިލާ'އެއް ހޯދުމަށް ކުރާ މަސައްކަތްތަކުގެ މައްޗަށެވެ.
އަބިނާވް ދިއޯ ޑައިރެކްޓްކޮށްފައިވާ މި ސީރީޒްގައި ސޫރިޔާ ޝަރުމާ، ސޯނީ ރަޒްދާން، ހެލެން، ކޭކޭ ރައިނާ އަދި ޖިޝޫ ސެންގުޕްތާ މުހިންމު ރޯލުތަކުން ފެންނާނެއެވެ. ޒީ ސްޓޫޑިއޯސްއިން އުފައްދާފައިވާ މި ސީރީޒަކީ އަބީކް ބަރޫއާ ލިޔެފައިވާ "ސިޓީ އޮފް ޑެތު" ފޮތުގެ މައްޗަށް ބިނާކޮށް އުފައްދާފައިވާ ސީރީޒެކެވެ.
"ރާޖާ ހިންދުސްތާނީ"، "ދިލް ތޯ ޕާގަލް ހޭ"، "ރާޖާ ބާބޫ"، "ކޫލީ ނަމްބަރު 1" އަދި "ޖުޅުވާ" ފަދަ މަޝްހޫރު ހިންދީ ފިލްމުތަކުން ފެނިފައިވާ ކަރިޝްމާ ބުނި ގޮތުގައި، "ބްރައުން"ގައި އޭނާ ކުޅޭ ރޯލަކީ މީގެ ކުރިން ދުވަހަކުވެސް ކުޅެފައިވާ ރޯލަކާ އެއްގޮތް ރޯލެއް ނޫނެވެ.
ވެބް ސީރީޒް "ބްރައުން"ގެ މަންޒަރެއްގައި ބަތަލާ ކަރިޝްމާ ކަޕޫރު--ފޮޓޯ/އިންޑިއަންއެކްސްޕްރެސް
"އަހަރެމެންނަކީ އަބަދުވެސް ކުރިއަރަމުން، ބަދަލުވަމުންދާ ބައެއް. މިހާރު އޯޓީޓީ ޕްލެޓްފޯމްތަކުގެ ސަބަބުން ކެރެކްޓަރެއްގެ ތަފާތު ފަރާތްތައް ދައްކާލުމުގެ ފުރުސަތު ފަހިވެއްޖެ. މި ސީރީޒްގައި އަހަރެން މަސައްކަތްކުރީ އަހަރެންގެ 'ކޮމްފަޓް ޒޯން' އިން ބޭރުގައި. ހަގީގީ ދިރިއުޅުމުގައި އަހަރެން ނުކުރާ ކަންތައްތަކެއް މި ސީރީޒްގައި ދައްކަން ޖެހުމުން، އެއީ އަހަރެންގެ ގާބިލިއްޔަތުކަން އިތުރަށް ވަރުގަދަކުރަން ލިބުނު ފުރުސަތެއް. އެއީ ވަރަށް ޝައުގުވެރި ތަޖުރިބާއެއް،" ޕީޓީއައިއަށް ދިން އިންޓަވިއުއެއްގައި 51 އަހަރުގެ ބަތަލާ ބުނެފައިވެއެވެ.
ރިލީޒްކުރާނެ ވަކި ތާރީޚެއް އަދި އިއުލާނު ނުކުރާ މި ވެބް ސީރީޒް އަކީ 2020 ވަނަ އަހަރު ކަރިޝްމާ އަލުން އެކްޓިން ދާއިރާއަށް ނުކުތް "މެންޓަލްހޫޑް"އަށް ފަހު އޭނާ ކުޅޭ ދެވަނަ ވެބް ސީރީޒްއެވެ.