މިދިޔަ އަހަރު ދުނިޔެ ހައިރާންކޮށްލި އަގުހެޔޮ އޭއައި މޮޑެލް އުފެއްދި ޗައިނާގެ ސްޓާޓަޕް ޑީޕްސީކުން، އެ ކުންފުނީގެ އެންމެ ފަހުގެ އުފެއްދުން ކަމަށްވާ ވީ4 މޮޑެލްގެ ޕްރިވިއު ހުކުރު ދުވަހު އާންމުކޮށްފިއެވެ.
މި އައު މޮޑެލް އަކީ ހާއްސަކޮށް ޗައިނާގެ ވާވޭ ކުންފުނީގެ ޗިޕް ޓެކްނޮލޮޖީއަށް އަމާޒުކޮށްގެން ފަރުމާކޮށްފައިވާ މޮޑެލްއެއް ކަމަށާއި، މީގެ ސަބަބުން ޗައިނާގެ ޓެކްނޮލޮޖީގެ ދާއިރާގައި އަމިއްލަވަންތަކަން އިތުރުވެގެންދާނެ ކަމަށް އެ ކުންފުނިން ބުނެއެވެ.
ޑީޕްސީކުން ހާމަކުރި ގޮތުގައި ވީ4 ގެ ޕްރޯ ވާޝަން ވަނީ އޯޕަން-ސޯސް މޮޑެލްތަކުގެ ތެރެއިން ދުނިޔޭގެ މައުލޫމާތު ބެންޗްމާކްތަކުގެ އެންމެ ކުރީގައި ހިމެނިފައެވެ. އަދި މިއީ މުޅި ދުނިޔޭގެ ނިސްބަތުން ބަލާއިރު ގޫގުލްގެ ކްލޯސްޑް-ސޯސް މޮޑެލްއެއް ކަމަށްވާ ޖެމިނީ-ޕްރޯ-3.1 އަށް ފަހު ދެވަނައަށް އެންމެ ވަރުގަދަ މޮޑެލް ކަމަށްވެސް އެ ކުންފުނިން ފާހަގަކުރެއެވެ.
މިއީ ކުރިން އެމެރިކާގެ އެންވީޑިއާގެ ޗިޕްތަކަށް ބޮޑަށް ބަރޯސާވި ޑީޕްސީކުން، ވާވޭއާ ގުޅިގެން ނެރުނު ފުރަތަމަ ބޮޑު މޮޑެލްއެވެ. ވާވޭއިން ވަނީ ވީ4 ޓްރެއިން ކުރުމުގެ ބައެއް މަރުހަލާތަކުގައި އެ ކުންފުނީގެ "އެސެންޑް" ޗިޕްތައް ބޭނުންކޮށްފައިވާ ކަމަށް ކަށަވަރުކޮށްދީފައެވެ.
އޮމްޑިއާގެ ސެމިކޮންޑަކްޓާ ރިސާޗް ޑިރެކްޓާ ހެ ހުއީ ވިދާޅުވި ގޮތުގައި، ވާވޭގެ އެސެންޑް ޗިޕްތަކަކީ އެންވީޑިއާގެ ޗިޕްތަކަށް ޗައިނާގައި އޮތް އެންމެ ރަނގަޅު ބަދަލެވެ. ވީ4 އަށް މި ޗިޕްތަކުން ސަޕޯޓް ލިބުމުން، ޗައިނާގެ އެންމެ މަތީ ފެންވަރުގެ އޭއައި މޮޑެލްތައް އެގައުމުގެ އަމިއްލަ ހާޑްވެއާގައި ހިންގޭނެކަން މިހާރު ވަނީ ސާބިތުވެފައެވެ.
މި ބަދަލަކީ އެމެރިކާގެ އެކްސްޕޯޓް ކޮންޓްރޯލްތަކުގެ ސަބަބުން އެންވީޑިއާއަށް ޗައިނާގެ މާކެޓް ގެއްލިދާނެ ކަމުގެ ބިރު އޮތްކަން ހާމަވާ ކަމެއް ކަމަށް މާހިރުން ދެކެއެވެ. އެންވީޑިއާގެ ސީއީއޯ ޖެންސަން ހުއަންގް ވިދާޅުވި ގޮތުގައި ޑީޕްސީކް ވާވޭގެ ޗިޕަށް ބަދަލުވުމަކީ އެމެރިކާއަށް ވަރަށް ނުރަނގަޅު ނަތީޖާއެއް ނުކުމެދާނެ ކަމެކެވެ.
މި ލޯންޗްކުރުން އައިސްފައިވަނީ ވައިޓް ހައުސްއިން ޗައިނާއަށް ބޮޑެތި ތުހުމަތުތަކެއް ކުރިތާ އެއް ދުވަސް ފަހުންނެވެ. އެމެރިކާއިން ތުހުމަތުކުރާ ގޮތުގައި ޗައިނާއިން ދަނީ އެމެރިކާގެ އޭއައި ލެބްތަކުގެ މައުލޫމާތު ވަގަށް ނަގަމުންނެވެ. އަދި އަންނަ މަހު ރައީސް ޑޮނަލްޑް ޓްރަމްޕް، ޗައިނާގެ ރައީސް ޝީ ޖިންޕިންއާ ބައްދަލުކުރެއްވުމަށް ހަމަޖެހިފައިވާއިރު، މި ޚަބަރުގެ ސަބަބުން ދެ ގައުމުގެ ގުޅުމަށް އިތުރު އަސަރުތަކެއް ކުރާނެ ކަމަށް ބެލެވެއެވެ.
ޓެކްނިކަލް ގޮތުން ބަލާއިރު، ވީ4 އަކީ ވަރަށް ދިގު ލިޔުންތަކާއި ކޮމްޕްލެކްސް ޓާސްކްތައް ވަރަށް އަގުހެޔޮކޮށް ނިންމާލުމުގެ ގާބިލްކަން ލިބިފައިވާ މޮޑެލްއެކެވެ. މި މޮޑެލްއަށް އެއް މިލިއަނަށްވުރެ ގިނަ ޓޯކަން ޕްރޮސެސް ކުރެވޭއިރު، މިއީ އޯޕަންއޭއައިގެ ޖީޕީޓީ-5.4 އާ އެއް ފެންވަރެއްގެ ކޮންޓެކްސްޓް ވިންޑޯއެކެވެ.
ޑީޕްސީކުން ބުނާ ގޮތުގައި މި މޮޑެލް ހާއްސަކޮށް ފަރުމާކޮށްފައިވަނީ "އޭއައި އޭޖެންޓް" މަސައްކަތްތަކަށެވެ. އަދި އެހެން ބޮޑެތި މޮޑެލްތަކާ އަޅާބަލާއިރު، މި މަސައްކަތްތައް ކުރުމަށް ވީ4 އިން ބޭނުންކުރަނީ ވަރަށް ކުޑަ ކޮމްޕިއުޓް ޕަވަރެކެވެ.
މި އައު ލޯންޗާއެކު ޗައިނާގެ ޗިޕް އުފައްދާ ކުންފުނިތަކުގެ ހިއްސާގެ އަގު ވަނީ ބޮޑުތަނުން އުފުލިފައެވެ. އެގޮތުން ހުއަހޮން ސެމިކޮންޑަކްޓާގެ އަގު 15 އިންސައްތަ އަދި އެސްއެމްއައިސީގެ އަގު 10 އިންސައްތަ މައްޗަށް ދިޔައެވެ.
ނަމަވެސް ޑޭޓާ ޕްރައިވެސީގެ ކަންބޮޑުވުންތަކާ ހެދި ބައެއް ގައުމުތަކުން ޑީޕްސީކް ބޭނުންކުރުން ވަނީ މަނާކޮށްފައެވެ. މި ހުރިހާ ގޮންޖެހުންތަކާއެކުވެސް ޑީޕްސީކުން ދަނީ 20 ބިލިއަން ޑޮލަރަށްވުރެ މަތީ އަގެއްގައި ފަންޑް ހޯދުމަށް މަސައްކަތް ކުރަމުންނެވެ. އަދި އަލިބާބާ އާއި ޓެންސެންޓުން އެ ކުންފުނީގެ ހިއްސާ ގަތުމަށް މަޝްވަރާ ކުރަމުންދާ ކަމަށް ރިޕޯޓްތައް ބުނެއެވެ.