މިދިޔަ އަހަރު ރިލީޒްކޮށް ބޮކްސް އޮފީހުގައި ބޮޑު ކާމިޔާބީއެއް ހޯދި ފިލްމު "ސައްޔާރާ"ގެ ޑައިރެކްޓަރު މޯހިތު ސޫރީ އާއި ޔޭޝް ރާޖް ފިލްމްސް (ވައިއާރްއެފް)އާ ދެމެދު ގިނަ ފިލްމުތަކެއް އުފެއްދުމުގެ އެއްބަސްވުމެއްގައި ސޮއިކޮށްފިއެވެ.
ފިލްމު "ސައްޔާރާ"އަށް ލިބުނު ތާރީހީ ކާމިޔާބީއަށް ފަހު، އަދިތްޔާ ޗޯޕްޅާ އާއި އަކްޝޭ ވިދާނީ ބޭނުންވަނީ މޯހިތު ސޫރީއާ އެކު އޮތް ގުޅުން އިތުރަށް ބަދަހިކުރާށެވެ.
މޯހިތު ދެން ޑައިރެކްޓްކުރާ ފިލްމުން އަހާން ޕާންޑޭ އާއި އަނީތު ޕައްޑާ ފެންނާނޭއިރު، މިއީ މި ތިން ފަރާތުގެ މެދުގައި އޮތް ގުޅުން ބަދަހިވުމުގެ ފެށުމެއް ކަމަށް ބޮލީވުޑް ހަންގާމާއިން ރިޕޯޓްކުރެއެވެ.
އިތުބާރު ހުރި މަސްދަރުތަކުން ކަށަވަރުކޮށްދޭ ގޮތުގައި، ވައިއާރްއެފްގެ ސީއީއޯ އަކްޝޭ ވިދާނީގެ ބައިވެރިވުމާ އެކު މޯހިތު ވަނީ ގިނަ ފިލްމުތަކެއް އުފެއްދުމުގެ އެއްބަސްވުމެއްގައި ސޮއިކޮށްފައެވެ.
ފިލްމު "ސައްޔާރާ"ގެ ލީޑް ތަރިން ކަމަށްވާ އަނީތު އަދި އަހާން އެ ފިލްމުގެ ޑައިރެކްޓަރު މޯހިތު ސޫރީއާ އެކު--ފޮޓޯ/އިންޑިއަންއެކްސްޕްރެސް
"ސައްޔާރާ" އަކީ އަކްޝޭ ވިދާނީ އިސްނަގައިގެން މޯހިތުއާ އެކު ފެށި މަސައްކަތެކެވެ. އެއަށްފަހު މޯހިތު މިހާރު ތައްޔާރުވަމުންދަނީ ވައިއާރްއެފްގެ ދަށުން ލޯބީގެ ތަފާތު ފިލްމުތަކެއް ޕްރޮޑިއުސްކޮށް، އެ މަސައްކަތްތައް އިސްވެ ބެލެހެއްޓުމަށެވެ.
މިވަގުތު ވެސް މޯހިތު ސޫރީ ކޯ-ޕްރޮޑިއުސްކުރާ ލޯބީގެ ދެ ފިލްމެއްގެ މަސައްކަތް ވައިއާރްއެފްއިން ދަނީ ކުރަމުންނެވެ. މިއީ އެ ސްޓޫޑިއޯގެ ހިންގުމުގެ އޮނިގަނޑަށާއި ފިލްމު އުފެއްދުމުގެ ސިޔާސަތަށް ގެންނަ ބަދަލުތަކުގެ ތެރެއިން ނިންމި ނިންމުމެކެވެ.
ފިލްމު "ސައްޔާރާ" އަށްފަހު، ވައިއާރްއެފްގެ ކުރިއަށް ހުރި ފިލްމުތަކާއި ސީރީޒްތަކުގެ ކްރިއޭޓިވް މަސައްކަތްތައް ބަލަހައްޓާނީ ސޯގަތާ މުކަރުޖީ އާއި ސުމަނާ ގޯޝްއެވެ. މީގެ ބޭނުމަކީ ސްކްރިޕްޓަށް އިސްކަންދީގެން ފެންވަރު ރަނގަޅު އުފެއްދުންތަކެއް ބެލުންތެރިންނަށް ގެނެސްދިނުމެވެ.
އަސަރުގަދަ އަދި ވިޔަފާރީގެ ގޮތުން ކާމިޔާބު ފިލްމުތަކެއް އުފެއްދުމަށް މަޝްހޫރު މޯހިތު ސޫރީގެ މަސައްކަތްތައް ބައްޓަންކުރާނީ މިހާރުގެ ބެލުންތެރިންގެ ފޯރިއާއި ޝައުގުވެރިކަމަށް ރިއާޔަތްކޮށެވެ. އަދި މިކަމުގައި ވައިއާރްއެފްގެ ވަސީލަތްތަކާއި ފުޅާ މާކެޓިންގް ނެޓްވޯކްގެ އެހީތެރިކަން އޭނާއަށް ލިބޭނެއެވެ.
މި އެއްބަސްވުމުގެ ދަށުން އުފައްދާ ފިލްމުތަކާ ބެހޭ އިތުރު ތަފްސީލުތައް ކުރިއަށް އޮތް ތަނުގައި ހާމަކުރާނެ ކަމަށް ރިޕޯޓުތަކުން ވަނީ ބުނެފައެވެ.
މޯހިތު ޑައިރެކްޓްކުރާ ފިލްމުގެ މަސައްކަތް އަމަލީގޮތުން ފެށުމަށް ހަމަޖެހިފައިވަނީ މި އަހަރުގެ އޮކްޓޯބަރު މަހުގައެވެ. އެއީ އަހާން ޕާންޑޭ މިހާރު އަލީ އައްބާސް ޒަފަރާއެކު ކުރިއަށްގެންދާ މަސައްކަތް ނިމުމުންނެވެ.