ކާމިޔާބު ގިނަ ފިލްމުތަކެއް ގެނެސްދީފައިވާ ބޮލީވުޑްގެ ކުޅަދާނަ ފިލްމު ޑައިރެކްޓަރު ރާޖްކުމާރު ހިރާނީގެ ކެރިއަރުގެ ފުރަތަމަ ވެބް ސީރީސް "ޕްރިތަމް އެންޑް ޕެޑްރޯ"ގެ ފަސްޓްލުކް ޕޯސްޓަރާ އެކު އެ ސީރީސް ރިލީޒްކުރާ ތާރީހު އިއުލާނުކޮށްފިއެވެ.
ރާޖްކުމާރު ހިރާނީ ޕްރޮޑިއުސްކޮށް އަވީނާޝް އަރުން ޑައިރެކްޓްކުރާ "ޕްރިތަމް އެންޑް ޕެޑްރޯ" ބެލުންތެރިންނަށް ގެނެސްދޭނީ ޖިއޯ ހޮޓްސްޓާ މެދުވެރިކޮށެވެ.
މި ވެބް ސީރީސްގެ ވާހަކަ ފެށެނީ، އަތިރިމަތީގައި ދޫކޮށްލާފައިވާ އޭޓީއެމް މެޝިނަކާއި، އޭގެ ކައިރީގައި ތިބި އެކަކު އަނެކަކާ އެއްވެސް ގުޅުމެއް ނެތް ދެ މީހެއްގެ ފަރާތުން ފެށޭ ސިއްރުވެރި ހާދިސާއަކުންނެވެ.
ހިރާނީގެ ފިލްމުތަކުން ފެންނަ ފަދަ އިންސާނީ ގުޅުންތަކާއި، ޖަޒުބާތާއި، ހިތްތަކަށް އަސަރުކުރުވާ ފަދަ ވާހަކަ ކިޔައިދިނުމުގެ ފާހަގަކޮށްލެވޭ އުސްލޫބު މި ސީރީޒުން ވެސް ފެންނާނެތީ މިއީ ބެލުންތެރިން ވަރަށް ބޮޑަށް އިންތިޒާރުކުރަމުން އަންނަ ވެބް ސީރީސްއެކެވެ.
ވެބް ސީރީސް "ޕްރިތަމް އެންޑް ޕެޑްރޯ"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
މި ސީރީޒާ ބެހޭގޮތުން ޖިއޯސްޓާގެ ހިންދީ އެންޑް އިންގްލިޝް އެންޓަޓެއިންމަންޓް ބިޒްނަސްގެ ހެޑް އާލޮކް ޖެއިން ބުނީ، ރާޖްކުމާރު ހިރާނީ އަކީ، މަޖާ، އިންސާނީ ގުޅުންތައް އަދި ޖަޒުބާތުން ފުރިފައިވާ ވާހަކަތައް އާދަޔާ ޚިލާފަށް މޮޅު ގޮތްގޮތަށް ސްކްރީނަށް ގެނެސްދޭ ފަންނާނެއް ކަމަށެވެ. އެހެންކަމުން ހިރާނީގެ ކެރިއަރުގެ ފުރަތަމަ ވެބް ސީރީޒްގައި ބައިވެރިވުމަކީ ޖިއޯހޮޓްސްޓާއަށް ލިބޭ އުފަލެއް ކަމަށް އާލޮކް ޖެއިން ވަނީ ފާހަގަކޮށްފައެވެ.
"އަޅުގަނޑު އަބަދުވެސް ޝައުގުވެރި ވަނީ މުޅިން ތަފާތު ދެ މިޒާޖެއްގެ މީހުން އެކުގައި މަސައްކަތްކުރަން ޖެހުމުން، އެމީހުންގެ ދިރިއުޅުމަށް އަންނަ ބަދަލުތަކުގެ މައްޗަށް ބިނާކޮށް ގެނެސްދޭ ވާހަކަތަކަށް. ވެބް ސީރީސް 'ޕްރިތަމް އެންޑް ޕެޑްރޯ' އަކީ އެފަދަ މަޖާ، އިންސާނީ ލޯތްބާއި ކުޑަ 'މޮޔަކަމެއް' ވެސް އެކުލެވިގެންވާ ވާހަކައެއް. ވެބް ސީރީޒްގެ މި ދިގު ފޯމެޓުގެ ސަބަބުން، ކެރެކްޓާތަކާ އެކު ގިނަ ވަގުތު ހޭދަކޮށް، އެމީހުންގެ ދަތުރު މާ ފުންކޮށް ދައްކައިދިނުމުގެ ފުރުސަތު ލިބުނު. މިއީ ވަރަށް އުފާވެރި ތަޖުރިބާއެއް" މި ވެބް ސީރީސްއާ ގުޅޭގޮތުން ހިރާނީ ބުނެފައިވެއެވެ.
މި ސީރީސްގެ ޓައިޓްލް ރޯލުތަކުން ފެންނާނީ އަރުޝަދު ވަރްސީ އާއި ހިރާނީގެ ދަރިފުޅު ވީރް ހިރާނީއެވެ. މިއީ ވީރް އެކްޓިންގް ދުނިޔެއަށް ތައާރަފްވާނެ އޭނާގެ ފުރަތަމަ މަސައްކަތެވެ.