އަންނަ ޖޫން މަހުގެ 11 ވަނަ ދުވަހު އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕަށް އެކުލަވާލި ޕޯޗުގަލްގެ ސްކޮޑު އިއުލާނުކޮށްފިއެވެ.
މި ސްކޮޑުގެ އެންމެ އިސް ލީޑަރެއްގެ ގޮތުގައި ހިމަނާފައި ވަނީ ތަޖުރިބާކާރު ކުޅުންތެރިޔާ ކްރިސްޓިއާނޯ ރޮނާލްޑޯއެވެ. މިފަހަރުގެ މުބާރާތުގައި ކުޅުމާއެކު، އުމުރުން 41 އަހަރުގެ ރޮނާލްޑޯ ވާނީ ހަ ވޯލްޑް ކަޕެއްގައި ކުޅޭ ފުރަތަމަ ކުޅުންތެރިޔާ އަށެވެ.
ރޮނާލްޑޯ ވަނީ މީގެ ކުރިން ބޭއްވި ފަސް ވޯލްޑް ކަޕްގައި ވެސް ކުޅެ ލަނޑު ޖަހާފައެވެ. އޭނާ ވޯލްޑް ކަޕްގައި އަލަށް ކުޅެން ފެށީ 2006 ވަނަ އަހަރެވެ. އެ އަހަރު ޕޯޗުގަލް މުބާރާތުގެ ސެމީ ފައިނަލަށް ދަތުރުކުރިއިރު، މިއީ މިހާތަނަށް ރޮނާލްޑޯއާއެކު އެ ޓީމަށް ވޯލްޑް ކަޕްގައި ލިބުނު އެންމެ ބޮޑު ކާމިޔާބީއެވެ.
ރޮނާލްޑޯގެ އަމާޒަކީ މިފަހަރު ޕޯޗުގަލްއަށް ފުރަތަމަ ފަހަރަށް ވޯލްޑް ކަޕް ކާމިޔާބުކޮށްދިނުމެވެ.
ޕޯޗުގަލް ކެޕްޓަން ކްރިސްޓިއާނޯ ރޮނާލްޑޯ --
ދިއޯގޯ ޖޮޓާގެ ހަނދާނުގައި 'ޕްލަސް ވަން' އެއް
ޕޯޗުގަލްއިން މިފަހަރު އިއުލާންކޮށްފައި ވަނީ 27 ކުޅުންތެރިންގެ ސްކޮޑެކެވެ.
މީގެ ތެރޭގައި މިދިޔަ އަހަރު ކާރު އެކްސިޑެންޓެއްގައި މަރުވި ލިވަޕޫލްގެ ފޯވާޑް ދިއޯގޯ ޖޮޓާގެ ހަނދާނުގައި އޭނާ ވަނީ ޝަރަފުވެރި 'ޕްލަސް ވަން' ކުޅުންތެރިއެއްގެ ގޮތުގައި ސްކޮޑުގައި ހިމަނާފައެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ކޯޗު ރޮބާޓޯ މާޓިނޭޒް ބުނީ ޖޮޓާ އަކީ ޓީމުގެ އުފަލާއި ބާރު ކަމަށެވެ.
"ޖޮޓާ ވަކިވެދިއުމަކީ ވަރަށް ހިތްދަތި އަދި ހަނދާނުން ފޮހެލަން އުނދަގޫ ކަމެއް. ނަމަވެސް އޭނާގެ ހުވަފެންތަކަށްޓަކައި އަދި އޭނާ ދެއްކި ނަމޫނާއަށްޓަކައި އަހަރެމެން މަސައްކަތް ކުރާނަން. ޖޮޓާގެ ރޫހަކީ އަބަދުވެސް އަހަރެމެންގެ ޕްލަސް ވަން،" ކޯޗު ބުންޏެވެ.
ރޮނާލްޑޯ އާއި ޑިއޭގޯ ޖޮޓާ، ޖޮޓާ ވަނީ ކާރު އެކްސިޑެއްޓެއްގައި މަރުވެފައި --
ސްކޮޑުގެ ތަފްސީލާއި ތައްޔާރީތައް
މާޓިނޭޒްގެ ސްކޮޑުގައި ހަތަރު ގޯލްކީޕަރުންނާއި ފަސް ފުލްބެކުން ހިމެނެއެވެ. ހަތަރުވަނަ ކީޕަރު ރިކާޑޯ ވެލްހޯ ޓީމާއެކު ދަތުރުކުރި ނަމަވެސް، ރަސްމީ ލިސްޓަށް އޭނާ އިތުރުކުރެވޭނީ ރަޖިސްޓްރީކޮށްފައިވާ ތިން ކީޕަރުންގެ ތެރެއިން މީހަކަށް އަނިޔާވެއްޖެ ހާލަތެއްގައެވެ.
ކޯޗު ބުނި ގޮތުގައި މުބާރާތް ބާއްވާ ގައުމުތަކުގެ މޫސުމާއި ވަގުތަށް އަންނަ ބަދަލުތަކަށް ބަލާއިރު، ބައެއް މަގާމުތަކަށް ގިނަ ކުޅުންތެރިން ބޭނުންވާ ކަމަށެވެ.
ޕޯޗުގަލްގެ ސްކޮޑު:
- ގޯލްކީޕަރުން: ދިއޯގޯ ކޮސްޓާ، ހޯސޭ ސާ، ރޫއީ ސިލްވާ އަދި ރިކާޑޯ ވެލްހޯ.
- ޑިފެންޑަރުން: ދިއޯގޯ ޑަލޮޓް، މަތެއުސް ނޫނޭޒް، ނެލްސަން ސެމެޑޯ، ޔާއޯ ކަންސެލޯ، ނޫނޯ މެންޑޭޒް، ގޮންސާލޯ އިނާސިއޯ، ރެނާޓޯ ވޭގާ، ރޫބެން ޑިއާޒް އަދި ތޯމަސް އަރައޫޖޯ.
- މިޑްފީލްޑަރުން: ރޫބެން ނެވޭސް، ސެމިއުލް ކޮސްޓާ، ޔާއޯ ނެވޭސް، ވިޓީނިއާ، ބްރޫނޯ ފެނާންޑޭޒް އަދި ބެނާޑޯ ސިލްވާ.
- ފޯވާޑުން: ޔާއޯ ފެލިކްސް، ފްރެންސިސްކޯ ޓްރިންކާއޯ، ފްރެންސިސްކޯ ކޮންސެއިސާއޯ، ޕެޑްރޯ ނެޓޯ، ރަފައެލް ލެއާއޯ، ގޮންސާލޯ ގުއެޑޭޒް، ގޮންސާލޯ ރާމޯސް އަދި ކްރިސްޓިއާނޯ ރޮނާލްޑޯ.
ނޭޝަންސް ލީގުގެ ޗެމްޕިއަން ޕޯޗުގަލް ހިމެނެނީ ގްރޫޕް ކޭ ގައެވެ. އެ ޓީމުގެ ފުރަތަމަ މެޗުގައި ޖޫން 17 ވަނަ ދުވަހު ބައްދަލުކުރާނީ ޑިމޮކްރެޓިކް ރިޕަބްލިކް އޮފް ކޮންގޯއާއެވެ. އޭގެ ފަހުން އުޒްބެކިސްތާނާއި ކޮލަމްބިއާއާ ދެކޮޅަށް އެ ޓީމު ނުކުންނާނެއެވެ. މުބާރާތުގެ ކުރިން ޕޯޗުގަލްއިން ޗިލީ އަދި ނައިޖީރިއާއާ ދެކޮޅަށް ވާމްއަޕް މެޗުތަކެއް ކުޅުމަށް ވަނީ ހަމަޖެހިފައެވެ.