ބިދޭސީ މަސައްކަތްތެރިން ގެންނައިރު ދައްކަންޖެހޭ ކޯޓާ ފީ، ކުދި އަދި މެދު ފަންތީގެ ވިޔަފާރިތަކުން ދައްކަން ނުޖެހޭ ގޮތް ހަދަން ރައްޔިތުންގެ މަޖިލީހުން މިއަދު ފާސްކޮށްފިއެވެ.
ވަޒީފާއާ ބެހޭ ގާނޫނަށް ސަރުކާރުގެ ފަރާތުން މި އިސްލާހު ހުށަހެޅުއްވީ މަޑަވެލި ދާއިރާގެ މެންބަރު މުޙައްމަދު ޝަމީޒެވެ.
މިދިޔަ މަހުގެ 17 ވަނަ ދުވަހު މަޖިލިސް ތަޅުމަށް ހުށަހެޅި އެ އިސްލާހަށް ކޮމިޓީ މަރުހަލާގައި އިތުރު ބަދަލެއް ގެނައުމަކާ ނުލައި މިއަދު ވަނީ ތަޅުމުން ފާސްކޮށްފައެވެ. އެގޮތުން އެ ބިލު ފާސްކޮށްފައި ވަނީ 62 މެންބަރުންގެ އިއްތިފާގުންނެވެ. އެ އިސްލާހާ ދެކޮޅަށް އެއްވެސް މެންބަރަކު ވޯޓު ދީފައެއް ނުވެއެވެ.
އެ އިސްލާހުގައި ބުނީ، ވަކި ބާވަތެއްގެ ވިޔަފާރިއަކަށް ނިސްބަތްވާ ވަޒީފާދޭ ފަރާތްތަކުން ދައްކަންޖެހޭ ކޯޓާ ފީ ދެއްކުން އިސްތިސްނާކުރަން ވަޒީރުންގެ މަޖިލީހުން ނިންމިދާނެ ކަމަށެވެ. އެ ގޮތުން، އެ ފަދައިން އިސްތިސްނާކުރާއިރު ބައެއް ކަންކަމަށް ރިއާޔަތްކުރަންޖެހޭނެ ކަމަށް އިސްލާހުގައިވެއެވެ. އެއީ:
- އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް ފަހި މާހައުލެއް ގާއިމުކުރުން
- އިގުތިސާދުގައި އެ ވިޔަފާރިތަކުގެ ދައުރު ފުޅާކުރުން
- އެ ވިޔަފާރިތަކުގައި ވަޒީފާގެ ފުރުސަތު އިތުރުކުރަން މަގުފަހިކުރުން
- އެ ވިޔަފާރިތަކާއި ބޮޑެތި ވިޔަފާރިތަކުގެ ފަރަގު ކުޑަކުރުން
- ވާދަވެރިކަން އުފައްދައިގެން އާ ގޮތްތަކާއި، އާ ވިސްނުންތަކާއި، އުފެއްދުންތަކާއި، ޚިދުމަތްތައް ތައާރަފުކުރަން ހިތްވަރުދިނުން
- ވިޔަފާރީގެ ފެންވަރު ރަނގަޅުކުރުން
ވަޒީފާއާ ބެހޭ ގާނޫނަށް ސަރުކާރުގެ ފަރާތުން އިތުރު މުހިންމު އިސްލާހުތަކެއް ވެސް ވަނީ ހުށަހަޅާފައެވެ.
އެގޮތުން، މުވައްޒަފުން ވަޒިފާއިން ވަކިކުރާއިރު ދޭންޖެހޭ ނޯޓިސްގެ މުއްދަތުތަކަށް ގެނައި ބަދަލުތައް ވެސް ހިމެނެއެވެ. އަދި، ސަރުކާރު މުވައްޒަފުންގެ ކުދިންނަށް ދެ އަހަރު ވަންދެން, މުސާރައިން ނުކެނޑޭ ގޮތަށް އެ މުވައްޒަފުންނަށް ދުވާލަކު ދެ ފަހަރަށް ބައިގަޑިއިރުގެ ހުސް ވަގުތުކޮޅެއް ލިބޭ ގޮތް ހެދުމަށް ވަނީ ހުށަހަޅާފައެވެ.
މިއަދުގެ ޖަލްސާގައި ވަނީ އެ އިސްލާހު ވެސް ފާސްކޮށްފައެވެ.