އިންޑިއާގެ ސިޔާސީ މައިދާނަށް މުޅިން އައު، އާދަޔާހިލާފު ރަމްޒެއް މިވަނީ ތައާރަފުވެފައެވެ. އެއީ ގިނަ ބަޔަކު ފޫހިވާ، އަދި ނައްތާލަން އުނދަގޫ ސޫތްޕެއް ކަމަށްވާ ކުރަތްޕެވެ. "ކޮކްރޯޗް ޖަންތާ ޕާޓީ" ނުވަތަ ސީޖޭޕީގެ ނަމުގައި އުފެދިގެން އުޅޭ މި ސިޔާސީ ހަރަކާތަކީ ޖޯކެއްގެ ގޮތުގައި ފެށުނު ކަމެއް ނަމަވެސް، މިއަދު މިއީ އިންޑިއާގެ އެންމެ ތަޖުރިބާކާރު ސިޔާސީ ލީޑަރުންނަށްވެސް ސަމާލުކަން ދޭން މަޖުބޫރުވެފައިވާ ވަރުގަދަ އޮންލައިން ހަރަކާތެކެވެ.
މަދު ދުވަސްކޮޅެއްގެ ތެރޭގައި މި ހަރަކާތުން ވަނީ އިންޑިއާގެ ޒުވާނުންގެ މެދުގައި ބޮޑު މަގުބޫލުކަމެއް ހޯދައި، މިލިއަނުން މީހުންގެ ތާއީދު ހޯދާފައެވެ. މިއީ ރަސްމީ ސިޔާސީ ޕާޓީއެއް ނޫން ނަމަވެސް، މިއީ އިންޑިއާގެ ވެރިކަންކުރާ, ބާރަތިޔާ ޖަނަތާ ޕާޓީ (ބީޖޭޕީ) އަށް ނިސްބަތްކޮށް، ފާޑުކިޔުމުގެ ގޮތުން އުފައްދާފައިވާ ޕެރަޑީއެކެވެ. ނުވަތަ ޖެއްސުމަށް ފަށާފައިވާ ކަމެކެވެ.
މި ހަރަކާތުގެ ފެށުން ގުޅިފައިވަނީ އިންޑިއާގެ އުއްތަމަ ފަނޑިޔާރު ސޫރްޔާ ކާންޓް ދާދި ފަހުން ދެއްކެވި ވާހަކަފުޅަކާއެވެ. މި މަހުގެ 16 ވަނަ ދުވަހު ސުޕްރީމް ކޯޓުގައި ކުރިއަށްދިޔަ އަޑުއެހުމެއްގެ ތެރެއިން، ވަޒީފާއެއް ނެތި ނޫސްވެރިކަމާއި އެކްޓިވިޒަމްގެ ތެރެއަށް ވަންނަ ޒުވާނުންނަކީ "ކުރަފި" އަދި "ޕެރަސައިޓް" ތަކެއް ފަދަ ބައެއް ކަމަށް އޭނާ ވިދާޅުވި ކަމަށް މީޑިއާތަކުން ރިޕޯޓުކުރިއެވެ. މިކަމާ ގުޅިގެން އާންމުންގެ ފާޑުކިޔުންތައް އަމާޒުވުމުން، އުއްތަމަ ފަނޑިޔާރު ފަހުން ވިދާޅުވި ގޮތުގައި އޭނާގެ ބަސްފުޅު އަމާޒުކުރެއްވީ މުޅި ޒުވާނުންނަކަށް ނޫނެވެ. އޭނާ ވިދާޅުވީ އެއީ "ފޭކް" ނުވަތަ ސައްހަނޫން ޑިގްރީތައް ހިފައިގެން ވަޒީފާތަކަށް ވަންނަ މީހުންނަށް ނިސްބަތްކޮށް ވިދާޅުވި އެއްޗެއް ކަމަށެވެ. ނަމަވެސް އޭރު އޮތީ އެ ވާހަކަތައް ސޯޝަލް މީޑިއާގައި ވައިރަލްވެ، ޒުވާނުންގެ ރުޅިވެރިކަން އިންތިހާއަށް ގޮސްފައެވެ.
މި ރުޅިވެރިކަމުގެ ތެރެއިން ކޮކްރޯޗް ޖަންތާ ޕާޓީ ވުޖޫދަށް ގެނައީ އެމެރިކާގެ ބޮސްޓަން ޔުނިވާސިޓީގައި ޕަބްލިކް ރިލޭޝަންސްގެ ރޮނގުން މާސްޓާސް ހަދަމުން އަންނަ އުމުރުން 30 އަހަރުގެ އަބީޖީތު ޑިޕްކޭއެވެ. އިންޑިއާގެ މަހަރާޝްތުރާއަށް ނިސްބަތްވާ އަބީޖީތު ބީބީސީއަށް މައުލޫމާތު ދެމުން ބުނި ގޮތުގައި، މި ޕާޓީ އުފެއްދުމުގެ ހިޔާލަކީ ހަމައެކަނި ޖޯކެއްގެ ގޮތުގައި ފެށި ކަމެކެވެ. މީގެ ކުރިން އާމް އާދްމީ ޕާޓީ (އޭއޭޕީ) ގެ ސޯޝަލް މީޑިއާ ޓީމުގައި 2020 އިން 2023 އަށް މަސައްކަތްކޮށްފައިވާ އަބީޖީތު ބުނީ، އޭނާ ބޭނުންވީ އެންމެން އެއްތަންވެލާނެ ޕްލެޓްފޯމެއް އުފައްދަން ކަމަށެވެ.
އަބީޖީތު އަލްޖަޒީރާއަށް ދިން އިންޓަވިއުއެއްގައި ބުނި ގޮތުގައި، ވެރިކަމުގައި ތިބޭ ފަރާތްތަކުން ރައްޔިތުންނަކީ ކުރަފިތަކެއް ކަމަށް ދެކޭއިރު، ކުރަފި އާލާވަނީ ކުނިވެފައިވާ ތަންތަނުގައިކަން އެމީހުން ދަންނަން ޖެހޭނެއެވެ. އަދި މިއަދު އިންޑިއާ އޮތީ އެފަދަ ހާލަތެއްގައި ކަމަށް އޭނާ ފާހަގަކުރިއެވެ. މި ޕާޓީގެ މެމްބަރަކަށް ވުމުގެ ޝަރުތުތަކުގެ ތެރޭގައި ވަޒީފާއެއް ނެތް މީހަކަށް ވުމާއި، ކަންނެތްވުމާއި، އަބަދު އޮންލައިންކޮށް އުޅުމާއި، އަދި "ޕްރޮފެޝަނަލްކޮށް ޝަކުވާކުރުމުގެ ހުނަރު" ހުރުން ހިމެނެއެވެ.
ސީޖޭޕީގެ މަގުބޫލުކަން ސޯޝަލް މީޑިއާގައި އިތުރުވެގެންދިޔަ ބާރުމިނަކީ ގިނަ ބަޔަކު ހައިރާންކޮށްލި ކަމެކެވެ. މެއި މަހުގެ ފަހުކޮޅާ ހަމައަށް އައިއިރު، އެ ޕާޓީގެ އިންސްޓަގްރާމް އެކައުންޓުގެ ފޮލޯވަރުންގެ އަދަދު ވަނީ 15 މިލިއަނަށްވުރެ މައްޗަށް ގޮސްފައެވެ. މިއީ ދުނިޔޭގެ އެންމެ ބޮޑު ސިޔާސީ ޕާޓީ ކަމަށް ދައުވާކުރާ އިންޑިއާގެ ވެރިކަންކުރާ ބީޖޭޕީގެ ރަސްމީ އިންސްޓަގްރާމް އެކައުންޓުގައި ތިބި 8.7 މިލިއަން ފޮލޯވަރުންނާއި، އިދިކޮޅު ކޮންގްރެސް ޕާޓީގެ 13.3 މިލިއަން ފޮލޯވަރުންނަށްވުރެ ބޮޑު އަދަދެކެވެ.
ހަމައެއާއެކު، "އަހަރެންނަކީވެސް ކުރަތްޕެއް" މި މާނަދޭ ހޭޝްޓެގް އިންޑިއާގައި ޓްރެންޑްވެ، ގޫގުލް ފޯމު މެދުވެރިކޮށް އެތައް ހާސް ބަޔަކު ވަނީ މި ހަރަކާތާ ގުޅިފައެވެ. އޮންލައިން ޕްލެޓްފޯމްތަކުގެ އިތުރުން، މަގުމަތީގައި ހިންގާ ސާފުކުރުމުގެ ހަރަކާތްތަކާއި މުޒާހަރާތަކަށް ޒުވާނުން ނުކުންނަން ފެށީ ކުރަފީގެ ހެދުން އަޅައިގެންނެވެ.
މި ހަރަކާތަށް އިންޑިއާގެ އިދިކޮޅު ސިޔާސީ ލީޑަރުންގެ ތާއީދުވެސް ވަނީ ލިބެން ފަށާފައެވެ. ސަމާޖްވާދީ ޕާޓީގެ ލީޑަރު އަކިލޭޝް ޔާދަވް އާއި، ތްރިނަމޫލް ކޮންގްރެސްގެ މަހުއާ މޮއިތުރާ އަދި ކީރްތީ އާޒާދުގެ އިތުރުން އޭއޭޕީގެ އިސް ލީޑަރު މަނީޝް ސިސޯޑިއާ ވަނީ ސޯޝަލް މީޑިއާގައި ސީޖޭޕީއަށް ތާއީދުކުރައްވައި ވާހަކަދައްކަވާފައެވެ. ނަމަވެސް، މި ހަރަކާތް ކުރިއަރަމުންދާ ބާރުމިނާއެކު، އިންޑިއާ ސަރުކާރުން ވަނީ ފިޔަވަޅުތަކެއް އަޅަން ފަށާފައެވެ. އެގޮތުން 165،000 އަށްވުރެ ގިނަ ފޮލޯވަރުން ތިބި ސީޖޭޕީގެ އެކްސް (ކުރީގެ ޓްވިޓާ) އެކައުންޓް، ގާނޫނީ އެންގުމަކާ ގުޅިގެން ކަމަށް ބުނެ އިންޑިއާގައި މިހާރު ވަނީ ބްލޮކްކޮށްފައެވެ.
ފާޑުކިޔާ ފަރާތްތަކުން ބުނާ ގޮތުގައި މިއީ އޭއޭޕީއާ ގުޅުންހުރި ބަޔަކު އަޑީގައި ތިބެގެން، ވަރަށް ރޭވުންތެރިކަމާއެކު ޑިޖިޓަލްކޮށް ޕެކޭޖުކޮށްގެން ހިންގާ ސިޔާސީ ތިއޭޓަރެކެވެ. އަދި އަބީޖީތުގެ މައިންބަފައިން ކަމަށްވާ ބަގްވާން ޑިޕްކޭ އާއި އަނީތާ ޑިޕްކޭ ވަނީ، އެމީހުންގެ ދަރިފުޅު ހައްޔަރުކޮށްފާނެކަމުގެ ބިރު އޮތްކަން ހާމަކޮށް، އޭނާ ސިޔާސީ ކަންކަމާ ދުރުވުމަށް ގޮވާލާފައެވެ. ނަމަވެސް މި ހަރަކާތަށް ތާއީދުކުރާ ޒުވާނުން ދެކޭ ގޮތުގައި މިއީ އިންޑިއާގެ ސިޔާސީ ސަގާފަތަށް އައި "ތާޒާ ވައިރޯޅިއެކެވެ."
އިންޑިއާގެ 1.4 ބިލިއަން މީހުންގެ އާބާދީގެ ދެބައިކުޅަ އެއްބަޔަކީ 30 އަހަރުން ދަށުގެ ޒުވާނުންނަށް ވީނަމަވެސް، ރަސްމީ ސިޔާސީ މައިދާނުގައި ޒުވާނުންގެ ބައިވެރިވުން ވަރަށް ކުޑައެވެ. ދާދި ފަހުން ހެދި ދިރާސާއަކުން ދައްކާ ގޮތުގައި އިންޑިއާގެ ޒުވާނުންގެ 29 އިންސައްތަ މީހުން ސިޔާސީ ކަންކަމާ ދުރުހެލިވާއިރު، ސިޔާސީ ޕާޓީއެއްގެ މެމްބަރެއްގެ ގޮތުގައި އުޅެނީ އެންމެ 11 އިންސައްތަ ޒުވާނުންނެވެ.
ކުރަފި ޕާޓީ އުފެއްދި ޒުވާނާ...
އަބީޖީތު ފާހަގަކުރި ގޮތުގައި މީހުން ތިބީ މާޔޫސްވެފައެވެ. ސަބަބަކީ އެ މީހުންގެ އަޑު އަހާނެ އަދި އެ މީހުން ތަމްސީލުކުރާނެ ބަޔަކު ނެތްކަމުގެ އިހުސާސް ކުރެވޭތީއެވެ. އިންޑިއާގެ އިގުތިސާދު ކުރިއަރަމުން ދިޔަ ނަމަވެސް، ވަޒީފާ ނެތުމުގެ މައްސަލައާއި ތަކެތީގެ އަގު ބޮޑުވުމުގެ ކަންބޮޑުވުންތަކަށް ހައްލެއް ލިބިފައެއް ނުވެއެވެ. މިދިޔަ އަހަރުގެ ތަފާސްހިސާބުތަކުން ދައްކާ ގޮތުގައި އިންޑިއާގެ ޒުވާނުންގެ މެދުގައި ވަޒީފާނެތް މީހުންގެ ނިސްބަތް އުޅެނީ 16 އިންސައްތައިގައެވެ.
ދެކުނު އޭޝިއާގެ އެހެން ގައުމުތައް ކަމަށްވާ ސްރީލަންކާ އާއި ބަންގްލަދޭޝްގައި ޒުވާނުން އިސްވެ ތިބެ ސަރުކާރުތައް ވައްޓާލި ނަމަވެސް، އަބީޖީތު ބުނާ ގޮތުގައި އިންޑިއާގެ ހާލަތު ތަފާތެވެ. އޭނާ ބުނި ގޮތުގައި މިހާރުގެ ޒުވާނުން ވަނީ ސަގާފީ ސިޔާސީ ޕާޓީތަކާމެދު އުންމީދު ކަނޑާލާފައެވެ. އަދި އެމީހުން ބޭނުންވަނީ އެމީހުންނަށް ދޭހަވާ ބަހުރުވައަކުން އަމިއްލަ ސިޔާސީ މައިދާނެއް ބިނާކުރާށެވެ.
ސީޖޭޕީގެ ވެބްސައިޓާއި މެނިފެސްޓޯ ފަރުމާކޮށްފައިވަނީ އިންޓަނެޓްގެ ސަގާފަތާ ގުޅޭ ގޮތަށެވެ. މިއީ "ކަންނެތް އަދި ވަޒީފާއެއް ނެތް މީހުންގެ އަޑު" ކަމަށް އެ ޕާޓީން ސިފަކުރާއިރު، މީގެ އަޑީގައި ފޮރުވިފައިވަނީ ވަރަށް ސީރިއަސް ސިޔާސީ މެސެޖުތަކެކެވެ. އެ ޕާޓީގެ މެނިފެސްޓޯގައި ގޮވާލާފައިވާ ކަންތައްތަކުގެ ތެރޭގައި، އިންތިހާބުވުމަށްފަހު ޕާޓީ ބަދަލުކުރާ މެމްބަރުން 20 އަހަރަށް ސަސްޕެންޑް ކުރުމާއި، ސަރުކާރަށް ޖެހިފައިވާ "ގޯދީ މީޑިއާ" ގެ އެންކަރުންގެ ބޭންކް އެކައުންޓްތައް ތަހުގީގުކުރުމާއި، ސައްހަ ވޯޓެއް އުނިކޮށްފިނަމަ ޗީފް އިލެކްޝަން ކޮމިޝަނަރާ ދެކޮޅަށް ޓެރަރިޒަމްގެ ގާނޫނުގެ ދަށުން ފިޔަވަޅު އެޅުން ހިމެނެއެވެ.
މީގެ އިތުރުން ރިޓަޔާކުރާ އުއްތަމަ ފަނޑިޔާރުންނަށް ގާނޫނުހަދާ މަޖިލީހުގެ މަތިގޭގެ ގޮނޑި ދިނުން މަނާކުރުމާއި، ވަޒީރުންގެ މަޖިލީހުގެ 50 އިންސައްތަ އަންހެނުންނަށް ހާއްސަކުރުންވެސް ހިމެނެއެވެ. ދާދި ފަހުން އިންޑިއާގައި 2.3 މިލިއަން ދަރިވަރުންނަށް އަސަރުކުރި މެޑިކަލް ކޮލެޖުތަކަށް ވަންނަ "ނީޓް" އިމްތިހާނުގެ ކަރުދާސް ލީކުވި މައްސަލައިގައިވެސް ސީޖޭޕީން ވަނީ ދަރިވަރުންނާ އެއްކޮޅަށް އަޑުއުފުލާފައެވެ.
ކުރަތްޕެއް ފަދަ ސޫތްޕެއް ރަމްޒެއްގެ ގޮތުގައި ނެގުމަކީވެސް ފުން މާނައެއް އެކުލެވޭ ކަމެއް ކަމަށް ގިނަ ބަޔަކު ދެކެއެވެ. އެއީ ބަތަލަކަށް ނުވިޔަސް، ކޮންމެ ފަދަ ދަތި ހާލަތެއްގައިވެސް ދިރިއުޅުމުގެ ގާބިލުކަން ލިބިފައިވާ، އުންމީދުތައް ކުޑަ ސޫތްޕަކަށް ވާތީއެވެ.
ޒުވާނުންގެ ރުޅިވެރިކަން ކުރިން ފާޅުކުރަމުން އައީ ދިގު މެނިފެސްޓޯތަކުން ކަމަށް ވިޔަސް، މި އަހަރު މި ރުޅިވެރިކަން ފެންނަމުންދަނީ މީމްތަކާއި ސޫފިތަކުގެ ރަމްޒުތައް ބޭނުންކޮށްގެން ހިންގާ އޮންލައިން ހަރަކާތްތަކުންނެވެ.
އަބީޖީތު ގަބޫލުކުރާ ގޮތުގައި ސީޖޭޕީއަކީ ހަމައެކަނި ފެށުމެކެވެ. އަދި ކުރިއަށް އޮތް ތަނުގައި ޒުވާނުންގެ މިފަދަ އިތުރު ޖަމިއްޔާތައް ނުކުންނާނެ ކަމަށް އޭނާ ބުނެއެވެ. ނަމަވެސް ބައެއް ފަރާތްތަކުން ލަފާކުރާ ގޮތުގައި މިއީ އުފެދުނުހާ އަވަހަށް ނެތިގެން ހިނގައިދާނެ ހަރަކާތެކެވެ.
ކޮންމެ ގޮތަކަށް ކަންތައް ވިޔަސް، މި ހަރަކާތުން ވަނީ އިންޑިއާގެ ސިޔާސީ މައިދާނުގައި ޒުވާނުންގެ އަޑު އިއްވާލާފައެވެ. އިންޑިއާ ސަރުކާރުގެ އެންގުމަކަށް ސީޖޭޕީގެ އެކްސް އެކައުންޓް ބްލޮކްކޮށްފައި އޮތް ނަމަވެސް، އިންސްޓަގްރާމާއި އެހެނިހެން ޕްލެޓްފޯމްތަކުގައި މި ހަރަކާތުގެ ފޮލޯވަރުންގެ އަދަދު ދުވަހެއް ދުވަހަކަށް ދަނީ އިތުރުވަމުންނެވެ.