ހައްޖުގެ މަތިވެރި އަޅުކަން އަދާކުރުމަށްޓަކައި، ހައްޖުވެރިންގެ ފުރަތަމަ ގުރޫޕް މިއަދު ފުރައިފިއެވެ.
މިއަދު 15:25ގައި ސައުދީ އެއާލައިނުގައި 235 ހައްޖުވެރިން ވަނީ ފުރާފައެވެ. ހެނދުނުން ފެށިގެން ބަސްތަކުގައި ހައްޖުވެރިން ވަނީ، އެއާޕޯޓަށް ދާން ފަށާފައެވެ.
ހައްޖުވެރިން ފުރަން ފަށާއިރު، އަންނަ އާދިއްތަ ދުވަހާއި ހޯމަ ދުވަހާއި އަންގާރަ ދުވަހު ވެސް ހައްޖުވެރިން ފުރުމަށް ވަނީ ހަމަޖެހިފައެވެ.
ދިވެހި ޙައްޖުވެރިންތަކެއް: މިއަދު ވަނީ، ހައްޖުވެރިން ފުރަން ފަށާފައި -- ފޮޓޯ/ އިސްލާމިކް މިނިސްޓްރީ
މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އާއި އިސްލާމިކް މިނިސްޓްރީއާއި މޯލްޑިވްސް ޙައްޖު ކޯޕަރޭޝަންގެ އިތުރުން ކަމާގުޅުންހުރި އިދާރާތައް ގުޅިގެން ހައްޖާޖީންނަށް އެއާޕޯޓުގައި ޚާއްސަ އިންތިޒާމުތަކެއް ވެސް ހަމަޖައްސާފައެވެ. އެގޮތުން، ޙައްޖުވެރިން ގޮވައިގެން އެއަރޕޯޓަށް އަންނަ ބަސްތައް މަޑުކުރުމަށް ވަކި ސަރަހައްދުތަކެއްވަނީ ހަމަޖައްސާފައެވެ.
މިނިސްޓްރީން ބުނީ، ދިވެހި ޙައްޖުވެރިން މައްކާއަށް ދިއުމުގެ ކުރިން އެ ތަނުގައި ފުރިހަމަ ކުރަންޖެހޭ ހުރިހާ އިންތިޒާމުތަކެއްވެސް ޙައްޖު ކޯޕަރޭޝަނުން ފުރިހަމަކޮށްފައިވާ ކަމަށެވެ. އޭގެ ތެރޭގައި ދިވެހި ޙައްޖުވެރިން ތިބޭ ހޮޓަލުގެ އިންތިޒާމުތަކާއި އެތެރޭގެ ދަތުރުފަތުރާއި މިނާއާއި ޢަރަފާތުގައި ފުރިހަމަ ކުރަން ޖެހޭ ކަންކަން ހިމެނެއެވެ.
އޭގެއިތުރަށް، މައްކާގައި ކުރިއަށްދާ ކަންކަން ހައްޖު މިޝަނުން ވަރަށް ގާތުން ބަލަމުން އަންނަ ކަމަށް އެ މިނިސްޓްރީން މައުލޫމާތުދެއެވެ.
މިއަހަރު ވެސް ދިވެހިރާއްޖެއަށް ލިބިފައިވަނީ 1،000 ޙައްޖު ކޯޓާއެވެ. މި ހުރިހާ ކޯޓާއެއްގެ ދަށުން ޙައްޖަށް މީހުން ގެންދިއުމުގެ އިންތިޒާމުތައް ހަމަޖައްސަނީ ސަރުކާރުގެ ކުންފުނި ކަމަށްވާ މޯލްޑިވްސް ޙައްޖު ކޯޕަރޭޝަނުންނެވެ. މިއަހަރުވެސް ދިވެހި ޙައްޖުވެރިން ދަތުރުކުރުމަށް ހަމަޖެހިފައިވަނީ މައްކާ ރޫޓު އިނީޝިއޭޓިވްގެ އިންތިޒާމުތަކުގެ ތެރެއިންނެވެ.