ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމުން ސަރުކާރު ޖަވާބުދާރީ ކުރުމުގެ ފުރުސަތު ރައްޔިތުންނަށް އެއްކޮށް ގެއްލޭނެ ކަމަށް ކުރީގެ ރައީސް އިބްރާހިމް މުޙައްމަދު ޞާލިޙް މިރޭ ވިދާޅުވެއްޖެއެވެ.
މައި ދެ އިންތިޚާބު އެއް ދުވަހެއްގައި ބޭއްވުމަށް، ކައުންސިލް އިންތިޚާބާ އެކީގައި ރައްޔިތުންގެ ފެންނަ ނުފެންނަ ވޯޓެއް އަންނަ ހޮނިހިރު ދުވަހު ނަގަން ވަނީ ނިންމާފައެވެ.
ކުޅުދުއްފުށި ސިޓީގައި ބޭއްވި އެމްޑީޕީ ޖަލްސާއެއްގައި ޞާލިޙް ވިދާޅުވީ، އެއްވެސް އިރެއްގައި ދެ އިންތިޚާބު އެކުގައި ބާއްވަން ގާނޫނުއަސާސީގައި ނެތް ކަމަށާއި އެ ކަމަށް މަޝްވަރާއެއް ވެސް ކޮށްފައި ނެތް ކަމަށެވެ.
މިގޮތުން، އަބަދުވެސް ރިޔާސީ އިންތިޚާބު ބާއްވަނީ ވަކިން ކަމަށާއި މައި ދެ އިންތިޚާބު އެއްކުރުމުގެ ވިސްނުމެއް އެއްވެސް އިރެއްގައި އެ ޕާޓީގެ ނެތް ކަމަށް ޞާލިޙް ވިދާޅުވިއެވެ.
ގާނޫނުއަސާސީ އެކުލަވާލި ޚާއްސަ މަޖިލީހުގައި ހިމެނިވަޑައިގެންނެވި ޞާލިޙް ވިދާޅުވީ، ގާނޫނުއަސާސީ ހެދިއިރު ވެސް ދެ އިންތިޚާބު އެއްކުރުމުގެ ވިސްނުން ގެންގުޅުނު ބަޔަކު އުޅުނު ނަމަވެސް ގޮތް ނިންމާފައި ވަނީ ވަރަށް ބޮޑަށް ދިރާސާކޮށްގެން ކަމަށެވެ. އެގޮތުން އިންތިޚާބުތައް ވަކިން ބާއްވަން ނިންމީ، ވެރިކަމަށް ރައީސަކު ހޮވުމަށް ފަހު، ރައްޔިތުންނަށް ސަރުކާރު ޖަވާބުދާރީ ކުރުމުގެ ފުރުސަތު ދިނުމަށް ކަމަށް އެ މަނިކުފާނު ވިދާޅުވިއެވެ.
ކުޅުދުއްފުށީގެ މޭޔަރު އާތިފާއި ޞާލިހު ސަލާންކުރައްވަނީ --- ފޮޓޯ/ އެމްޑީޕީ ކުޅުދުއްފުށި ސިޓީ
ދެ އިންތިޚާބު އެކުގައި ބާއްވައިފިނަމަ، ސަރުކާރާ ރައްޔިތުންނާ ދޭތެރޭ އޮންނަ ޖަވާބުދާރީ ކުރުމުގެ ފުރުސަތު ހަމަ މުޅިން ގެއްލިގެންދާނެ. ހަމަ އެ ފަސް އަހަރުގެ ތެރޭގައި ރައްޔިތުންގެ ކައިރިއަށް އަންނަން ޖެހޭ އެއްވެސް ސަބަބެއް ވެރިއަކަށް ނޯވޭ. އެއީ މީގައި އޮތް އެންމެ ބިރުވެރި ކަންތައްކުރީގެ ރައީސް އިބްރާހިމް މުޙައްމަދު ޞާލިޙް
އިތުރަށް އެ މަނިކުފާނު ވިދާޅުވީ، ގާނޫނުއަސާސީއަށް ބަދަލެއް ގެންނައިރު މިހާރަށް ވުރެ ބޮޑަށް ދިރާސާކުރެވި، ބަހުސް ކުރެވެން ޖެހޭ ކަމަށެވެ.
ޞާލިޙް ތުހުމަތުކުރެއްވި ގޮތުގައި، ގާނޫނުއަސާސީގެ ''ފަހަރަކު ތަނަކާ ކުޅެމުން ގޮސް'' މިހާރު ގާނޫނުއަސާސީ އޮތީ އޮޅުންބޮޅުމެއްގެ ތެރޭގައެވެ. އެ މަނިކުފާނު ވަނީ، ދެ އިންތިޚާބު އެއް ދުވަހެއްގައި ބޭއްވުމަށް ނޫނެކޭ ބުނުމަށް ގޮވާލައްވާފައެވެ.
ދެ އިންތިޚާބު އެކުގައި ބޭއްވުމާމެދު ބޮޑު ބަހުސެއް އުފެދިފައިވާއިރު، މި ސަރުކާރުން ބުނާ ގޮތުގައި، ދެ އިންތިޚާބު އެކުގައި ބާއްވަން ޖެހެނީ ޚަރަދު ކުޑަ ކުރުމަށެވެ. އެކަމަށް އެމްޑީއޭއާއި އަދާލަތު ޕާޓީގެ އިތުރުން، ޖުމްހޫރީ ޕާޓީންވެސް ތާއިދުކޮށްފައިވެއެވެ. ދެ އިންތިޚާބު އެއްކޮށް ބޭއްވުމާ ދެކޮޅު ކަމަށް އިދިކޮޅު އެމްޑީޕީގެ އިތުރުން ކުރީގެ ރައީސް ޢަބްދުالله ޔާމީން އަބްދުލްގައްޔޫމްގެ ޕީއެންއެފުން ވަނީ ބުނެފައެވެ.