ގެއްލިގެން އުޅޭ އިޓަލީގެ ފަތުރުވެރިން ހޯދުމަށް, މިއަދު ޑައިވަރުން އެހާ ފުނަށް ނުފީނާނެ ކަމަށާއި، ޑައިވަރުން މިއަދު އުޅޭނީ އޮރިއެންޓޭޝަން ޑައިވްތަކެއްގައި ފަރިތަވެލަން ކަމަށް، ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) މިއަދު ވިދާޅުވެއްޖެއެވެ.
ވ. އަތޮޅު ކައިރިއަށް ޑައިވްކުރުމަށް ގޮސް އުޅެނިކޮށް، އިޓަލީވިލާތަށް ނިސްބަތްވާ ފަސް ފަތުރުވެރިއަކު ގެއްލުނީ މިދިޔަ ބުރާސްފަތި ދުވަހެވެ. އޭގެ ތެރެއިން އެކަކު ފެނުނީ މަރުވެފައި އޮއްވައެވެ. ދެން ތިބި ފަތުރުވެރިން ހޯދުމުގެ މަސައްކަތް ހޮނިހިރު ދުވަހުގެ ނިޔަލަށް ކުރިއަށް ގެންގޮސް، ވަނީ ވަގުތީގޮތުން މަޑުޖައްސައިލައިފައެވެ.
އެ މަސައްކަތް މަޑުޖައްސައިލައިފައިވަނީ، އެމްއެންޑީއެފްގެ އޮޕަރޭޝަންގެ ތެރެއިން ޑައިވަރަކު މަރުވުމާ ގުޅިގެންނެވެ. ޑައިވް ކުރަނިކޮށް ދިމާވި ސިއްހީ މައްސަލައެއްގައި މަރުވީ ސާޖަންޓް ފަސްޓް ކްލާސް މުޙައްމަދު މަހުދީއެވެ.
އެހެންކަމުން އެ އޮޕަރޭޝަން ކުރިއަށް ގެންދިއުމަށްޓަކައި، އިޓަލީވިލާތުގެ ސަރުކާރުން ހުށަހެޅި ހުށަހެޅުމަކަށް ފިންލޭންޑުގެ ތިން ޓެކްނިކަލް ތަޖުރިބާކާރަކު ވަނީ، އިއްޔެ ރާއްޖެ އައިސްފައެވެ.
މުންދު 'ސަން'އަށް މިއަދު ވިދާޅުވީ، އިޓަލީވިލާތުގެ ފަތުރުވެރިން ހޯދުމުގެ މަސައްކަތުގައި ދެން އިސްކޮށް ހަރަކާތްތެރިވާނީ ފިންލޭންޑުގެ އެ ތަޖުރިބާކާރުން ކަމަށާއި، ދިވެހި ސިފައިންނާއި ފުލުހުންގެ ޑައިވަރުން އެ ތިން ޑައިވަރުންނަށް އެހީތެރިކަން ފޯރުކޮށްދޭނެ ކަމަށެވެ.
އަދި އޭގެ އިތުރުން ދިވެހި ދެ ކުންފުންޏެއްގެ ޑައިވަރުންގެ އެހީތެރިކަންވެސް ލިބޭނެ ކަމަށާއި، އެގޮތުން އެ މީހުން ކުރާނީ ކަނޑު އަޑިއަށް ފޮނުވާ އުޅަނދު، ނުވަތަ އާރުއޯވީ ފޮނުވައިގެން ދިރާސާކުރުމުގެ މަސައްކަތް ކަމަށް، މުންދު ވިދާޅުވިއެވެ.
"އެހެންވީމާ މިހާރު ސަވައިލަންސް އަދި މެޕިން މަސައްކަތްތައް އެބަ ކުރޭ،" އޭނާ ވިދާޅުވިއެވެ.
މި ދުވަސްވަރަކީ ރާއްޖޭގެ އެކި ސަރަހައްދުތަކަށް ވާރޭވެހި، ކަނޑުވެސް ގަދަ ދުވަސްވަރަކަށް ވާތީ، އޮއިވެސް ބާރެވެ. އެކަން ފާހަގަކުރައްވައި މުންދު ވިދާޅުވީ، ޑައިވަރުން މިއަދު އެހާ ފުނަށް ނުފީނާނެ ކަމަށާއި، ޑައިވަރުން މިއަދު ދިޔައީ އެ ސަރަހައްދަށް ފަރިތަވެލަން ކަމަށެވެ.