މި ދުވަސްވަރަކީ ރާއްޖެއަށް މޫސުން ގޯސްވެ، ކަނޑުގަދަ ދުވަސްވަރަކަށް ވެފައި، ކުރިއަށް އޮތް ވަގުތުތަކުގައި ވެސް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާއިން ލަފާކުރާތީ ކަނޑު ދަތުރުކުރާ ފަރާތްތަކުން މޫސުމަށް ޚާއްޞަ ސަމާލުކަމެއް ދެއްވުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އިލްތިމާސްކޮށްފިއެވެ.
މޫސުމާ ބެހޭ ޤައުމީ އިދާރާއިން ލަފާކޮށްފައިވާ ގޮތުގައި، މި ދުވަސްވަރު ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، ޚާއްޞަ ގޮތެއްގައި މެދުރާއްޖެތެރެއާއި ދެކުނުގެ އަތޮޅުތަކަށް އާއްމުގޮތެއްގައި ވައިބާރުވެ ކަނޑުތައް ގަދަވާނެއެވެ.
މިގޮތުން، މިރޭގެ 21:30 އިން ދަންވަރު 03:30 އަށް މ. އަތޮޅުން ފެށިގެން އައްޑޫ ސިޓީއާ ހަމައަށް ހުދު ސަމާލު ވަނީ ނެރެފައެވެ.
ކަނޑު ދަތުރުކުރާ ފަރާތްތަކުން ދަތުރަށް ފުރުމުގެ ކުރިން އަންގަންޖެހޭ ފަރާތްތަކަށް އެންގުމަށާއި، އުޅަނދުގައި ލައިފްޖެކެޓާއި، މުވާސަލާތީ ނިޒާމު އަދި ދިޔަހިއްކާ ޕަންޕު ފަދަ ތަކެތި ހުރީ ރަނގަޅު ހާލަތެއްގައިތޯ ޗެކްކުރުމަށް އެމްއެންޑީއެފްއިން ވަނީ އިރުޝާދު ދެއްވާފައެވެ.
އަދި، މުދާ އުފުލާ އުޅަނދުފަހަރުން މުދާ ބަރުކުރުމުގައި އެކަށީގެންވާ ވަރަށް ވުރެ ބޮޑަށް ބަރު ނުކުރުމަށާއި، މުދާ ރަނގަޅަށް ލައިސަންލާފައި ބެހެއްޓުމަށް ވެސް ވަނީ އަންގާފައެވެ. ރޭގަނޑު ދަތުރުކުރާ ފަރާތްތަކުން އިތުރަށް ސަމާލުވުމަށް އެދިފައިވާއިރު، ޑައިވިން އަދި ވޯޓާ ސްޕޯޓްސްގެ ހަރަކާތްތައް އިންތިޒާމުކުރާ ފަރާތްތަކުން ވެސް މޫސުމަށް ސަމާލުކަން ދިނުމަށް ވަނީ އެދިފައެވެ.
މީގެ އިތުރުން، މޫސުމާ ބެހޭ ޤައުމީ އިދާރާއިން ރީދޫ ނުވަތަ އޮރެންޖު ސަމާލު ނެރެފައިވާ ވަގުތުތަކުގައި ކަނޑުދަތުރު ނުކުރުމަށް އެމްއެންޑީއެފްއިން ވަނީ ހަރުކަށިކޮށް، އިލްތިމާސްކުރައްވާފައެވެ.
އެމްއެންޑީއެފްއިން އެގޮތަށް އިލްތިމާސްކުރިއިރު، ޢީދު ބަންދާ ދިމާކޮށް ގިނަ ބަޔަކު ދަތުރުފަތުރު ކުރުމަށް ތައްޔާރުވަމުންދަނިކޮށް، މި އަހަރުގެ ހުޅަނގު މޫސުން ރާއްޖޭގެ ދެކުނުގެ އަތޮޅުތަކަށް ފެށިފައިވާ ކަމަށް މޫސުމާ ބެހޭ ގައުމީ އިދާރާއިން ވަނީ ހާމަކޮށްފިއެވެ.
އެގޮތުން މި މަހުގެ 10 ވަނަ ދުވަހު އެޓް އޮފީހުން ނެރުނު މޫސުމީ އިންޒާރުގައި ބުނި ގޮތުގައި ދެކުނުގެ އަތޮޅުތަކަށް ހުޅަނގު މޫސުން ފެށިފައިވަނީ މި މަހުގެ އަށްވަނަ ދުވަހުން ފެށިގެންނެވެ. ދެކުނަށް ފެށުނު މި މޫސުމުގެ އަސަރުތައް ކުރިއަށް އޮތް ދުވަސްތަކުގައި މެދުރާއްޖެތެރެއަށް ފޯރާނެއެވެ. އަދި، މޭ މަސް ނިމުމުގެ ކުރިން މުޅި ރާއްޖެއަށް ހުޅަނގު މޫސުން ފެށޭނެ ކަމަށް ލަފާކުރެވެއެވެ.
އާންމު ގޮތެއްގައި ރާއްޖޭގައި ހުޅަނގު މޫސުން ދެމިގެންދަނީ މޭ މަހުން ފެށިގެން ނޮވެންބަރު މަހުގެ ނިޔަލަށެވެ.
މެޓް އޮފީހުން ވަނީ ކުރިއަށް އޮތް ދުވަސްތަކުގައި ރާއްޖޭގެ ބޮޑު ސަރަހައްދަކަށް މޫސުން ގޯސްވެ، ވައި ގަދަވެފައި ކަނޑުތައް ގަދަވާނެ ކަމަށް ލަފާކުރެވޭތީ މޫސުމަށް ސަމާލުވުމަށް އެޑްވައިޒަރީއެއް ނެރެފައެވެ.
މި ދުވަސްވަރަކީ ރާއްޖޭގެ އިރުދެކުނުން އުފެދިފައިވާ ކޮޅިގަނޑަކާއި އިރުއުތުރުން އުފެދިފައިވާ 'ލޯޕްރެޝާ ޓްރަފް'އެއްގެ ސަބަބުން ގިނަ އަދަދަކަށް ބޯ ވިއްސާރަ ވިލާ އުފެދޭ ދުވަސްވަރެއް ކަމަށް މެޓް އޮފީހުން ވަނީ ފާހަގަކޮށްފައެވެ.
މިކަމުގެ ސަބަބުން ކަނޑުތައް ގަދަވާނެ ކަމަށް ބެލެވޭތީ، ދަތުރުފަތުރު ކުރުމުގައި ސަލާމަތީ ކަންކަމަށް އިސްކަންދިނުމަށް ވަނީ އިލްތިމާސްކޮށްފައެވެ. ވަކިން ޚާއްސަކޮށް ކުދި އުޅަނދުފަހަރުގައި ދަތުރުކުރާ ފަރާތްތަކުންނާއި މުދާ އުފުލާ އުޅަނދުފަހަރުން ސަލާމަތީ މިންގަނޑުތަކަށް ފުރިހަމައަށް އަމަލުކުރުމަށް ކޯސްޓްގާޑުން ވެސް ވަނީ އިރުޝާދު ދީފައެވެ.
މި އަހަރު ބޮޑު ޢީދު ދުވަހަށް ވަނީ މި މަހުގެ 27 ވާ ބުދަ ދުވަހެވެ. އަންގާރަ ދުވަހަކީ ޙައްޖު ދުވަހެވެ. އެހެން އަހަރުތަކެކޭ އެއްފަދައިން މި އަހަރު ވެސް ގިނަ އަދަދެއްގެ މީހުން ޢީދު ބަންދާ ދިމާކޮށް ރަށްރަށަށް ދަތުރުކުރާނެ ކަމަށް ބެލެވެއެވެ.