އިސްރާއީލާއި ލުބުނާނާ ދެމެދު ކުރަމުންދާ ހަނގުރާމައިގައި 10 ދުވަހުގެ މުއްދަތަށް ހަމަލާބަދަލުކުރުން ހުއްޓާލުމަށް ދެ ގައުމުން އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް މިއަދު އިޢުލާނުކުރައްވައިފިއެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ “ޓްރުތު ސޯޝަލް” ގައި ކުރެއްވި ޕޯސްޓެއްގައި ވިދާޅުވީ، މި އެއްބަސްވުމަށް އަމަލުކުރަން ފަށާނީ އެމެރިކާ ގަޑިން މިއަދު ހަވީރު 5:00 (ޖީއެމްޓީން 21:00) ގައި ކަމަށެވެ.
މި ނިންމުމަށް އާދެވުނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ލުބުނާނުގެ ރައީސް ޖޯސެފް އައޫންއާ އެކު ކުރެއްވި މަޝްވަރާތަކަށް ފަހުގައި ކަމަށް ވެސް އޭނާ ވިދާޅުވިއެވެ. ދެ ގައުމުގެ ދެމެދުގައި ސުލްހަ ގާއިމުކުރުމަށްޓަކައި ރަސްމީކޮށް މި ހަމަލާބަދަލުކުރުން ހުއްޓާލުމަށް ދެ ލީޑަރުން އެއްބަސްވެވަޑައިގެންފައިވާ ކަމަށް ޓްރަމްޕް ވިދާޅުވިއެވެ.
މި އިޢުލާނާ ގުޅިގެން ލުބުނާނުގެ ބޮޑުވަޒީރު ނަވާފް ސަލާމް ވަނީ މިއީ ހަނގުރާމަ ފެށުނު ދުވަހުން ފެށިގެން ލުބުނާނުން އެންމެ ބޮޑަށް އެދެމުންދިޔަ ކަންތައް ކަމަށް ވިދާޅުވެ، މަރުހަބާ ވިދާޅުވެފައެވެ. އަދި އިސްރާއީލުގެ ހަމަލާތަކާ ގުޅިގެން ގެދޮރު ދޫކޮށް ދާންޖެހުނު އެއް މިލިއަނަށްވުރެ ގިނަ މީހުންނަށް ވީ އެންމެ އަވަހަކަށް އެނބުރި ރަށަށް ދެވޭނެ ކަމަށް އުއްމީދުކުރައްވާ ކަމަށް ވެސް އޭނާ ވިދާޅުވިއެވެ.
ލުބުނާނާއި އިސްރާއީލާ ދެމެދު ހަމަލާތައް ބަދަލުކުރަން ފެށީ، ފެބްރުއަރީ 28 ވަނަ ދުވަހު އިސްރާއީލުން ދިން ހަމަލާއެއްގައި އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަކޮށްލުމާ ގުޅިގެން، އޭގެ ރައްދުގައި މާރިޗު ދެ ވަނަ ދުވަހު ލުބުނާނުގެ ހިޒްބުﷲ ޖަމާއަތުން އިސްރާއީލަށް ރޮކެޓް ހަމަލާތަކެއް ދިނުމުންނެވެ. އޭގެ ފަހުން އިސްރާއީލުން ލުބުނާނަށް ދެމުންދާ ވަރުގަދަ ހަމަލާތަކުގައި މިހާތަނަށް 2،100 އަށްވުރެ ގިނަ މީހުން މަރުވެ، އެތައް ހާސް ބަޔަކު ވަނީ ޒަޚަމްވެފައެވެ. އަދި ލުބުނާނުގެ ސަރަހައްދުގެ 15 އިންސައްތަ މީހުންނަށް ވަނީ މަޖުބޫރުން ގެދޮރު ދޫކޮށް ދާން އަންގާފައެވެ.