އަންނަ ޖޫން މަހުގެ ހަ ވަނަ ދުވަހު ބޭއްވުމަށް ހަމަޖެހިފައިވާ އައްޑޫ ސިޓީ ހިތަދޫ އުތުރު ދާއިރާގެ ބައި-އިލެކްޝަންގައި، ޕީއެންސީގެ ޓިކެޓު ލިބިވަޑައިގެންނެވި ކުރީގެ މެންބަރު މުޙައްމަދު ސިނާން (ސިނާ)، ބައި-އިލެކްޝަންގައި ވާދަ ނުކުރަން ނިންމަވައިފިއެވެ.
ސިނާނަށް ގޮނޑި ގެއްލުނީ، އިސްލާމިކް ބޭންކުން ނަގާފައިވާ 3.8 މިލިއަން ރުފިޔާގެ ލޯނެއް ނުދެއްކުމުގެ ސަބަބުން، އޭނާގެ ގޮނޑި ގެއްލިފައިވާ ކަމަށް ސުޕްރީމް ކޯޓުން މި މަހުގެ 12ގައި ކަނޑައެޅުމާ ގުޅިގެންނެވެ.
އެ ހުކުމަށް ފަހު ސިނާން ވަނީ، މިދިޔަ ހަފުތާ ބަންދުގައި އޮތް ޕީއެންސީ ޕްރައިމަރީގައި ވާދަކުރައްވައިފައެވެ. އެ ޕްރައިމަރީ އޭނާ ކާމިޔާބު ކުރެއްވީ ހިތަދޫ މޫލެކެޑެ ދާއިރާގެ ކައުންސިލަރު އަޙްމަދު ސަޢީދު (ސޮޑާ) އާ ވާދަކޮށް، 226 ވޯޓު ހޯއްދަވައިގެންނެވެ. ސަޢީދަށް ލިބިވަޑައިގަތީ 187 ވޯޓެވެ.
މިއަދު ސިނާން 'އެކްސް'ގައި އާންމުކުރެއްވި ބަޔާނެއްގައިވަނީ، ބައި-އިލެކްޝަންގައި ވާދަ ނުކުރަން ނިންމެވީ، ވޭތުވެދިޔަ ތިން ދުވަހު ދާއިރާގެ ރައްޔިތުންނާ ބައްދަލުކުރެއްވުމަށްފަހު ކަމަށެވެ. އެގޮތުން، ބައި-އިލެކްޝަނަށް އެންމެ ރަނގަޅު ގޮތަކީ އޭނާ ފަހަތަށް ޖެހިވަޑައިގެން، އައު ބޭފުޅަކަށް ފުރުސަތުދިނުން ކަމަށް ގަބޫލުކުރެވޭ ކަމަށް އޭނާ ވިދާޅުވިއެވެ.
އެހެންވެ އެގޮތަށް ނިންމެވީ ކަމަށް، ސިނާން ލިޔުއްވައިފައިވެއެވެ.
"މިގޮތަށް ނިންމި ނަމަވެސް މި ގޮނޑި ކާމިޔާބުކުރުމަށްޓަކައި ޕާޓީން ނުކުންނަ ކެންޑިޑޭޓެއް އިންތިޚާބުކޮށްދިނުމަށް އަޅުގަނޑު[ގެ] ފުރިހަމަ ބައިވެރިވުމާއި އަޅުގަނޑުގެ ފުރިހަމަ ދައުރު އެންމެ ފުޅާކޮށް އޮންނާނެ ކަމުގެ ޔަގީންކަންވެސް އަރުވަމެވެ،" އޭނާގެ ޕޯސްޓުގައިވެއެވެ.
އެ ނިންމުން މިހާރު ޕީއެންސީގެ ލީޑާޝިޕާ ހިއްސާކޮށްފައިވާ ކަމަށް، އެ ބަޔާނުގައިވެއެވެ.
އިލެކްޝަންސް ކޮމިޝަނުން ވަނީ، ހިތަދޫ އުތުރު ދާއިރާގެ ބައި-އިލެކްޝަން އޮންނާނީ އަންނަ ޖޫން މަހުގެ ހަވަނަ ދުވަހު ކަމަށް އިއުލާންކޮށްފައެވެ.