ބޮލީވުޑްގެ މަގުބޫލު އެކްޓަރު ކާތިކް އަރިއަން ފުރަތަމަ ފަހަރަށް އަންހެން ޑައިރެކްޓަރަކާ އެކު ފިލްމެއްގައި މަސައްކަތް ކުރުމުގެ ފުރުސަތު ލިބިފައިވާ ކަމަށް ރިޕޯޓުތަކުން ބުނެފިއެވެ.
މި ފިލްމަކީ، ނަމާ ޕިކްޗާސް އިން އުފައްދާ ޑައިރެކްޓަރު ރީމާ ކަގްތީ ގެނެސްދޭ ފިލްމެކެވެ. މި ފިލްމުގެ މަސައްކަތްތައް އަދި އޮތީ ވަރަށް ކުރީކޮޅުގެ މަރުހަލާއެއްގައެވެ. ފިލްމާ ގުޅޭ އިތުރު ތަފުސީލުތައް އަދި ވަނީ ސިއްރުކުރެވިފައެވެ.
ފިލްމީ ޚަބަރުތައް ގެނެސްދޭ "ވެރައިޓީ"އިން ރިޕޯޓުކޮށްފައިވާ ގޮތުގައި، ކާތިކް އަދި މި ފިލްމަށް ރަސްމީކޮށް އާނބަސް ބުނެފައެއް ނުވި ނަމަވެސް، މި ރޯލަށް ގެންނާނެކަމަށް އެންމެ ބޮޑަށް ބެލެވޭ އެކްޓަރަކީ އެއީއެވެ.
ކާތިކް އާއި ރީމާގެ މި ގުޅުން ހާއްސަވަނީ، ދެމީހުންނަކީވެސް ތަފާތު ދާއިރާތަކެއްގައި ފާހަގަކޮށްލެވޭ ދެ ފަންނާނުންނަށް ވީތީއެވެ. ރީމާ ކަގްތީއަކީ "ތަލާޝް"، "ގޯލްޑް"، "ދަހާދު" އަދި "ސުޕަބޯއިސް އޮފް މަލެގާއޯން" ފަދަ ތަފާތު މައުލޫއުތަކަށް ތައްޔާރުކޮށްފައިވާ ފިލްމުތަކާއި ސީރީޒްތައް ޑައިރެކްޓްކޮށްފައިވާ ހުނަރުވެރިއެކެވެ.
ކާތިކް ބަތަލާ ސްރީލީލާއާ އެކު--ފޮޓޯ/އިންޑިއަންއެކްސްޕްރެސް
ނަމާ ޕިކްޗާސްގެ ގިނަ މަޝްރޫއުތަކެއް ކުރިއަށް އޮތް އަހަރަށް ތާވަލުކުރެވިފައިވާއިރު އޭގެތެރެއިން ތިން ފިލްމުގެ ތެރެއިން އެއް ފިލްމަކީ ރީމާ ކަގްތީގެ މި ފިލްމެވެ. ޝަރީން މަންތުރީ ކޭޑިއާ އަދި ކިޝޯރު އަރޯރާ އިސްވެރިންގެ ގޮތުގައި ތިބޭ މި ކުންފުނިން ވަނީ އިތުރު ދެ ފިލްމަކަށް ޑައިރެކްޓަރުން ކަމަށްވާ ވިޝާލް ދޭވްރުކްކަރު އަދި ދްޔަނޭޝް ޒޯޓިންގް އާއެކު ސޮއިކޮށްފައެވެ.
ނަމާ ޕިކްޗާސް އިން މީގެ ކުރިން ވަނީ "ބިޔޯންޑް ދަ ކްލައުޑްސް"، "އާނަންދީ ގޯޕާލް"، "ލޮސްޓް" އަދި "ސަތުޔަޕްރޭމް ކީ ކާތާ" ފަދަ ފިލްމުތައް އުފައްދާފައެވެ.
މީގެ އިތުރުން، ފޫލަން ދޭވީގެ ހަޔާތުގެ މައްޗަށް ބިނާކޮށް އުފައްދާ ވެބް ސީރީޒް "ފޫލަން" މި އަހަރުގެ ފަހުކޮޅު ޕްރައިމް ވީޑިއޯ މެދުވެރިކޮށް ރިލީޒް ކުރުމަށް ދަނީ ތައްޔާރުވަމުންނެވެ.
ކާތިކްގެ ކުރިއަށް ހުރި ފިލްމުތަކުގެތެރެއިން އެކްޓަރު އެންމެ އަވަހަށް ފެންނާނީ އަނޫރާގް ބާސޫ ޑައިރެކްޓްކޮށް، ސްރީލީލާ އާއެކު ފެނިގެންދާ މިއުޒިކަލް ރޮމޭންސް ފިލްމަކުންނެވެ. އަދި އަންނަ އަހަރުގެ ލޯބިވެރިންގެ ދުވަހުގެ ބަންދާ ދިމާކޮށް، މްރިގްދީޕް ސިންގް ލަމްބާ ޑައިރެކްޓްކުރާ "ނާގްޒިލާ" އަކީ ވެސް ކާތިކް މަސައްކަތް ފަށާފައިވާ އެއް ފިލްމީ ޕްރޮޖެކްޓެވެ.