ޑްރޯން އުފެއްދުމުގައި ދުނިޔޭގެ އެންމެ ކުރީގައި އުޅޭ ޑީޖޭއައި ކުންފުނިން އާޓިފިޝަލް އިންޓެލިޖެންސް (އޭއައި) ބޭނުންކޮށްގެން މަސައްކަތްކުރާ "ރޯމޯ 2" ސީރީޒްގެ ކުނިކަހާ ރޮބޮޓު މެޝިންތައް (ވެކިއުމް ކްލީނަރު) ޗައިނާގެ މާކެޓަށް ނެރެފިއެވެ.
މި ސީރީޒްގައި ހިމެނެނީ ރޯމޯ ޕީ2 އަދި ރޯމޯ އޭ2 މޮޑެލްއެވެ. މި އާ މެޝިންތަކުގެ އެންމެ ފާހަގަކޮށްލެވޭ އެއް ސިފައަކީ އޭގައި ހިމެނޭ 36،000 ޕީއޭގެ ގަދަ ސަކްޝަން ޕަވަރެވެ.
މީގެ އިތުރުން ކުނިކަހާއިރު އެއްޗެހީގައި ނުޖެހި އުޅެން ދެނެގަތުމަށް "މިލިމީޓަރ-ލެވެލް އޮބްސްޓެކަލް އެވޮއިޑަންސް 2.0" ޓެކްނޮލޮޖީ ބޭނުންކޮށްފައިވެއެވެ. މިއީ ލައިޑާ ސިސްޓަމަކާއި ވިޜަން ސެންސަރުތައް ގުޅިގެން މަސައްކަތްކުރާ ކުރިއަރާފައިވާ ނިޒާމެކެވެ.
ގޭގެ ކަނަކާއި ފަރުނީޗަރުތަކުގެ ދަށުގައި ހުންނަ ކުނިތައް ހޯދުމަށްޓަކައި މި ރޮބޮޓުތަކުގައި ޚާއްޞަ ލައިޓެއް ހަރުކޮށްފައިވެއެވެ. އަދި, އަތުން ސާރުކުރަން އުނދަގޫ ތަންތަނަށް ފޯރުވުމަށްޓަކައި 123 ޑިގްރީއަށް ހަރަކާތްކުރެވޭ ރޮބޮޓިކް އަތެއް ވެސް މި މެޝިންތަކުގައި ހިމެނެއެވެ.
މި ރޮބޮޓުތަކަކީ އަމިއްލައަށް ސާފުވުމުގެ ގާބިލުކަން ލިބިގެންވާ އެއްޗެހިތަކެކެވެ. އެ ގޮތުން, 80 ޑިގްރީ ސެލްސިއަސްގެ ހޫނު ފެން ބޭނުންކޮށްގެން އަމިއްލައަށް ސާފުކޮށްލުމުގެ ނިޒާމެއް މީގެ ބޭސް ސްޓޭޝަނުގައި ހުރެއެވެ. މީގެ ސަބަބުން އަހަރު ދުވަހު ވެސް މެޝިން ބެލެހެއްޓުމުގައި މާ ބޮޑު މަސައްކަތެއް ކުރަން ނުޖެހޭނެ ކަމަށް ޑީޖޭއައިއިން ބުނެއެވެ.
ޗައިނާގެ މާކެޓުގައި ރޯމޯ ޕީ2 ވިއްކަން ފަށާފައިވަނީ 5،999 ޔުއާން (ގާތްގަނޑަކަށް 830 ޑޮލަރު) އަށެވެ. އަދި ރޯމޯ އޭ2 މޮޑެލްގެ އަގަކީ 5،499 ޔުއާން (ގާތްގަނޑަކަށް 760 ޑޮލަރު) އެވެ.
މި ދެ އުފެއްދުން ވެސް މިހާރު ޗައިނާގެ އޮންލައިން ވެބްސައިޓުތަކުން ގަންނަން ލިބޭނެއެވެ.
ދުނިޔޭގެ ކޮންސިއުމާ ޑްރޯން މާކެޓުގެ ބޮޑު ބައެއް ކޮންޓްރޯލްކުރާ ޑީޖޭއައިއިން ގެންދަނީ އެ ކުންފުނީގެ އުފެއްދުންތައް ފުޅާކޮށް، ސްމާޓް ހޯމް ޓެކްނޮލޮޖީގެ ދާއިރާއަށް ވަދެ ފައިތިލަ ސާބިތުކުރަމުންނެވެ. ޚާއްޞަކޮށް ޑްރޯންތަކުގައި ބޭނުންކުރާ ސެންސަރުތަކާއި ނެވިގޭޝަން ސިސްޓަމްތަކުގެ އެހީގައި، ރޮބޯޓު ކުނިކަހާ މެޝިންތައް އިތުރަށް ތަރައްގީކޮށް، ދާއިރާގެ އެހެން ކުންފުނިތަކަށް ބޮޑު ގޮންޖެހުމަކަށް މިހާރު ވަނީ ވެފައެވެ.