ހިންދީ ސިނަމާގެ ލެޖެންޑަރީ އެކްޓަރު ދަރްމެންދުރަ ސިނަމާއަށް ކޮށްދިން ހިދުމަތުގެ އަގުވަޒަންކޮށް އިންޑިއާގެ ސަރުކާރުން ދޭ ދެވަނައަށް އެންމެ މަތީ މަދަނީ ޝަރަފު ކަމަށްވާ "ޕަދްމާ ވިބޫޝަން" އެކްޓަރަށް އަރުވައިފިއެވެ.
މި ޝަރަފު އެރުވީ އިންޑިއާގެ ރިޔާސީ ގަނޑުވަރު "ރާޝްތުރަޕަތީ ބަވަން" ގައި އިއްޔެ ބޭއްވި ހާއްސަ ރަސްމިއްޔާތެއްގައި އެ ގައުމުގެ ރައީސާ ދުރޫޕަދީ މުރުމޫއެވެ.
ކުރީގެ އެކްޓަރު ދަރްމެންދުރަގެ ފަރާތުން މި ޝަރަފާ ހަވާލުވީ އެކްޓަރުގެ ހަގު އަނބިމީހާ، ކުރީގެ މަޝްހޫރު ބަތަލާ އަދި ސިޔާސީ ދާއިރާގައި ހަރަކާތްތެރިވާ ހެމާ މާލިނީއެވެ. ހެމާއާ އެކު މި ރަސްމިއްޔާތުގައި އާއިލާގެ ފަރާތުން ދެން ބައިވެރިވީ ދަރިފުޅު އަހާނާ ޑިއޯލްއެވެ. އަހާނާ އަކީ ހެމާ އާއި ދަރޭގެ ކައިވެންޏަށް ލިބުނު ދެ އަންހެން ކުދިންގެތެރެއިން ހަގު ކުއްޖާއެވެ.
ގިނަ ދުވަސްތަކެއް ވަންދެން ބަލިވެ އުޅުމަށްފަހު ދަރްމެންދުރަ މަރުވީ މިދިޔަ ނޮވެމްބަރު މަހުގެ 24 ވަނަ ދުވަހުއެވެ. ހިންދީ ސިނަމާގެ "ހީ-މޭން"ގެ ނަމުން މަޝްހޫރުވި ދަރްމެންދުރާއަށް 2012 ވަނަ އަހަރު ވަނީ އިންޑިއާގެ ތިންވަނައަށް އެންމެ މަތީ މަދަނީ ޝަރަފު ކަމަށްވާ "ޕަދްމާ ބޫޝަން" ވެސް އަރުވާފައެވެ.
ދަރުމެންދްރަގެ ފަރާތުން ހެމާ "ޕަދްމާ ވިބޫޝަން" އެވޯޑާ ހަވާލުވަނީ--ފޮޓޯ/އިންޑިއަންއެކްސްޕްރެސް
ދަރްމެންދުރާ ފިލްމީ ދާއިރާއަށް ތައާރަފްވީ 1960 ވަނަ އަހަރު ނުކުތް "ދިލް ބީ ތޭރާ ހަމް ބީ ތޭރޭ"އިންނެވެ. ދަރޭއަށް ބޮޑު މަގުބޫލުކަމެއް ލިބުނީ 60ގެ އަހަރުތަކުގައި ނުކުތް "އަންޕަޅު"، "ބަންދިނީ"، "އަނޫޕަމާ" އަދި "އާޔާ ސާވަން ޖޫމް ކޭ" ފަދަ ފިލްމުތަކުންނެވެ.
އޭގެ ފަހުން "ޝޯލޭ"، "ދަރަމް ވީރް"، "ޗުޕްކޭ ޗުޕްކޭ"، "މޭރާ ގާއޮން މޭރާ ދޭޝް" އަދި "ޑްރީމް ގާލް" ފަދަ ފިލްމުތަކުން ދަރޭ ވަނީ ހިންދީ ސިނަމާގެގެ އެންމެ ކުރީ ސަފުގެ ބަތަލެއްގެ ގޮތުގައި ފާހަގަވެފައެވެ. ދަރޭ އެންމެފަހުން ބެލުންތެރިންނަށް ފެނިފައި ވަނީ، މި އަހަރުގެ ކުރީކޮޅު ރިލީޒްކުރި ފިލްމު "އިއްކީސް"ގެ ރޯލަކުންނެވެ.