ވޭލްސްގެ ނިއުޕޯޓުގައި ކުރިއަށްދިޔަ "ވޯލްޑްޝެފްސް ކޮންގްރެސް 2026" ގައި ދިވެހިރާއްޖޭގެ ޝެފުންގެ ޖަމިއްޔާ, ޝެފްސް ގިލްޑް އޮފް މޯލްޑިވްސް(ސީޖީއެމް)ގެ ޓީމަކުން ބައިވެރިވެއްޖެއެވެ.
ދުނިޔޭގެ އެކި ކަންކޮޅުތަކުން ޕްރޮފެޝަނަލް ޝެފުން އެއްތަންވާ މި ބައިނަލްއަގުވާމީ ބޮޑު ކޮންގްރެސް ކުރިއަށްދިޔައީ މިދިޔަ ހޮނިހިރު ދުވަހުން ފެށިގެން މިއަދުގެ ނިޔަލަށެވެ. މިއީ ދުނިޔޭގެ ފެންވަރުގައި ކެއްކުމުގެ ދާއިރާގެ އިސް ފަރާތްތައް އެއްތަންވެ، ތަޖުރިބާ ހިއްސާކުރުމަށް ބާއްވާ އެންމެ ބޮޑު ހަރަކާތެވެ.
ކޮންމެ ދެ އަހަރަކުން އެއް އަހަރު ބާއްވާ މި ކޮންގްރެސްގެ މައިގަނޑު މަގުސަދަކީ ކެއްކުމުގެ ދާއިރާގެ އާ އީޖާދުތަކާއި މައުލޫމާތު ހިއްސާކުރުމުގެ އިތުރުން، ބައިނަލްއަގުވާމީ ފެންވަރުގައި ޝެފުންގެ މެދުގައި ގުޅުން ބަދަހިކުރުމެވެ. ތިން ދުވަހުގެ މުއްދަތަށް ކުރިއަށްދިޔަ މި ކޮންގްރެސްގައި މިޝެލިން ސްޓާ ލިބިފައިވާ މަޝްހޫރު ޝެފުން ވަނީ ތަގުރީރުކޮށްފައެވެ.
މީގެ އިތުރުން، އަމަލީ ގޮތުން ހުނަރު ތަރައްގީކުރުމުގެ ވޯކްޝޮޕްތަކާއި، ކެއްކުމުގެ ދާއިރާއަށް އަންނަމުންދާ ބަދަލުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކޮށްފައިވެއެވެ. އޭގެ ތެރޭގައި ތިމާވެއްޓާ ރައްޓެހި ގޮތްތަކާއި، ކާބޯތަކެތީގެ ރައްކާތެރިކަން އަދި ޒަމާނީ ކެއްކުމުގެ ޓްރެންޑްތައް ހިމެނެއެވެ. ހާއްސަކޮށް މޫސުމީ ބަދަލުތަކުގެ ސަބަބުން ކާބޯތަކެތި އުފެއްދުމަށް ދިމާވާ ގޮންޖެހުންތަކާއި، އެކަންކަމުން އަރައިގަތުމަށް ކެއްކުމުގެ ސިނާއަތަށް ކުރެވިދާނެ ކަންކަމާ މެދު ފުޅާ ދާއިރާއެއްގައި ވަނީ މަޝްވަރާކޮށްފައެވެ.
މި ކޮންގްރެސްގެ ހަވާސާގައި، ދުނިޔޭގެ އެންމެ މޮޅު ޝެފުން ވާދަކުރާ "ގްލޯބަލް ޝެފްސް ޗެލެންޖް" ގެ ފައިނަލް މުބާރާތް ވެސް ވަނީ ކުރިއަށް ގެންގޮސްފައެވެ. ހަތަރު ކެޓަގަރީއަކަށް ބަހާލައިގެން ކުރިއަށްދިޔަ މި މުބާރާތުގައި ވާދަކުރި ފައިނަލިސްޓުންނަކީ 2025 ވަނަ އަހަރު ބޭއްވި ސަރަހައްދީ ސެމީ ފައިނަލްތަކުން ހޮވުނު ފަރާތްތަކެވެ. މި މުބާރާތުގެ ކެޓަގަރީތަކުގެ ތެރޭގައި ގްލޯބަލް ޝެފްސް ޗެލެންޖް، ގްލޯބަލް ޕޭސްޓްރީ ޝެފްސް ޗެލެންޖް، ގްލޯބަލް ޔަންގް ޝެފްސް ޗެލެންޖް އަދި ގްލޯބަލް ވީގަން ޝެފްސް ޗެލެންޖް ހިމެނެއެވެ. މިއީ ދުނިޔޭގެ އެކި ކަންކޮޅުތަކުން އަންނަ ޝެފުން އެއް ޕްލެޓްފޯމެއްގައި އެ މީހުންގެ ހުނަރު ދައްކާލުމަށް ލިބޭ ވަރަށް ބޮޑު ފުރުސަތެކެވެ.
ޝެފްސް ގިލްޑް އޮފް މޯލްޑިވްސް އިން ބުނި ގޮތުގައި، މިފަދަ ބައިނަލްއަގުވާމީ ޕްލެޓްފޯމްތަކުގައި ބައިވެރިވުމުގެ މައިގަނޑު ބޭނުމަކީ ދިވެހި ޝެފުންގެ ހުނަރު ތަރައްގީކޮށް، ބައިނަލްއަގުވާމީ ގުޅުންތައް ބަދަހިކުރުމެވެ. އަދި ދުނިޔޭގެ ފެންވަރުގައި ބޭނުންކުރާ އެންމެ ރަނގަޅު އުސޫލުތައް ރާއްޖޭގެ ކެއްކުމުގެ ސިނާއަތަށް ތައާރަފުކުރުމަށް މަސައްކަތްކުރަމުންދާ ކަމަށް އެ ޖަމިއްޔާއިން ފާހަގަކުރިއެވެ.
ހާއްސަކޮށް، ޒުވާން ޝެފުންނަށް މިފަދަ ތާރީހީ ކޮންގްރެސްތަކުގައި ބައިވެރިވުމުގެ ފުރުސަތު ފަހިކޮށްދިނުމަކީ އެ ޖަމިއްޔާގެ މުހިންމު އަމާޒެކެވެ. ސަބަބަކީ ކެއްކުމުގެ ސިނާއަތުގެ މުސްތަގުބަލު ބައްޓަންކުރުމުގައި ޒުވާން ޕްރޮފެޝަނަލުންގެ ދައުރު ވަރަށް ބޮޑުވުމެވެ. ބައިނަލްއަގުވާމީ މައިދާނަށް ނުކުމެ، ތަޖުރިބާކާރުންނާ ގުޅުން ބަދަހިކުރުމުގެ ފުރުސަތު ލިބުމުން، އަންނަން އޮތް ޖީލުގެ ދިވެހި ޝެފުންނަށް އިތުރު ހިތްވަރެއް ލިބިގެންދާނެ ކަމަށް ސީޖީއެމް އިން ދެކެއެވެ.
މީގެ ކުރިން 2024 ވަނަ އަހަރު ސިންގަޕޫރުގައި ބޭއްވި ވޯލްޑްޝެފްސް ކޮންގްރެސްގައި ރާއްޖޭގެ 30 ޝެފުންގެ ވަފުދަކުން ބައިވެރިވެފައިވެއެވެ. އެ އަހަރުގެ ކޮންގްރެސްގައި ވެސް ދިވެހި ޝެފުން ވަނީ ރާއްޖޭގެ ރަހަތަކާއި ސަގާފަތް ބައިނަލްއަގުވާމީ މައިދާނުގައި ދައްކާލާފައެވެ. ދެން އެންމެ އަވަހަށް މި ކޮންގްރެސް އަދި އެކްސްޕޯ ބޭއްވުމަށް ހަމަޖެހިފައިވަނީ 2028 ވަނަ އަހަރު ފަރަންސޭސިވިލާތުގެ ޕެރިހުގައެވެ. އެ އަހަރުގެ ކޮންގްރެސް ވެގެންދާނީ 1928 ވަނަ އަހަރު ޕެރިހުގައި އުފެދުނު "ވޯލްޑް އެސޯސިއޭޝަން އޮފް ޝެފްސް ސޮސައިޓީސް" (ވޯލްޑްޝެފްސް) އަށް 100 އަހަރު ފުރޭ ތާރީހީ މުނާސަބަތަށެވެ. އެހެންކަމުން، 2028 ވަނަ އަހަރުގެ ކޮންގްރެސްގައި ރާއްޖެއިން މިހާރަށްވުރެ ގިނަ ޒުވާން ޝެފުން ބައިވެރިކުރުމަށް ސީޖީއެމް އިން ދަނީ އަމާޒު ހިފަމުންނެވެ.
ރާއްޖޭގައި ކެއްކުމުގެ ދާއިރާ ކުރިއެރުވުމަށް ހާއްސަކޮށްގެން އުފެއްދި ފުރަތަމަ ނޮން-ޕްރޮފިޓް ޖަމިއްޔާ ކަމަށްވާ ސީޖީއެމް ރަޖިސްޓަރީކޮށްފައިވަނީ 2 އޮކްޓޯބަރު 2014 ގައެވެ. އެ ޖަމިއްޔާ އުފެދުނުތާ އަހަރެއް ނުވަނީސް، ވޯލްޑް އެސޯސިއޭޝަން އޮފް ޝެފްސް ސޮސައިޓީސްގެ މެންބަރުކަން ވަނީ ހޯދާފައެވެ. މިއާއެކު، ސީޖީއެމް އަކީ ރާއްޖޭގެ ރަސްމީ ކަލިނަރީ އެސޯސިއޭޝަންގެ ގޮތުގައި ވޯލްޑްޝެފްސް އިން ވަނީ ބަލައިގެންފައެވެ.
މިހާރު އެ ޖަމިއްޔާއިން ދަނީ ބައިނަލްއަގުވާމީ އެހީތެރިކަމާއެކު ރާއްޖޭގައި އެކިއެކި މުބާރާތްތަކާއި ސެމިނާތައް އިންތިޒާމުކުރަމުންނެވެ. މީގެ އިތުރުން، 2028 ވަނަ އަހަރު ޕެރިހުގައި ބާއްވާ ކޮންގްރެސްގައި ބައިވެރިވާނެ ދިވެހި ޝެފުންގެ ޓީމު އެކުލަވާލުމުގެ މަސައްކަތް ސީޖީއެމް އިން ކުރިއަށް އޮތް ތަނުގައި ފަށާނެއެވެ.