މެދުއިރުމަތީގައި ކުރަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު ހުއްޓުމެއް ނެތި އަނެއްކާ ވެސް މައްޗަށް އުފުލިއްޖެއެވެ.
މީގެ އިތުރުން އެމެރިކާގެ ވަޒީފާގެ ބާޒާރު ދަށަށް ދިއުމާ ގުޅިގެން، ދުނިޔޭގެ ބޮޑެތި ހިއްސާގެ ބާޒާރުތައް ވަނީ ދަށަށް ގޮސްފައެވެ.
ބައިނަލްއަޤުވާމީ ބެންޗްމާކް ކަމަށްވާ ބްރެންޓް ކްރޫޑްގެ އަގު ވަނީ ފީފާއަކަށް 92.69 ޑޮލަރަށް އިއްޔެ ވަނީ އުފުލިފައެވެ. މިއީ އެއް ދުވަސް ތެރޭގައި 8.5 އިންސައްތައިގެ މަތިވުމެކެވެ. އަދި ހަފުތާގެ ތެރޭގައި 30 އިންސައްތައިގެ މަތިވުމެކެވެ. އެމެރިކާގެ މައި ކޮންޓްރެކްޓް ކަމަށްވާ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ގެ އަގު ވަނީ 12 އިންސައްތަ އުފުލި، ފީފާއެއްގެ އަގު 90 ޑޮލަރަށް ވުރެ މައްޗަށް ގޮސްފައެވެ.
ތެލުގެ އަގު މިހާ ބޮޑަށް އުފުލިފައިވަނީ، އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައާއި، އީރާނުން ގަލްފުގެ ސަރަހައްދުގައި ދެމުންދާ ހަމަލާތަކާ ގުޅިގެންނެވެ. މިކަމުގެ ސަބަބުން ދުނިޔޭގެ ތެލުގެ ފަސްބައިކުޅަ އެއްބައި ދަތުރުކުރާ ހުރްމޫޒް ކަނޑުއޮޅިން އާގުބޯޓުފަހަރު ދަތުރުކުރުން ވަނީ ގާތްގަނޑަކަށް ހުއްޓިފައެވެ. މީގެ އިތުރުން އިރާޤުގެ ދެކުނާއި އުތުރުގައިވާ ތެޔޮވަޅުތަކަށް ހަމަލާދިނުމުގެ ސަބަބުން އެމެރިކާއިން ހިންގާ ތެޔޮވަޅެއްގެ މަސައްކަތް ވަނީ ހުއްޓާލަން ޖެހިފައެވެ. އަދި ރައްކާކުރާނެ ޖާގަ ނެތުމުގެ ސަބަބުން ކުވައިތުން ވެސް ވަނީ ތެޔޮ އުފައްދާ މިންވަރު ދަށްކުރަން ފަށާފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ މި ހަނގުރާމަ ނިމޭނީ އީރާނުން "ޝަރުތަކާ ނުލައި އަމާންދިނުމުން" ކަމަށެވެ. މީގެ އިތުރުން ހުރްމޫޒް ކަނޑުއޮޅިން ދަތުރުކުރާ ބޯޓުފަހަރަށް ހިމާޔަތް ދެއްވާނެ ކަމަށް ޓްރަމްޕް ވިދާޅުވި ނަމަވެސް، ޝިޕިން ކުންފުނިތަކުން ދަނީ އެ ސަރަހައްދުގައި ދަތުރުކުރުމުގައި ވަރަށް ބޮޑަށް ސަމާލުވަމުންނެވެ.
އެމެރިކާގެ ލޭބާ ޑިޕާޓްމަންޓުން ހާމަކޮށްފައިވާ ގޮތުގައި، ފާއިތުވި މަހު އެ ޤައުމުގެ ވަޒީފާގެ ބާޒާރުން ވަނީ 92،000 ވަޒީފާ ގެއްލިފައެވެ. މިއީ ޖެނުއަރީ މަހު އިތުރުވި 126،000 ވަޒީފާއާ އަޅާބަލާއިރު ވަރަށް ބޮޑު ދަށްވުމެކެވެ. މީގެ އިތުރުން ޖެނުއަރީ މަހު އެމެރިކާގެ ރީޓެއިލް ވިޔަފާރިވެސް ވަނީ 0.2 އިންސައްތަ ދަށަށް ގޮސްފައެވެ.
ތެލުގެ އަގު މަތީގައި ގިނަ ދުވަހު ހުރުމަކީ ދުނިޔޭގެ އިޤުތިޞާދަށް އޭގެ ނޭދެވޭ އަސަރުކޮށް، އިންފްލޭޝަން މައްޗަށް ހިނގައިދާނެ ކަމެއް ކަމަށް މާހިރުން އިންޒާރުދެއެވެ. އޭޖޭ ބެލްގެ އިންވެސްޓްމަންޓް ޑިރެކްޓާ ރަސް މޯލްޑް ވިދާޅުވި ގޮތުގައި، އެ ސަރަހައްދުގެ ހަކަތައިގެ އުމްރާނީ ވަސީލަތްތަކަށާއި ޝިޕިން ރޫޓުތަކަށް އަސަރުކުރާ މުއްދަތު ދިގުލައިގެންދާ ވަރަކަށް، އިންފްލޭޝަނަށް އޭގެ ނޭދެވޭ އަސަރުކުރުމުގެ ފުރުސަތު ބޮޑުވެގެންދާނެއެވެ.
މިކަމުގެ ސަބަބުން މަރުކަޒީ ބޭންކުތަކުން އިންޓަރެސްޓް ރޭޓް ދަށްކުރުމަށް ހުރަސްއެޅޭނެއެވެ. ކުރިން ލަފާކޮށްފައިވާ ގޮތުން އެމެރިކާގެ ފެޑެރަލް ރިޒާވްއިން ޖޫން މަހު އިންޓަރެސްޓް ރޭޓް ދަށްކުރަން ފަށާނެއެވެ. ނަމަވެސް މިހާރު މާކެޓުން ލަފާކުރަނީ އެކަން ސެޕްޓެމްބަރު މަހަށް ފަސްވާނެ ކަމަށެވެ. މި ހުރިހާ ކަމަކާ ގުޅިގެން އެމެރިކާގެ ވޯލް ސްޓްރީޓްގެ މައި އިންޑެކްސްތައް ވަނީ ގާތްގަނޑަކަށް އެއް އިންސައްތަ ދަށަށް ގޮސްފައެވެ. އަދި ވިލާތުގެ މައި ހިއްސާގެ ބާޒާރުތައްވެސް ބަންދުކުރިއިރު ހުރީ ގާތްގަނޑަކަށް އެއް އިންސައްތައިގެ ގެއްލުމެއްގައެވެ.