ދެކުނު އިންޑިއާގެ މަގުބޫލު އެކްޓަރު ޕްރަބާސްގެ ކުރިއަށް އޮތް ފިލްމު "ފައުޒީ"ގެ ކްރޫއިން ދަތުރުކުރި އުޅަނދެއް ހައިދަރުއާބާދު ކައިރިން އެކްސިޑެންޓްވެ، މީހަކު މަރުވުމާ ގުޅިގެން ފިލްމުގެ ޝޫޓިން މެދުކަނޑާލައިފިއެވެ.
ހައިދަރުއާބާދުގައި ހިނގި މި ނުރައްކާތެރި އެކްސިޑެންޓްގައި ފިލްމު "ފައުޒީ"ގެ މަސައްކަތުގައި އުޅޭ ކްރޫ މެންބަރުންގެ ތެރެއިން އެކަކު ނިޔާވެ ފަސް މީހަކަށް އެކިވަރުގެ އަނިޔާވެފައިވާ ކަމަށް ރިޕޯޓުތަކުން ބުނެއެވެ.
މި ހާދިސާ ހިނގީ ފިލްމުގެ ޝޫޓިންއަށް ރާމޯޖީ ފިލްމް ސިޓީއަށް ދިއުމަށް ހަ މެންބަރުންނާއެކު ދަތުރުކުރި އުޅަނދު ކޮންޓްރޯލުން ނެއްޓި، މަގުގެ މެދުގައި ހުރި ޑިވައިޑަރުތަކުގައި ޖެހުމުގެ ސަބަބުންނެވެ. އަނިޔާވި ފަސް މީހުންނަށް މި ހާދިސާ ހިނގިތާ ކައިރީގައި ހުންނަ ހޮސްޕިޓަލެއްގައި ފަރުވާދެމުން އަންނަ ކަމަށް މީޑިއާ ރިޕޯޓުތަކުން ބުނެއެވެ.
މި ހާދިސާ ހިނގި ސަރަހައްދަށް ފުލުހުން ގޮސް، މިހާރު ވަނީ މި މައްސަލަ ތަހުގީގު ކުރަން ފަށާފައެވެ. އިބްތިދާއީ ތަހުގީގުން އެނގޭ ގޮތުގައި މި އެކްސިޑެންޓް ހިނގަން މެދުވެރިވީ ޑްރައިވަރަށް އުޅަނދު ކޮންޓްރޯލް ނުކުރެވުމުގެ ސަބަބުންނެވެ.
ނަމަވެސް، އެކްސިޑެންޓް ހިނގަން މެދުވެރިވި އަސްލު ސަބަބު ފުލުހުން އަދި ކަށަވަރުކޮށްދީފައެއް ނުވެއެވެ. މި ހާދިސާ ހިނގާފައި ވަނީ ހެނދުނުގެ ވަގުތެއްގައި ދަތުރުވެރިންނާއި ވިޔަފާރި އުޅަނދުތަކުން ބާރުބޮޑު ހައިދަރުއާބާދު-ވިޖަޔަވާޑާ ހައިވޭގައެވެ.
ފިލްމު "ފައުޒީ"ގެ ޕޯސްޓަރެއް--ފޮޓޯ/އިންޑިއަންއެކްސްޕްރެސް
ހާނޫ ރާގަވަޕޫޑީ ޑައިރެކްޓްކުރާ "ފައުޒީ" އަކީ 1940ގެ އަހަރުތަކުގެ ތާރީޚީ ކަންތައްތަކެއްގެ މައްޗަށް ބިނާކޮށް އުފައްދާ ފިލްމެކެވެ. މައިތްރީ މޫވީ މޭކާސްއިން އުފައްދާ މި ފިލްމުގެ މައިގަނޑު ރޯލުން ޕްރަބާސް ފެންނައިރު، އިމާންވީ، މިތުން ޗަކްރަބޯޓީ، ޖަޔާ ޕްރަދާ އަދި އަނޫޕަމް ކޭރް ފަދަ ތަރިން މި ފިލްމުގެ ކާސްޓުގައި ހިމެނެއެވެ.
މި ހާދިސާއާ ގުޅިގެން ތެލުގޫ ފިލްމީ ސިނާއަތުގައި މަސައްކަތްކުރާ ކްރޫ މެންބަރުންގެ ސަލާމަތާއި ރައްކާތެރިކަމާ މެދު އަނެއްކާވެސް ވަނީ ބޮޑެތި ކަންބޮޑުވުންތަކެއް އުފެދިފައެވެ. ޚާއްސަކޮށް ހެނދުނު ހެނދުނާ ދަތުރުކުރާއިރު ވަރުބަލިކަމުގެ ސަބަބުންނާއި މަގުމަތީގެ ހާލަތުގެ ސަބަބުން މިފަދަ ނުރައްކާތެރި ހާދިސާތައް ހިނގަމުންދާތީ، މުވައްޒަފުންގެ ސަލާމަތަށް އިތުރު ފިޔަވަޅުތައް އެޅުމަށް ގިނަ ބަޔަކު ދަނީ ގޮވާލަމުންނެވެ.
އާންމުކޮށް ޕްރޮޑަކްޝަން ޔޫނިއަންތަކުގެ މަސައްކަތްތެރިންނަށް، އެ މީހުން ދަތުރުކުރާ އުޅަނދުތަކާއި ވަގުތުތައް ކަނޑައެޅުމުގައި އެއްވެސް ބާރެއް ނޯންނާތީ ފިލްމު އުފެއްދުންތެރިންނަށް ގިނަ ބަޔަކު ދަނީ ފާޑުކިޔަމުންނެވެ.
ފިލްމު "ފައުޒީ" މި އަހަރުގެ ޑިސެމްބަރު މަހު ސިނަމާތަކަށް ގެންނަން ތާވަލުކޮށްފައި އޮތް ނަމަވެސް ޝޫޓިންގް މެދުކެނޑުމުގެ ސަބަބުން ފިލްމުގެ މަސައްކަތް އަލުން ފަށައި، ކުރިން ނިންމި ތާރީޚަށް ސިނަމާތަކަށް ގެނެވިދާނެކަމާ މެދު ގިނަ ބަޔަކު ވަނީ ސުވާލު އުފައްދާފައެވެ.