ބީއެމްއެލް ސެންޓްރަލް ލީގުގެ އެންމެ ފަހު މެޗުގައި ދ. ކުޑަހުވަދޫން ގަވާއިދާ ހިލާފަށް ކުޅުންތެރިން ބޭނުންކުރި މައްސަލައެއް ސާބިތުވުމާ ގުޅިގެން، އެ މެޗުގެ ނަތީޖާ ބަދަލުކޮށް ކ.ހުރާއަށް ލީގުގެ ޗެމްޕިއަންކަން ދޭން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކޮމްޕެޓިޝަންސް ކޮމިޓީން ރަސްމީކޮށް ނިންމައިފިއެވެ.
މިއީ ރާއްޖޭގެ އެންމެ މަތީ ފަންތީގެ ފުޓްބޯޅަ މުބާރާތް ކަމަށްވާ ދިވެހި ޕްރިމިއާ ލީގަށް ކޮލިފައިވުމަށްޓަކައި އަތޮޅުތެރޭގެ ޒޯންތަކަށް ބަހާލައިގެން ކުރިއަށްގެންދާ ސަރަހައްދީ މުބާރާތުގެ ތެރެއިން، ފެނިގެންދިޔަ ބޮޑު ނިންމުމެކެވެ.
މި މައްސަލަ ކުރިމަތިވީ ލީގުގެ އެއްވަނަ ހޮވުމަށް ކުޅުނު އެންމެ ފަހު މެޗު، ފޯރިގަދަ ކުޅުމަކަށްފަހު ކުޑަހުވަދޫން ކާމިޔާބުކުރި ފަހުންނެވެ. އެ މެޗުން މޮޅުވެގެން ކުޑަހުވަދޫއަށް ތަށި އުފުލާލުމުގެ ފުރުސަތު އޮތް ނަމަވެސް އެފްއޭއެމުން ވަނީ އެ ނިންމުން މަޑުޖައްސާލާފައެވެ.
މެޗަށްފަހު އެފްއޭއެމްގެ ކޮމްޕެޓިޝަންސް ކޮމިޓީން މައްސަލަ ބެލުމަށްފަހު ހާމަކުރި ގޮތުގައި، ކުޑަހުވަދޫ ޓީމުން ވަނީ ބީއެމްއެލް ރީޖަނަލް ލީގުގެ ގަވާއިދުގެ 24.1 ވަނަ މާއްދާއާ ހިލާފުވެފައެވެ.
އެ ކޮމިޓީން ކަށަވަރުކޮށްދިން ގޮތުގައި، ކުރީގެ މެޗުތަކުގައި ރީނދޫ ކާޑު ހަމަވުމުގެ ސަބަބުން ސަސްޕެންޝަނުގައި ތިބި، އަދި އެ މެޗުގައި ކުޅުމުގެ އެއްވެސް ގާނޫނީ ހުއްދައެއް ނެތް ދެ ކުޅުންތެރިއަކު ކުޑަހުވަދޫން ވަނީ ދަނޑަށް ނެރެ ކުޅުވާފައެވެ. ސަސްޕެންޝަނުގެ އަމުރުގައި ތިބި ކުޅުންތެރިން ބޭނުންކުރުމަކީ މުބާރާތުގެ ފެއާޕްލޭ އުސޫލުތަކާ ހިލާފު ކަމަކަށް ވާއިރު، މިއީ މުޅި މެޗުގެ ނަތީޖާ ގަޑުބަޑުވެގެންދިޔަ މައިގަނޑު ސަބަބެވެ.
ސެންޓްރަލް ޒޯނުގެ ޗެމްޕިއަންކަން ހޯދި ކ. ހުރާ--
މި ގަވާއިދާ ހިލާފުވުމާ ގުޅިގެން އެފްއޭއެމްއިން ވަނީ ބީއެމްއެލް ރީޖަނަލް ލީގުގެ ގަވާއިދުގެ 3.3 ވަނަ މާއްދާއަށް ރިއާޔަތްކޮށް ހަރުކަށި ފިޔަވަޅެއް އަޅާފައެވެ.
އެ މާއްދާގައި ސާފުކޮށް ބަޔާންކޮށްފައިވަނީ، މެޗެއްގައި ކުޅުމުގެ ޝަރުތު ހަމަނުވާ ކުޅުންތެރިއަކު ނުވަތަ ރަސްމީ ޓީމު ލިސްޓުގައި ނުހިމެނޭ ކުޅުންތެރިއަކު ޓީމަކުން ބޭނުންކޮށްފި ނަމަ، އެ މެޗަކުން އެ ޓީމަށް ލިބުނު ހުރިހާ ޕޮއިންޓަކާއި ޖެހި ލަނޑުތައް ބާތިލްވާނެ ކަމަށެވެ.
އޭގެ ބަދަލުގައި އިދިކޮޅަށް ކުޅުނު ޓީމަށް މެޗުގެ 3 ޕޮއިންޓް ލިބި، ދެ ލަނޑުގެ އެޑްވާންޓޭޖެއް ކަނޑައެޅޭނެ ކަމަށް ވެސް އެ މާއްދާގައިވެއެވެ. އެހެންކަމުން ކުޑަހުވަދޫ ދަނޑުމަތީގައި ހޯދި މޮޅު ބާތިލްކޮށް، މެޗުގެ ފުރިހަމަ 3 ޕޮއިންޓާއި ދެ ގޯލުގެ މޮޅު ހުރާއަށް ދޭން އެފްއޭއެމްއިން ވަނީ ނިންމާފައެވެ.
މި ބޮޑު ނިންމުމާއެކު ލީގުގެ ފައިނަލް ރޭންކިންއަށް ވަނީ ބޮޑު ބަދަލެއް އައިސްފައެވެ. ކުޑަހުވަދޫ ޓީމަށް މި މެޗުން ޕޮއިންޓެއް ނުލިބި، ޖުމްލަ 8 ޕޮއިންޓާއެކު ތާވަލުގެ ދެވަނައިގައި މުބާރާތް ނިންމާލަން ޖެހުނުއިރު، މިލިބުނު 3 ޕޮއިންޓާއެކު ކ.ހުރައަށް ވަނީ ޖުމްލަ 13 ޕޮއިންޓް ލިބިފައެވެ.
މިއާއެކު ފައިދާ 10 ގޯލުގެ އެޑްވާންޓޭޖަކާއެކު ހުރާއަށް ވަނީ ރަސްމީކޮށް ސެންޓްރަލް ލީގުގެ ޗެމްޕިއަންކަން ކަށަވަރުވެފައެވެ. ހުރާ މުޅި ލީގުގައިވެސް ބަލިވެފައިވަނީ ހަމައެކަނި އދ. މަހިބަދޫއާ ދެކޮޅަށް އެ ރަށުގައި ކުޅުނު ރަށުންބޭރު މެޗުން އެކަންޏެވެ.
ސެންޓްރަލް ލީގުގެ ރަންތަށި ހުރައަށް ލިބުމާއެކު، އެ ޓީމު ވެގެން ގޮސްފައިވަނީ ދިވެހި ޕްރިމިއާ ލީގުގެ ކޮލިފިކޭޝަން ޕްލޭ އޮފުން ޖާގަ ހޯދި ފަސްވަނަ ޓީމަށެވެ.
މިއީ އެ ރަށުގެ ފުޓްބޯޅަ ތާރީހުގައި އެންމެ މަތީ ފަންތިއަށް ދިއުމަށް ލިބުނު ރަން ފުރުސަތެކެވެ. މި ކޮލިފިކޭޝަން ބުރުން ދެން ބާކީ އޮތީ އެންމެ ޖާގައެކެވެ. އެ ފަހުގެ ޖާގަ ލިބޭނީ މިހާރު ކުރިއަށްދާ، ނަމަވެސް އަދި ވަކި ގޮތަކަށް ނަތީޖާ ނުނިމި އޮތް ސައުތު ލީގުގެ ޗެމްޕިއަންކަން ހޯދާ ޓީމަކަށެވެ. އެ ޓީމެއް ކަށަވަރުވުމުން ދިވެހި ޕްރިމިއާ ލީގަށް ކޮލިފައިވާނެ ޓީމުތައް ހޮވާ ފައިނަލް ޕްލޭއޮފް ބުރު ފެށިގެންދާނެއެވެ.