ޚަބަރެއް ނުވެގެން ހޯދަމުން ދަނިކޮށް، ނ. މަނާދޫގައި އަނިޔާވެރިގޮތަކަށް މަރާލާފައި އޮއްވައި އޭޕްރިލް 7، 2023ގައި ފެނުނު ނައީމާ މޫސާގެ މަރުގެ މައްސަލައިގައި ދައުވާ ލިބޭ މީހުންގެ ދިފާއީ ވަކީލުން ބިޒީ ވެގެން އިއްޔެ ވެސް ހެކިބަސް ނެގުން ހުއްޓާލަން ޖެހިއްޖެއެވެ.
އެ މަރުގެ މައްސަލައިގައި ދައުލަތުން ވަނީ ތިން މީހެއްގެ މައްޗަށް ތިން ދައުވާއެއް ކޮށްފައެވެ. އެއީ،
- ނ. މަނަދޫ ވިނަރެސް، ޙަސަން ފަވާޛު
- ނ. މަނަދޫ، އަހުޒަމް އަބްދުލްޝަކޫރު،
- ނ. މަނަދޫ، ފިނިފެންމާގެ، ޢަބްދުލްވާޙިދު ރިފާސް
ތިން މީހުންގެ ތެރެއިން، ފަވާޛު ހުރީ، ސިއްހީ ސަބަބުތަކަށްޓަކައި ބަންދުން ދޫކޮށްލާފައެވެ. އަނެއް ދެ މީހުން ތިބީ ޝަރިއަތް ނިމެންދެން ބަންދުކޮށްފައެވެ.
މި މައްސަލައިގެ ހެކިބަސް ނެގުމުގެ މަރުހަލާ މިހާރު ފެށިގެން ކުރިއަށްދާއިރު، ދިފާއީ ވަކީލުން ބިޒީވެގެން ހޯމަ ދުވަހު އޮތް ޝަރިއަތްވެސް ޖެހުނީ މެދު ކަނޑާލާށެވެ.
އަނިޔާވެރި ގޮތަކަށް މަރާލާފައި އޮއްވާ ފެނުނު ނައީމާ މަރާލީ އޭނާއަކީ ސިހުރު ހަދާ މީހެއް ކަމަށް ތުހުމަތުކޮށްގެން ކަން ސާބިތުކުރަން ދައުލަތުން ކުރިންވަނީ ޝަރިއަތަށް ހެކި ހުށަހަޅައިފައެވެ. ނައީމާ އަކީ ސިހުރު ހަދާ މީހެއް ކަމަށް ބުނެ ދައްކަމުންދިޔަ ވާހަކަތައް ނ. މަނަދޫގައި ވަރަށް ގިނަ ބަޔަކު ގަބޫލުކޮށް، އެ ވާހަކަތައް ދައްކަމުން ދިޔަކަން ސާބިތު ކުރަން ވެސް ދައުލަތުން ހެކި ހުށަހެޅި އެވެ.
ނައީމާ މޫސާގެ މަރުގެ މައްސަލާގައި ދައުލަތުން ދައުވާކުރާ ތިން މީހުންގެ ތެރެއިން ދެ މީހަކުވަނީ ދައުވާއަށް ކުރިން އިންކާރުކޮށްފަ އެވެ.