ކުއްލި ގޮތަކަށް މަގާމުން ވަކިކުރި އިދިކޮޅު އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބްރޭ) އާއި އެ ޕާޓީގެ ލީގަލް ޑިރެކްޓަރު އަހްމަދު މައުރޫފްގެ މަގާމު އަލުން އިއާދަކޮށްފިއެވެ.
"ސަން" އަށް އެނގިފައިވާ ގޮތުގައި މި ނިންމުން ނިންމާފައިވަނީ މިރޭ ބޭއްވި އެމްޑީޕީގެ ގައުމީ މަޖިލީހުގެ ސިއްރު ބައްދަލުވުމަށްފަހުގައެވެ. މި ބައްދަލުވުމަށްފަހު ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ވިދާޅުވީ، އިބްރޭ އާއި މައުރޫފް މަގާމުން ވަކިކުރުމަށް ފޮނުއްވި ސިޓީ މިހާރު އަނބުރާ ގެންގޮސްފައިވާ ކަމަށެވެ.
މިދިޔަ އަންގާރަ ދުވަހު އިބްރޭ މަގާމުން ވަކިކުރީ ޕާޓީގެ އަސާސީ ގަވާއިދުގެ 70 ވަނަ މާއްދާގެ ދަށުން ކަމަށް ބުނެފައިވީ ނަމަވެސް، އިބްރޭ ވަނީ އެ ނިންމުން ގަބޫލުނުކުރައްވާ ކަމަށް ވިދާޅުވެފައެވެ. މި މައްސަލަ ފެންމަތިވީ އެމްޑީޕީއަށް ލިބުނު ކާމިޔާބީ ފާހަގަކުރުމަށް ބޭއްވި ޖަލްސާގައި ކުރީގެ ރައީސް މުޙައްމަދު ނަޝީދަށް ވާހަކަފުޅުދެއްކެވުމުގެ ފުރުސަތު ނުދެއްވި މައްސަލައިގައި ޕާޓީގެ ތެރޭގައި ބޮޑެތި ޚިޔާލުތަފާތުވުންތަކެއް އުފެދުމުންނެވެ.
މިރޭގެ ބައްދަލުވުމުގައި ގެނައި ބަދަލުތަކާއެކު، ޣަފޫރާ ދެކޮޅަށް ހުށަހަޅާފައިވާ އިތުބާރު ނެތްކަމުގެ މައްސަލަ ވެސް އަނބުރާ ގެންގޮސްފައިވާކަން ޕާޓީގެ ކުރީގެ ޗެއާޕާސަން ފައްޔާޒް އިސްމާއީލް ވަނީ އިއުލާން ކުރައްވާފައެވެ.
މައުލޫމާތު ލިބޭ ގޮތުގައި މި ނިންމުންތަކަކީ ޕާޓީގެ ކުރީގެ ރައީސް މުހައްމަދު ނަޝީދު ޕާޓީ ހިންގުމުގެ ކަންކަމުގައި ބައިވެރިކުރުމަށް މަޝްވަރާ ކުރެވި، އެއްބަސްވުމަކަށް އާދެވުމާ ގުޅިގެން ނިންމި ނިންމުންތަކެކެވެ. މިއީ އެމްޑީޕީގެ އެތެރޭގެ ރޫހު އާލާކޮށް، ޕާޓީ އެކަތިގަނޑަކަށް ހެދުމަށް އެޅުނު މުހިންމު ފިޔަވަޅެއްގެ ގޮތުގައި މެންބަރުން ދެކެއެވެ.
ޕާޓީގެ އިސް ގިނަ ބޭފުޅުން ބައިވެރިވެވަޑައިގެންނެވި މިރޭގެ ބައްދަލުވުމަށްފަހު، އެމްޑީޕީގެ އިދާރީ ހިންގުމަށް ކުރިމަތިވެފައިވާ ހުރަސްތަކަށް ދާއިމީ ހައްލެއް ލިބިގެންދާނެ ކަމަށް ބެލެވެއެވެ.